ഓണ്‍ലൈന്‍ സൈറ്റുകളില്‍ നിന്ന് ഓര്‍ഡര്‍ ചെയ്യുന്ന വസ്തുക്കള്‍ വ്യാപകമായി മോഷ്ടിക്കപ്പെടുന്നതായി കണ്ടെത്തല്‍. ഡസന്‍ കണക്കിന് കാറുകളും ഇത്തരത്തില്‍ മോഷ്ടിക്കപ്പെടുന്നു.

ലോസാഞ്ചല്‍സില്‍ നിന്നുള്ള ചരക്ക് ട്രെയിനുകള്‍ നിര്‍ത്തിയിടുമ്പോഴാണ് മോഷണം നടക്കുന്നത്. ആമസോണ്‍ അടക്കമുള്ള ഓണ്‍ലൈന്‍ സൈറ്റുകളില്‍ നിന്ന് വാങ്ങുന്ന സാധനങ്ങളും കാര്‍ഗോയില്‍ നിന്ന് കള്ളന്മാര്‍ കൊണ്ടുപോകുന്നു.



അടുത്തുള്ള തെരുവുകളില്‍ നിന്ന് കുറുക്കുവഴികളിലൂടെ എളുപ്പത്തില്‍ സ്റ്റേഷനിലേക്ക് പ്രവേശിക്കാന്‍ കഴിയും. ആമസോണ്‍, യുപിഎസ്, ഫെഡെക്സ് തുടങ്ങിയ നിരവധി കമ്പനികളാണ് ഇത്തരത്തില്‍ മോഷണത്തിനിരയാകുന്നത്.

ചരക്ക് ട്രെയിനുകള്‍ നിര്‍ത്തുന്നതിനായി മോഷ്ടാക്കള്‍ കാത്തിരിക്കും. തുടര്‍ന്ന് പൂട്ടുകള്‍ തകര്‍ത്ത് ചരക്ക് കണ്ടെയ്നറുകളില്‍ കയറുന്നു. വില്‍ക്കാന്‍ ബുദ്ധിമുട്ടുള്ള സാധനങ്ങളും കൊണ്ടു പോകാന്‍ കഴിയാത്ത സാധനങ്ങളും (കൊവിഡ് 19 ടെസ്റ്റ് കിറ്റുകള്‍, ഫര്‍ണിച്ചറുകള്‍) വില കുറഞ്ഞ ഉല്‍പ്പന്നങ്ങളൊന്നും കൊണ്ടുപോകില്ല. അല്ലാത്തവയാണ് മോഷ്ടിക്കുന്നത്.

ശേഷം ആമസോണിന്റെയും മറ്റും കവറുകള്‍ ട്രാക്കില്‍ ഉപേക്ഷിക്കുകയും ചെയ്യുന്നു. കഴിഞ്ഞ ദിവസം ലോസ് ഏഞ്ചല്‍സിലെ ഒരു റെയില്‍വേ ട്രാക്കില്‍ നിരവധി കവറുകള്‍ പ്രത്യക്ഷപ്പെട്ടു. ഡിസംബര്‍ തൊട്ട് ഇത്തരത്തിലുള്ള മോഷണങ്ങള്‍ ഇരട്ടിയായെന്നാണ് അധികൃതര്‍ പറയുന്നത്. റെയില്‍ ട്രാക്കുകളിലും മറ്റും പൊലീസ് നിരീക്ഷണം ശക്തമാക്കിയിട്ടുണ്ട്.


കഴിഞ്ഞ മൂന്ന് മാസത്തിനിടെ നൂറിലധികം പേരാണ് അറസ്റ്റിലായത്. നിസാര കേസുകളാണ് കുറ്റവാളികള്‍ക്കെതിരെ ചുമത്തുന്നത്. മിക്കപ്പോഴും പിഴയടപ്പിച്ച് ഇരുപത്തിനാല് മണിക്കൂറിനുള്ളില്‍ പുറത്തേക്ക് വിടുകയാണ് ചെയ്യുന്നത്. ഇതാണ് കുറ്റവാളികള്‍ക്ക് വളമാകുന്നതെന്നാണ് പൊതുവേയുള്ള ആക്ഷേപം.