ലോകത്തെ തന്നെ ഏറ്റവും തിരക്കുപിടിച്ച കപ്പൽ പാതകളിലൊന്നാണ് സൂയസ്​ കനാൽ. ഇപ്പോൾ ലോകപ്രശസ്തമായ സമുദ്രപാതയിൽ വന്‍ ട്രാഫിക് ബ്ലോക്കാണ് അനുഭവപ്പെടുന്നത്. വഴിമുടക്കിയത് മറ്റാരുമല്ല, ഒരു കൂറ്റൻ കണ്ടെയ്നര്‍ ചരക്കുകപ്പലിന് നിയന്ത്രണം നഷ്ടമായതാണ് സംഭവത്തിന് കാരണം.

1312 അടി നീളവും 59 മീറ്റർ വീതിയുമുള്ള ലോകത്തെ ഏറ്റവും വലിയ ചരക്കു കപ്പലുകളിലൊന്നായ 'എവർഗ്രീൻ' ആണ്​ കാറ്റിലുലഞ്ഞ്​ സൂയസ്​ തുറമുഖത്തിനു സമീപം വിലങ്ങനെ നിലംതൊട്ടുനിന്നത്​. ഇരുവശത്തും നീങ്ങുകയായിരുന്ന 100 ലേറെ കപ്പലുകൾ അതോടെ ഗതാഗതം വഴിമുട്ടി പാതിവഴിയിൽ നിർത്തിയിട്ട നിലയിലാണ് ഉള്ളത്​.

ചെങ്കടലിനും മെഡിറ്ററേനിയൻ കടലിനുമിടയിലെ ഏക കപ്പൽ ചാലാണ്​ സൂയസ്​ കനാൽ. മൂന്നു വർഷം മുമ്പ്​ ജപ്പാനിൽ നിർമിച്ചതാണ്​ കപ്പൽ. രണ്ടു ലക്ഷം ടൺ ആണ്​ കപ്പലിന്‍റെ ചരക്കുശേഷി. ചരക്കുഗതാഗതം ലാഭകരമാക്കാൻ വൻകിട കമ്പനികൾ കൂറ്റൻ കപ്പലുകളിലേക്ക്​ തിരിഞ്ഞത്​ സമാന അപകടങ്ങൾക്കിടയാക്കുമെന്ന ആശങ്കയും ഇപ്പോൾ നിലനിൽക്കുന്നുണ്ട്​.

'ശക്​തമായ കാറ്റിൽ നേരെ തിരിഞ്ഞ്​ കരക്കടിയുകയായിരുന്നുവെന്ന്​ കപ്പൽ അധികൃതർ വെളിപ്പെടുത്തി. നിയന്ത്രണം നഷ്ടമായി ഒരു വശത്തേക്ക് ചെരിഞ്ഞതോടെ കപ്പലിന്‍റെ ഒരു ഭാഗം കനാലിന്‍റെ ഒരു ഭാഗത്ത് ഇടിക്കുകയും ചെയ്തിട്ടുണ്ടെന്നും എവര്‍ഗ്രീന്‍ വ്യക്തമാക്കി.

തായ്​വാൻ ആസ്​ഥാനമായുള്ള കപ്പൽ ജപ്പാനിലെ ഷൂയി ​കിസെൻ ​കയ്​ഷ ലിമിറ്റഡിന്‍റെ ഉടമസ്​ഥതയിലുള്ളതാണ്​. ടഗ്​ ബോട്ടുകളുപയോഗിച്ച്​ കപ്പൽ രക്ഷപ്പെടുത്താനുള്ള ശ്രമം തുടരുകയാണ്​. പക്ഷേ, ദിവസ​ങ്ങളെടുത്തേ ഇത്​ സാധ്യമാകൂ എന്നാണ്​ സൂചന.

ചൈനയിൽ നിന്ന്​ നെതർലൻഡ്​സിലെ റോട്ടർഡാമിലേക്ക്​ പുറപ്പെട്ടതായിരുന്നു 'എവർഗ്രീൻ' കപ്പൽ. ജീവനക്കാർക്ക് ആർക്കും തന്നെ​ പരിക്കേറ്റിട്ടില്ല. കപ്പലിന് സംഭവിച്ച​ കേടുപാടുകൾ പരിശോധിച്ചു വരികയാണ് അധികൃതർ​. വടക്കോട്ട്​ 42ഉം തെക്കോട്ട്​ 64ഉം കപ്പലുകൾ പാതിവഴിയിലാണ്​ ഇപ്പോൾ നിൽക്കുന്നത്. ​

1869ൽ ആദ്യമായി തുറന്ന 193 കിലോമീറ്റർ ദൈർഘ്യമുള്ള സൂയസ്​ കനാൽ വഴിയാണ്​ ലോകത്തെ 12 ശതമാനം ആഗോള വ്യാപാരം നടക്കുന്നതെന്നാണ്​ കണക്കുകൂട്ടലുൾ സൂചിപ്പിക്കുന്നത്. കടൽ മാർ​ഗമുള്ള എണ്ണകടത്തിന്‍റെ 10 ശതമാനവും പ്രകൃതി വാതകത്തിന്‍റെ എട്ടുശതമാനവും ഇതുവഴി കടന്നുപോകുന്നത്.

മുമ്പും കപ്പലുകൾ മുടങ്ങി യാത്ര മുടങ്ങുന്നത്​ സൂയസിൽ റിപ്പോർട്ട്​ ചെയ്​തിട്ടുണ്ടായിരുന്നു. 2017ലാണ്​ അവസാനമായി സമാന സംഭവം അരങ്ങേറിയത്​. ഒ.ഒ.സി.എൽ ജപ്പാൻ എന്ന കപ്പൽ മണിക്കൂറുകൾക്ക്​ ശേഷം ടഗ്​ ബോട്ടുകൾ ഉപയോഗിച്ച്​ അന്ന് രക്ഷപ്പെടുത്തിയിരുന്നു. 2004ൽ കപ്പൽ കുടുങ്ങി മൂന്നു ദിവസം ഇതുവഴി ഗതാഗതം സ്ഥംഭിച്ചു. കാൽ ലക്ഷം ടൺ എണ്ണ പുറത്തേക്ക്​ പമ്പു ചെയ്​താണ്​ കപ്പൽ രക്ഷപ്പെടുത്തിയത്​.

തത്​കാലം സൂയസ്​ കനാൽ പഴയ പാത തുറന്നു നൽകിയിട്ടുണ്ടെങ്കിലും കപ്പൽ ഗതാഗതം പഴയ പടി ആകുമെന്ന കാര്യത്തിൽ​ ഉറപ്പില്ല. 2020ൽ മാത്രം 561 കോടി ഡോളറാണ്​ സൂയസ്​ കനാലിലെ കപ്പൽ ഗതാഗതം വഴി ഈജിപ്ത്​ സർക്കാറിന്‍റെ വരുമാനം. യാത്ര കൂടുതൽ സുഗമമാക്കി കനാൽ വികസനം പൂർത്തിയായി വരികയാണ് ഇപ്പോൾ​.

കപ്പലിലെ ചരക്ക് ഇറക്കിയ ശേഷം മാത്രമാകും കപ്പലിനെ നീക്കാനാവുക. കപ്പല്‍ ഉറച്ചിരിക്കുന്ന കനാലിലെ മണലും നീക്കം ചെയ്യേണ്ടതുണ്ട്. ഇതിന് ദിവസങ്ങളോളം സമയം എടുക്കുമെന്നാണ് സൂയസ് കനാല്‍ അതോറിറ്റി വിലയിരുത്തുന്നത്. 120 മൈല്‍ അഥവാ193 കിലോമീറ്റര്‍ നീളമാണ് സൂയസ് കനാലിലുള്ളത്. നൂറിലധികം കപ്പലുകളാണ് ഈ ട്രാഫിക്ക് ബ്ലോക്കില്‍ കുരുങ്ങിയിട്ടുള്ളത്.