കൊവിഡ് വ്യാപനത്തിന്റെ പശ്ചാത്തലത്തിൽ വിദേശത്ത് നിന്ന് രാജ്യത്ത് എത്തുന്നവർക്ക് ശ്രീലങ്ക നിയന്ത്രണം ഏർപ്പെടുത്തിയേക്കുമെന്ന് റിപ്പോർട്ട്. വിദേശത്ത് നിന്ന് എത്തുന്നവരിൽ വൈറസ് ബാധ സ്ഥിരീകരിക്കുന്ന സാഹചര്യത്തിലാണ് കൂടുതൽ നിയന്ത്രണം നടപ്പാക്കാനൊരുങ്ങി ശ്രീലങ്കൻ ഭരണകൂടം.

ഈ മാസം മാത്രം രാജ്യത്ത് റിപ്പോർട്ട് ചെയ്തതിൽ 15 ശതമാനം കോവിഡ് കേസുകൾ വിദേശത്ത് നിന്ന് എത്തിയവരിലാണെന്നാണ് പുതിയ കണക്കുകൾ. വൈറസിന്റെ കൂടുതൽ വ്യാപനം തടയാൻ നിയന്ത്രണങ്ങൾ ഏർപ്പെടുത്തേണ്ടി വരുമെന്നും സർക്കാർ വൃത്തങ്ങൾ അറിയിച്ചു.

കൊവിഡ് സ്ഥിരീകരിച്ച 52,710 പേരിൽ 1,593 പേർ വിദേശ രാജ്യങ്ങളിൽ നിന്ന് ശ്രീലങ്കയിൽ എത്തിയവരാണ്. പശ്ചിമേഷ്യ, യൂറോപ്യൻ രാജ്യങ്ങൾ എന്നിവിടങ്ങളിൽ നിന്ന് എത്തിയവരിലാണ് വൈറസ് ബാധ കണ്ടെത്തിയതെന്നും ശ്രീലങ്കൻ

ആരോഗ്യ വിദഗ്ധൻ സമരവീര വ്യക്തമാക്കി.ശ്രീലങ്കയിൽ ഇതുവരെ 96,000 പേർക്ക് കോവിഡ് സ്ഥിരീകരിക്കുകയും 615 പേർ മരണപ്പെടുകയും ചെയ്തു.

അതേസമയം, ഇന്ത്യയിലും കൊവിഡ് വ്യാപനം രൂക്ഷമാവുകയാണ്. മഹാരാഷ്ട്രയില്‍ കോവിഡ് രോഗികളുടെ എണ്ണം വര്‍ധിക്കുന്ന സാഹചര്യത്തില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തി സംസ്ഥാന സര്‍ക്കാര്‍. രാത്രി കര്‍ഫ്യൂവും വാരാന്ത്യ ലോക്ഡൗണും അടക്കമുള്ളവയാണ് പ്രഖ്യാപിച്ചിട്ടുള്ളത്.

പകല്‍ സമയത്ത് അഞ്ചിലധികം പേര്‍ കൂട്ടം കൂടാന്‍ അനുവദിക്കില്ല. മാളുകളും ഭക്ഷണശാലകളും ബാറുകളും തുറക്കാന്‍ അനുവദിക്കില്ല. 50 ശതമാനം ആളെക്കയറ്റുന്ന തരത്തില്‍ പൊതുഗതാഗതം അനുവദിക്കും.