മേലുദ്യോഗസ്ഥർ എല്ലാവരും മോശക്കാരാണെന്ന് പറയുന്നത് ശരിയല്ല. അവരിൽ വളരെ നല്ല മനുഷ്യർ തീർച്ചയായുമുണ്ട്. എന്നാൽ, മോശക്കാരായ ഒരു ന്യൂനപക്ഷത്തിന്റെ പേരിൽ അവരെല്ലാവരും പഴി കേൾക്കേണ്ടി വരുന്നു എന്നത് ഒരു വസ്തുതയാണ്.

ഒരു ശുചീകരണതൊഴിലാളി താൻ വിരമിച്ചതിന് ശേഷം തന്റെ മേലധികാരിക്ക് എഴുതിയ കത്താണ് ഈ വിഷയത്തെക്കുറിച്ച് പുതിയ ചർച്ചകൾക്ക് തിരി കൊളുത്തിയിരിക്കുന്നത്. ആ വനിതാ തൊഴിലാളി തന്നോട് ക്രൂരമായി പെരുമാറിയിട്ടുള്ള മേലുദ്യോഗസ്ഥന് മനസ് തുറന്നുകൊണ്ട് എഴുതിയ കത്ത് ഇപ്പോൾ ഇന്റർനെറ്റിൽ തരംഗമായി മാറിയിരിക്കുകയാണ്.

മേലുദ്യോഗസ്ഥന്റെ ക്രൂരവും മനുഷ്യത്വരഹിതവുമായ മനോഭാവത്തിൽ ആ ശുചീകരണ തൊഴിലാളിക്ക് വലിയ മടുപ്പുണ്ടായിരുന്നു. 35 വർഷക്കാലം വിവിധ ബാങ്കുകളിൽ ശുചീകരണ തൊഴിലാളിയായി ജോലി ചെയ്ത് വിരമിക്കുന്ന അവസരത്തിലെങ്കിലും തന്റെ ദേഷ്യവും നിരാശയും ഒരു കത്തിലൂടെ അറിയിക്കണമെന്ന് അവർ തീരുമാനിക്കുകയായിരുന്നു.

എച്ച് എസ് ബി സി ബാങ്കിലെ തന്റെ അവസാന പ്രവൃത്തി ദിവസത്തിലാണ് അവർ ആ കത്തെഴുതിയത്. ആ കത്തിൽ ജീവനക്കാരോട് ബഹുമാനത്തോടെയും കരുണയോടെയും പെരുമാറണമെന്ന് മേലധികാരിയെ ഓർമിപ്പിക്കുകയാണ് ആ തൊഴിലാളി.

ഓഫീസിൽ വെച്ച് നിങ്ങൾ എന്നെ അധിക്ഷേപിച്ചതിന് ശേഷമാണ് ഞാൻ ജോലി ഉപേക്ഷിക്കുന്നത്. വളരെ ക്രൂരവും ആക്രമണോത്സുകവുമായിരുന്നു നിങ്ങളുടെ പെരുമാറ്റം.

എന്നാൽ, അത് നിങ്ങളുടെ തന്നെ സ്വഭാവത്തിന്റെ പ്രതിഫലനമാണ്. അതുകൊണ്ട് മുന്നോട്ടുള്ള യാത്രയിൽ എല്ലാവരും ഇക്കാര്യം ഓർക്കുക: ലോകത്ത് നിങ്ങൾക്ക് എന്തെങ്കിലും ആവാൻ കഴിയുമെങ്കിൽ ദയാലുവാവുക. കാരണം, നിങ്ങളാരും ഒരു ശുചീകരണ തൊഴിലാളിയേക്കാൾ മികച്ചവരല്ല' - എന്നായിരുന്നു അവർ ആ കത്തിൽ എഴുതിയത്.

വിരമിച്ചു പോരുമ്പോൾ ബാങ്കിൽ നൽകിയ ആ കുറിപ്പിന്റെ ചിത്രം അവരുടെ മകൻ സമൂഹമാധ്യമങ്ങളിൽ പങ്കു വെച്ചതോടെയാണ് ഈ കത്ത് വൈറലായി മാറിയത്. 'ഇതുകൊണ്ടാണ് ഞാൻ അമ്മയെ ഇത്രമാത്രം സ്നേഹിക്കുന്നത്. കഴിഞ്ഞ 35 വർഷമായി അവർ ബാങ്കുകൾ ശുചിയാക്കുകയായിരുന്നു.

ഇന്ന് ആ ക്രൂരനായ മാനേജറിന് ഈ കുറിപ്പ് നൽകിക്കൊണ്ട് അമ്മ ജോലിയിൽ നിന്ന് വിരമിച്ചിരിക്കുന്നു. ഹാപ്പി റിട്ടയർമെന്റ്. എപ്പോഴും ചിരിച്ചു കൊണ്ടിരിക്കുക' - എന്ന ക്യാപ്ഷ്യനോട്‌ കൂടിയാണ് മകൻ ആ കത്ത് സമൂഹ മാധ്യമങ്ങളിൽ പോസ്റ്റ് ചെയ്തത്.