ഇന്ത്യക്കുള്ള വൈദ്യ സഹായവുമായി യു എസ് വിമാനം പുറപ്പെട്ടു; അമേരിക്കയിൽ കോവിഡ് രൂക്ഷമായ ആദ്യ ഘട്ടത്തിൽ സഹായിച്ചതിന് സമാനമായി തിരിച്ചയക്കുന്നുവെന്ന് വൈറ്റ്ഹൗസ് വക്താവ്
കൊവിഡ് പ്രതിരോധത്തിന് അമേരിക്കയില് നിന്നുള്ള നൂറ് ദശലക്ഷം ഡോളറിന്റെ ആദ്യ സഹായ വിഹിതം ഇന്ന് മുതല് എത്തും. വൈദ്യസഹായവുമായി യു എസ് വിമാനം ഇന്ത്യയിലേക്ക് പുറപ്പെട്ടതായി വിവരങ്ങൾ. അമേരിക്കയില് കോവിഡ് പ്രതിസന്ധി രൂക്ഷമായ ആദ്യ ഘട്ടത്തില് ഇന്ത്യ സഹായം അയച്ചതിന് സമാനമായി തിരിച്ചും അയക്കുകയാണെന്ന് വൈറ്റ്ഹൗസ് വക്താവ് വ്യക്തമാക്കി.
അടിയന്തര സഹായമായി 1700 ഓക്സിജന് കോണ്സെന്ട്രേറ്ററുകള്, 1,100 സിലിണ്ടറുകള്, 20 രോഗികളെ വരെ സഹായിക്കാന് സൗകര്യപ്രദമായ വലിയ ഓക്സിജന് ജനറേഷന് യൂണിറ്റുകള് എന്നിവ എത്തിച്ച് നൽകുന്നതാണ്. ഇതിനൊപ്പം 15 മില്യണ് എന് 95 മാസ്കുകളും പത്ത് ലക്ഷം ദ്രുത പരിശോധന കിറ്റുകളും നല്കുമെന്നും ബൈഡന് ഭരണകൂടം പുറപ്പെടുവിച്ച ഫാക്റ്റ്ഷീറ്റില് അറിയിച്ചിരിക്കുന്നു.
അതേസമയം, റഷ്യയില് നിന്നുള്ള സ്ഫുട്നിക് വാക്സിന് അടക്കമുള്ള അടിയന്തര മെഡിക്കല് വസ്തുക്കള് നാളെയോടെ എത്തുമെന്നാണ് പ്രതീക്ഷ. ഇന്ത്യയില് കൊവിഡ് വ്യാപനം രൂക്ഷമായ സാഹചര്യത്തിലാണ് സഹായഹസ്തവുമായി അമേരിക്ക രംഗത്ത് എത്തിയിരിക്കുന്നത്.
ഇതിന്റെ ഭാഗമായി കോവിഷീല്ഡ് വാക്സിന് നിര്മാണത്തിനുള്ള അസംസ്കൃത വസ്തുക്കളുടെ കയറ്റുമതിക്ക് ഏര്പ്പെടുത്തിയിരുന്ന വിലക്ക് അമേരിക്ക കഴിഞ്ഞ ദിവസം പിന്വലിച്ചതായിരുന്നു.
https://www.facebook.com/Malayalivartha
