ആസ്‌ട്രേലിയയിലെ ക്രിസ്മസ് ദ്വീപിലെ വര്‍ഷത്തില്‍ ഒരിക്കലുള്ള നവംബര്‍ ഡിസംബര്‍ മാസങ്ങളിലെ ഈ കാഴ്ച അതിമനോഹരമാണ്. ആസ്‌ട്രേലിയയിലെ ക്രിസ്മസ് ദ്വീപിലെ വഴിയോരങ്ങളും കടല്‍ത്തീരവും ചുവന്ന ഞണ്ടുകള്‍ കീഴടക്കിയിരിക്കുകയാണ്. കടലില്‍ നിന്നും കരയിലേക്കും കരയില്‍ നിന്നും കടലിലേക്കുമുള്ള അതിവേഗ യാത്രയിലാണവര്‍.

എല്ലാക്കൊല്ലവും നവംബര്‍ ഡിസംബര്‍ മാസങ്ങളില്‍ ഈ ചുവപ്പന്‍യാത്ര ഇവിടെ പതിവാണ്. ചുവന്ന ഞണ്ടുകളുടെ ഇണചേരല്‍ സമയമാണിത്. മഴക്കാലം കഴിയുന്നതോടെ ഇവ തങ്ങളുടെ പൊത്തില്‍ നിന്നും പതിയെ പുറത്തേക്കിറങ്ങും. ആണ്‍ ഞണ്ടുകളാണ് ആദ്യം പുറത്തിറങ്ങുക. കൂട്ടത്തോടെ അവ യാത്ര തിരിക്കും. അധികം വൈകാതെ പെണ്‍ ഞണ്ടുകളും യാത്ര തുടങ്ങും.

കണക്കുകള്‍ പ്രകാരം ഏതാണ്ട് അഞ്ചു കോടിയോളം ഞണ്ടുകളാണ് ഓരോ വര്‍ഷവും ഈ കാലത്ത് യാത്ര നടത്തുന്നത്. ഇവരുടെ ദേശാടനം തുടങ്ങിയാല്‍ ക്രിസ്മസ് ദ്വീപിലെ എല്ലാ വഴികളും പിന്നീട് ഇവര്‍ക്ക് അവകാശപ്പെട്ടതാണ്. പരിസര പ്രദേശത്തെ എല്ലാ കെട്ടിടങ്ങളും അടച്ചിടും. വിനോദസഞ്ചാരികളെ മറ്റിടങ്ങളിലേക്ക് മാറ്റും. പ്രദേശത്തെ ജനങ്ങളെല്ലാം വീടുകളില്‍ തന്നെ കഴിയേണ്ടി വരും.

അതേസമയം, പ്രധാനപ്പെട്ട റോഡുകളില്‍ അത്യാവശ്യകാര്യങ്ങള്‍ക്കുള്ള യാത്രാസൗകര്യം ഒരുക്കുന്നുണ്ട്. ഞണ്ടുകളെ റോഡില്‍ നിന്നും മാറ്റിയ ശേഷമാണ് യാത്ര അനുവദിക്കുക. അതിന് വേണ്ടി പ്രത്യേക തൊഴിലാളികളെ ഏര്‍പ്പെടുത്തിയിട്ടുണ്ട്. ആസ്‌ട്രേലിയന്‍ ഭരണകൂടം ഏറെ കൗതുകത്തോടെയാണ് ചുവപ്പന്‍ ഞണ്ടുകളുടെ യാത്ര വീക്ഷിക്കുന്നത്.

ആ സമയത്ത് റോഡുകളും പൊതുവഴികളും അടച്ച് അവര്‍ക്ക് ബുദ്ധിമുട്ടുണ്ടാകാതെ നോക്കുന്നു. ഇവയുടെ യാത്ര തുടങ്ങുന്നതോടെ ദ്വീപിലെ ജനങ്ങള്‍ക്ക് പ്രത്യേക മുന്നറിയിപ്പും നല്‍കും. ആദ്യ ദിവസങ്ങളില്‍ പ്രധാന വഴികളിലെല്ലാം വേഗം കുറച്ച് യാത്ര ചെയ്യാന്‍ അറിയിക്കും.

ഈ സമയത്ത് ഇവയെ കൊല്ലാനോ പിടിക്കാനോ പാടില്ല.
വര്‍ഷത്തില്‍ നല്ലൊരു സമയവും വനാന്തരങ്ങളിലെ പൊത്തുകളിലാണ് ഇവ ചെലവഴിക്കുന്നത്. ഇലകളും പൂക്കളും പഴങ്ങളുമൊക്കെയാണ് ഭക്ഷണം. ഇണ ചേര്‍ന്ന് കഴിയുന്നതോടെ ഇവ തിരിച്ച് പൊത്തുകളിലേക്ക് മടങ്ങും. പിന്നെ ഒരു വര്‍ഷത്തെ കാത്തിരിപ്പാണ്. ഈ മനോഹര കാഴ്ച കാണാനായി ലോകത്തിന്റെ വിവിധ ഭാഗങ്ങളില്‍ നിന്നും സഞ്ചാരികള്‍ ഇവിടേക്കെത്തുന്നുണ്ട്.