ഇന്ത്യയില് നിന്ന് വരുന്നവര്ക്കുള്ള ക്വാറന്റൈന് ബുക്കിംഗില് മാറ്റം വരുത്തി ഖത്തർ ആരോഗ്യമന്ത്രാലയം; ഹോട്ടല് ബുക്കിംഗിന് പുതിയ മാര്ഗനിര്ദേശങ്ങള് പുറപ്പെടുവിച്ച് ഡിസ്കവര് ഖത്തര്
കൊവിഡ് വ്യാപനം അതിശക്തമായി തുടരുന്ന ഇന്ത്യ ഉള്പ്പെടെ ആറ് രാജ്യങ്ങളില് നിന്ന് വരുന്ന വര്ക്കുള്ള ക്വാറന്റൈന് വ്യവസ്ഥകളില് ഖത്തര് ആരോഗ്യമന്ത്രാലയം മാറ്റങ്ങള് വരുത്തിയ സാഹചര്യത്തില് ഹോട്ടല് ബുക്കിംഗിന് പുതിയ മാര്ഗനിര്ദേശങ്ങള് പുറപ്പെടുവിച്ച് ഡിസ്കവര് ഖത്തര്.
ഇന്ത്യക്കു പുറമെ, പാകിസ്ഥാൻ, ബംഗ്ലാദേശ്, ഫിലിപ്പീന്സ്, ശ്രീലങ്ക, നേപ്പാള് എന്നീ രാജ്യങ്ങളില് നിന്ന് വരുന്നവര്ക്ക് പ്രത്യേകമായി ഹോട്ടല് മുറികള് നീക്കി വച്ചിരിക്കുകയാണ് അധികൃതര്. ഇവ പുതുതായി ബുക്ക് ചെയ്യുന്നതിന് ഡിസ്കവര് ഖത്തര് വെബ്സൈറ്റില് പ്രത്യേകം ലിങ്കുകളും ഏര്പ്പെടുത്തിയിട്ടുണ്ട്. ഇവ ഉടന് ലഭ്യമാവുമെന്ന് അധികൃതര് അറിയിച്ചു.
നേരത്തേ മറ്റ് ഹോട്ടലുകളില് ബുക്ക് ചെയ്യുകയും ഏപ്രില് 28ന് പ്രാദേശിക സമയം രാത്രി 11.59ന് മുമ്പ് ഖത്തറിലെത്തുകയും ചെയ്യുന്നവര്ക്ക് നിലവിലെ ഡിസ്കവര് ഖത്തര് വൗച്ചര് ഉപയോഗിച്ച് തന്നെ യാത്ര ചെയ്യാവുന്നതാണ്. നിങ്ങള് ബുക്ക് ചെയ്ത ഹോട്ടലില് എന്തെങ്കിലും മാറ്റം ഉണ്ടെങ്കില് ഖത്തറിലെത്തുന്ന സമയത്ത് അറിയിക്കും.
നിങ്ങള് നേരത്തേ ബുക്ക് ചെയ്ത ഹോട്ടലില് എന്തെങ്കിലും മാറ്റങ്ങളുണ്ടാവുകയും പുതുതായി ലഭിച്ച ഹോട്ടല് മുറിയുടെ നിരക്ക് പഴയതിനേക്കാള് കൂടുകയും ചെയ്താല് പഴയ നിരക്ക് തന്നെ നല്കിയാല് മതിയാവും. അതേസമയം, ഇന്ത്യക്കാര്ക്ക് പുതുതായി ലഭ്യമായ ഹോട്ടലിന്റേതിനേക്കാള് കൂടുതലാണ് നിങ്ങള് നിലവില് ബുക്ക് ചെയ്തിട്ടുള്ള ഹോട്ടല് മുറിയുടെ ചാര്ജെങ്കില് കുറവ് വന്ന തുക റീഫണ്ട് ചെയ്തു കിട്ടാന് ആവശ്യപ്പെടാവുന്നതാണ്.
നിലവില് മറ്റ് ഹോട്ടലുകളില് ബുക്ക് ചെയ്യുകയും ഏപ്രില് 29ന് രാത്രി 12 മണിക്കോ അതിന് ശേഷമോ ഖത്തറിലെത്തുകയും ചെയ്യുകയാണെങ്കില് യാത്ര പുറപ്പെടും മുമ്പ് നിങ്ങളുടെ ഒറിജിനല് ബുക്കിംഗ് റദ്ദായ വിവരം ഇമെയില് വഴി നിങ്ങളെ അറിയിക്കും.
പ്രസ്തുത ഇമെയിലില് പറയുന്നത് പ്രകാരം പുതിയ ഹോട്ടല് മുറിക്കായി വീണ്ടും ബുക്ക് ചെയ്യണം. പുതിയ ബുക്കിംഗിനാവശ്യമായ തുക മുഴുവന് നല്കി വേണം റീ ബുക്കിംഗ് നടത്താൻ. ആദ്യത്തെ ഹോട്ടല് ബുക്ക് ചെയ്യാന് നല്കിയ തുക 15 പ്രവൃത്തി ദിവസത്തിനകം റീഫണ്ട് ചെയ്യും.
ഇന്ത്യ ഉള്പ്പെടെയുള്ള ആറ് രാജ്യക്കാര് എല്ലാ പുതിയ ബുക്കിംഗുകളും ആ രാജ്യങ്ങള്ക്ക് വേണ്ടി നീക്കി വച്ചിട്ടുള്ള പ്രത്യേക ഹോട്ടലുകളില് മാത്രമേ നടത്താവൂ. നിശ്ചിത ഹോട്ടലുകളില് ബുക്ക് ചെയ്ത വൗച്ചര് ഉണ്ടെങ്കിലേ വിമാനത്തില് കയറാന് അനുവദിക്കൂ.
അതേസമയം, മറ്റ് രാജ്യങ്ങളില് നിന്ന് വരുന്നവര് ഇന്ത്യ ഉള്പ്പെടെയുള്ള ആറ് രാജ്യങ്ങളില് നിന്നു വരുന്നവര്ക്കായി മാറ്റിവച്ചിട്ടുള്ള ഹോട്ടലുകള് ബുക്ക് ചെയ്യാന് പാടില്ല. ആ വൗച്ചറുമായി വിമാനത്തില് കയറാന് അനുവദിക്കില്ല. എന്നു മാത്രമല്ല, ഹോട്ടല് ബുക്കിംഗിനായി നല്കിയ തുക തിരികെ ലഭിക്കുകയുമില്ല.
കൊവിഡ് വ്യാപനം വന്തോതില് ശക്തി പ്രാപിച്ച ഇന്ത്യ ഉള്പ്പെടെയുള്ള ആറ് രാജ്യങ്ങള്ക്കായുള്ള ക്വാറന്റൈന് നിബന്ധനകളിലും ഖത്തര് ആരോഗ്യമന്ത്രാലയം നേരത്തേ മാറ്റങ്ങള് വരുത്തിയിരുന്നു. വാക്സിനെടുത്തവര്ക്കും രോഗമുക്തി നേടിയവര്ക്കും നേരത്തേ നല്കിയിരുന്ന ക്വാറന്റൈന് ഇളവുകള് എടുത്തുകളയുകയും ആര്ടിപിസിആര് നെഗറ്റീവ് സര്ട്ടിഫിക്കറ്റ് 48 മണിക്കൂറിനകം ഉള്ളതു തന്നെ വേണമെന്നും നിബന്ധന വച്ചിരുന്നു.
https://www.facebook.com/Malayalivartha
