കൊറോണയെ കീഴടക്കാനുള്ള ശ്രമങ്ങളെല്ലാം പരാജയപ്പെടുമോ എന്ന് ആശങ്ക. മരുന്നിനെയും കുത്തിവയ്പിനെയും നിര്‍വീര്യമാക്കി ജനിതക പരിവര്‍ത്തനം സംഭവിച്ച പുതിയ കൊറോണ വൈറസ് അതിവേഗം പടരുമെന്ന് സൂചന.

ബ്രിട്ടണിലെ കെന്റില്‍ കണ്ടെത്തിയ പുതിയ കൊറോണ ലോകജനതയ്ക്ക് ഭീഷണിയാകാന്‍ ഏറെ സാധ്യതയുണ്ടെന്ന് ലോകാരോഗ്യ സംഘടന മുന്നറിയിപ്പു നല്‍കുന്നു. വീണ്ടുമൊരു അടച്ചുപൂട്ടലിലേക്ക് ഇന്ത്യയ്ക്കുള്‍പ്പെടെ പോകേണ്ടിവരുമോ എന്നതാണ് നിലവിലെ ആശങ്ക.

ശാസ്ത്രലോകം അതിപ്രതീക്ഷയോടെ വികസിപ്പിച്ച വാക്സീന്‍ വഴി നേടിയ രോഗപ്രതിരോധശേഷി പോലും മറികടക്കാന്‍ കഴിവുള്ളതായിരിക്കും ജനിതകമാറ്റം സംഭവിച്ച വൈറസെന്നും ബ്രീട്ടീഷ് വിദഗ്ദര്‍ പറയുന്നു. നിലവില്‍ യുകെയിലെമ്പാടും വൈറസ് ശക്തിപ്രാപിച്ചു കഴിഞ്ഞു.


ലോകം മുഴുവന്‍ ഇതു പടരാനുള്ള എല്ലാ സാധ്യതകളുമുണ്ട്. വാക്സിനേഷനെ തുരങ്കം വയ്ക്കുന്നതായിരിക്കും കെന്റ് വൈറസെന്നും അവര്‍ വ്യക്തമാക്കി. കോവിഡ് ഇന്ത്യയില്‍ സംഹാരതാണ്ഡവം തുടങ്ങിയിട്ട് ഒര്ു വര്‍ഷം എത്തുമ്പോഴാണ് ഭയാനകമായ പുതിയ വാര്‍ത്തകള്‍ പുറത്തുവരുന്നത്.

ചൈനയിലെ വുഹാനില്‍നിന്നു പൊട്ടിപ്പുറപ്പെട്ടതെന്നു കരുതുന്ന യഥാര്‍ഥ വൈറസിനെക്കൂടാതെ ജനിതക പരിവര്‍ത്തനം സംഭവിച്ച ഒട്ടേറെ വകഭേദങ്ങളും പലയിടത്തും കണ്ടെത്തിയിരുന്നു. അതില്‍ത്തന്നെ യുകെയിലെയും ദക്ഷിണാഫ്രിക്കയിലെയും പുതിയ ഇനം കോവിഡിനെയാണ് ലോകം ആശങ്കയോടെ കണ്ടത്. പെട്ടെന്നു പടരാനും മനുഷ്യരെ കൊന്നൊടുക്കാനുമുള്ള ഉഗ്രശേഷിയാണ് ഇവയെ അപകടകാരിയാക്കിയത്.

നിലവില്‍ ജനിതക പരിവര്‍ത്തനം സംഭവിച്ചുകൊണ്ടിരിക്കുന്ന വൈറസുകകളെ ചെറുക്കാന്‍ നിലവിലെ വാക്സീന്‍ വഴി സാധിക്കില്ല. മാത്രവുമല്ല ഇതോടകം കുത്തിവെയ്പ്പിലൂടെ നേടി രോഗപ്രതിരോധ ശേഷി പോരാതെ വരികയും ചെയ്യുമെന്നാണ് ആഗോള മുന്നറിയിപ്പുണ്ടായിരിക്കുന്നത്. പ്രതിരോധത്തിനാവശ്യമായ വാക്സീന്‍ ഡോസുകള്‍ സ്വീകരിച്ചതിനു ശേഷവും നല്‍കുന്ന ബൂസ്റ്റര്‍ ഡോസുകളും ഫലപ്രദമാകാനിടയില്ല.

്പുതിയ കൊറോണ വൈറസ് വകഭേദം ബാധിച്ച ഒരു ലക്ഷത്തിലേറെ കേസുകള്‍ കണ്ടെത്തിയിട്ടുണ്ട്. വൈറസിന്റെ സ്പൈക്ക് പ്രോട്ടീനാണ് പുതിയ വകഭേദത്തില്‍ ജനിതകമാറ്റം സംഭവിച്ചിരിക്കുന്നത്. ഇത് വൈറസിനെ സ്വഭാവത്തില്‍ എന്തു മാറ്റം ഉണ്ടാകുമെന്ന് വ്യക്തമായിട്ടില്ല.


ബ്രിട്ടണില്‍ ഇതിനോടകം വ്യാപിച്ച പുതിയ യു.കെ വകഭേദം ലോകത്താകമാനം പടര്‍ന്നുപിടിച്ചേക്കാമെന്നുമാണ് മുന്നറിയിപ്പ്. കോവിഡ് വാക്‌സിന്‍ ബ്രിട്ടണില്‍ ഇതുവരെ വളരെ ഫലപ്രദമായിരുന്നു. എന്നാല്‍ വൈറസിന്റെ ജനിതക മാറ്റങ്ങള്‍ കുത്തിവെപ്പിനെ ദുര്‍ബലപ്പെടുത്താന്‍ സാധ്യതയുണ്ട്.


വീണ്ടുമുണ്ടായ ജനിതക മാറ്റം വാക്‌സിനേഷനും ഭീഷണിയാണ്. കോവിഡിനെ മറികടക്കാന്‍ സാധിക്കുകയോ അല്ലെങ്കില്‍ ജനിതക മാറ്റം സംഭവിച്ച് ഈ വൈറസ് സ്വയം അപകടകാരിയല്ലാതെ മാറുകയോ ചെയ്താല്‍ മാത്രമേ കോവിഡ് ഭീതി ഒഴിയുകയുള്ളു. എന്നാല്‍ ഇതിനായി പത്ത് വര്‍ഷങ്ങളെങ്കിലും എടുത്തേക്കാമെന്നാണ് ബ്രിട്ടീഷ് ആരോഗ്യവകുപ്പിന്റെ മുന്നറിയിപ്പ്.