സമാധാന നോബേല്‍ ജേതാവ് ഡെസ്മണ്ട് പിലൊ ടുട്ടു അന്തരിച്ചു. 90 വയസായിരുന്നു. ദീര്‍ഘകാലമായി അര്‍ബുദബാധിതനായി ചികിത്സയില്‍ കഴിയുകയായിരുന്നു. ഇന്ന് രാവിലെ കേപ് ടൗണിലെ ഒയാസിസ് ഫ്രെയില്‍ കെയര്‍ സെന്ററിലായിരുന്നു മരണം. ദക്ഷിണാഫ്രിക്കന്‍ പ്രസിഡന്റ് സിറില്‍ റമഫോസയാണ് മരണവിവരം പുറത്തുവിട്ടത്. ദക്ഷിണാഫ്രിക്കയെ വിമോചനത്തിലേക്ക് കൊണ്ടുവന്ന പോരാളിയാണ് വിടവാങ്ങിയതെന്ന് അദ്ദേഹം അനുസ്മരിച്ചു.

തെക്കേ ആഫ്രിക്കയിലെ വൈദികനായ അദ്ദേം വര്‍ണ വിവേചനത്തിനെതിരെയുള്ള പോരാട്ടത്തിലൂടെയാണ് ലോകശ്രദ്ധ നേടുന്നത്. 1984 ലാണ് സമാധാനത്തിനുള്ള നൊബേല്‍ സമ്മാനം നേടുന്നത്. നൊബേല്‍ സമ്മാനത്തിന് പുറമെ മാനുഷിക സേവനത്തിനുള്ള ആല്‍ബര്‍ട്ട് ഷ്വിറ്റ്‌സര്‍ സമ്മാനം, 2005 ലെ ഗാന്ധി സമാധാന സമ്മാനം, പ്രസിഡന്‍ഷ്യല്‍ മെഡല്‍ ഓഫ് ഫ്രീഡം എന്നീ പുരസ്‌കാരങ്ങളും നേടിയിട്ടുണ്ട്.