പ്രണയ ദിനത്തിൽ ഓരോ വ്യക്തികളും തങ്ങളുടെ പങ്കാളിയെ വ്യത്യസ്തമായ രീതിയിൽ സന്തോഷിപ്പിക്കാൻ ശ്രമിക്കും. ചിലർ സമ്മാനങ്ങൾ നൽകും മറ്റ് ചിലർ ഇഷ്ട്ടം തുറന്ന് പറയും ഇതൊക്കെയാണ് പതിവ് കാഴ്ചകൾ. എന്നാൽ വ്യത്യസ്തമായ പ്രണയ സമ്മാനമാണ് ഭാര്യയ്ക്ക് അഹമ്മദാബാദ് സ്വദേശിയായ ഒരു ഭര്‍ത്താവ് നല്‍കിയിരിക്കുന്നത്. അദ്ദേഹം പ്രണയ സമ്മാനമായി ഭാര്യയ്ക്ക് സ്വന്തം വൃക്കയാണ് നൽകിയിരിക്കുന്നത്.23-ാം വിവാഹ വാര്‍ഷികത്തിലാണ് ഇത്തരത്തിലൊരു പ്രണയ സമ്മാനം.

വൃക്കകള്‍ തകര്‍ന്നതിനെ തുടര്‍ന്ന് കഴിഞ്ഞ 3 വര്‍ഷമായി മരുന്നുകള്‍ കൊണ്ട് മാത്രം ജീവക്കുന്ന ഭാര്യയ്ക്കാണ് ഭര്‍ത്താവ് വൃക്കദാനം ചെയ്യാൻ പോകുന്നത്. വൃക്കമാറ്റിവയ്ക്കല്‍ ശസ്ത്രക്രിയ ഞായറാഴ്ച നടത്തുമെന്നും അഹമ്മദാബാദിലെ ഡോ. സിദ്ധാര്‍ത്ഥ മവാനി വാര്‍ത്താ ഏജന്‍സിയായ എ.എന്‍.ഐയോട് പറയുകയുണ്ടായി. ഭാര്യയുടെ വേദന കണ്ടാണ് വൃക്ക ദാനം ചെയ്യാന്‍ തീരുമാനിച്ചതെന്ന് ഭര്‍ത്താവ് വിനോദ് പറഞ്ഞു.

കഴിഞ്ഞ മൂന്ന് വര്‍ഷമായി എന്റെ ഭാര്യ രോഗബാധിതയാണ്, ഒരു മാസം മുമ്പാണ് ഡയാലിസിസ് നടത്തിയത്. അവള്‍ക്ക് 44 വയസ്സായി. പങ്കാളിയെ ബഹുമാനിക്കുകയും ആവശ്യമുള്ളപ്പോള്‍ പരസ്പരം സഹായിക്കുകയും വേണമെന്ന സന്ദേശം നല്‍കുകയാണ് ലക്ഷ്യമെന്നും വിനോദ് പറയുകയുണ്ടായി.