തര്ക്കപ്രദേശമായ നഗോണോകരാബാഖിന്റെ പേരില് അര്മീനിയ-അസര്ബൈജാന് സംഘര്ഷത്തില് 16 മരണം
അര്മീനിയയും അസര്ബൈജാനും തമ്മില് തര്ക്കപ്രദേശമായ നഗോണോ-കരാബാഖിന്റെ പേരില് സൈനിക സംഘര്ഷം രൂക്ഷം. ഏറ്റുമുട്ടലില് 16 പേര് കൊല്ലപ്പെടുകയും 100-ലേറെപ്പേര്ക്കു പരുക്കേല്ക്കുകയും ചെയ്തു.
ഈ മുന് സോവിയറ്റ് റിപ്പബ്ലിക്കുകള് ലോകവിപണിയിലേക്കുള്ള എണ്ണ-വാതക പൈപ്പ് ലൈനുകളുടെ ഇടനാഴിയായ സൗത്ത് കോക്കസസില് നടത്തുന്ന സംഘര്ഷം രാജ്യാന്തരതലത്തിലും ആശങ്കയുയര്ത്തി. ഇരു രാജ്യങ്ങളും സൈനികനിയമം പ്രഖ്യാപിച്ചിട്ടുണ്ട്.
നഗോണോ-കരാബാഖിലെ 7 ഗ്രാമങ്ങള് പിടിച്ചെടുത്തതായി അസര്ബൈജാന് പ്രഖ്യാപിച്ചു. ഞായറാഴ്ച രാവിലെ അസര്ബൈജാന് ആരംഭിച്ച വ്യോമാക്രമണത്തെത്തുടര്ന്നാണ് അര്മീനിയന് പ്രത്യാക്രമണമുണ്ടായത്. അസര്ബൈജാന്റെ 2 ഹെലികോപ്റ്ററുകള് വെടിവച്ചിട്ടതായും അര്മീനിയയും അവകാശപ്പെട്ടു.
അര്മീനിയന് വംശജരാണ്, അസര്ബൈജാനുള്ളിലുള്ള നഗോണോ കരാബാക് മേഖലയില് ഭൂരിപക്ഷം. സോവിയറ്റ് യൂണിയന് തകര്ന്നതോടെ 1990-കളില് വിഘടനവാദം ശക്തമായി. അര്മീനിയയുടെ പിന്തുണയോടെ ഇവിടെ 1994 മുതല് അര്മീനിയന് വംശജര് സ്വന്തം നിലയില് ഭരണസംവിധാനം ഉണ്ടാക്കിയിട്ടുണ്ട്.
അര്മീനിയയ്ക്ക് റഷ്യയുമായി പ്രതിരോധ കരാറുള്ളതു പോലെ അസര്ബൈജാനു തുര്ക്കിയുടെ പിന്തുണയുണ്ട്. സംഘര്ഷം ലഘൂകരിക്കാന് ശ്രമം ആരംഭിച്ചതായി റഷ്യയുടെ വിദേശകാര്യമന്ത്രി സെര്ജി ലവ്റോവിന്റെ വക്താവ് അറിയിച്ചു. സമാധാനപരമായ പരിഹാരത്തിനു ശ്രമിക്കണമെന്നു ഫ്രാന്സിസ് മാര്പാപ്പ അഭ്യര്ഥിച്ചു.
https://www.facebook.com/Malayalivartha