ഇന്ത്യയിൽ കൊറോണ വൈറസ് അതിശക്തമായി വ്യാപിക്കുമ്പോൾ വൈറസിൻ്റെ ഇന്ത്യൻ വകഭേദത്തെ 17 രാജ്യങ്ങളിൽ കണ്ടെത്തിയെന്ന് ലോകാരോഗ്യ സംഘടന. കൊവിഡിൻ്റെ ഇന്ത്യൻ വകഭേദമായ B.1.617 എന്നറിയപ്പെടുന്ന വൈറസാണ് വിവിധ രാജ്യങ്ങളിൽ കണ്ടെത്തിയിരിക്കുന്നത്.

ഇന്ത്യൻ വൈറസിൻ്റെ ഈ വകഭേദത്തെ വേരിയന്റ്‌സ് ഓഫ് ഇന്ററസ്റ്റ് (VOI) വിഭാഗത്തിലാണ് ലോകാരോഗ്യ സംഘടന ഉൾപ്പെടുത്തിയിരിക്കുന്നത്. B.1.617.1, B.1.617.2 ശ്രേണികള്‍ 2020 ഡിസംബറിലാണ് ഇന്ത്യയില്‍ കണ്ടെത്തിയത്. B.1.617.3 ഇനത്തിന്റെ സാന്നിധ്യം 2020 ഒക്ടോബറില്‍ തന്നെ തിരിച്ചറിഞ്ഞിരുന്നു.

സാർസ്‌കോവ് 2 വൈറസിൻ്റെ ഇന്ത്യൻ വകഭേദമാണ് കൊവിഡിൻ്റെ ഇന്ത്യയിലെ രണ്ടാം തരംഗത്തിന് കാരണമായതെന്ന് അധികൃതർ വിലയിരുത്തി. ഇന്ത്യയിൽ കൊവിഡ് വ്യാപനം രൂക്ഷമായ ഏപ്രിൽ മാസത്തിലാണ് B.1.617 വകഭേദം കൂടുതൽ രാജ്യങ്ങളിൽ എത്തിയത്. ഏപ്രിൽ 27വരെയുള്ള കണക്കുകൾ പ്രകാരം B.1.617 വകഭേദത്തിൻ്റെ 1200 ലധികം വിഭാഗം പതിനേഴോളം എത്തിയത്.

കൊവിഡിന് കാരണമാകുന്ന മറ്റ് വൈറസുകളേക്കാൾ B.1.617ന് വ്യാപന ശേഷി കൂടുതലാണ്. ഇന്ത്യയിലെ കൊവിഡ് വ്യാപനം രൂക്ഷമാക്കിയത് ഈ കാരണം കൊണ്ടാണെന്നാണ് വിലയിരുത്തൽ. അതേസമയം ഇന്ത്യയിൽ വിതരണം ചെയ്യുന്ന കൊവിഡ് വാക്‌സിനുകളായ കൊവിഷീൽഡ്, കൊവാക്‌സിൻ എന്നിവ വൈകഭേദം വന്ന വൈറസുകളെ ചെറുക്കാൻ ശേഷിയുള്ളതാണെന്നും ആരോഗ്യ സംഘടന കണ്ടെത്തിയിട്ടുണ്ട്.