യുക്രൈനില്‍ റഷ്യയ്ക്ക് നേരിടേണ്ടി വരുന്ന ചെറിയൊരു തിരിച്ചടിപോലും വലിയ വാര്‍ത്തയാകുന്നതിന് രണ്ടു കാരണങ്ങളാണ്. ഒന്ന് ഈ യുദ്ധം തുടങ്ങിയത് റഷ്യയായതുകൊണ്ടും രണ്ട് റഷ്യ ലോക രണ്ടാം നമ്പര്‍ സൈന്യമായതുകൊണ്ടുമാണ്. പക്ഷേ ഈ യുദ്ധത്തില്‍ റഷ്യയ്ക്ക് ഏറ്റവും വലിയ തിരിച്ചടിയാകുന്നൊരു സംഭവമാണ് കഴിഞ്ഞ ദിവസം സംഭവിച്ചത്..

ലോകത്തിലെ തന്നെ ഏറ്റവും കരുത്തുറ്റ വ്യോമസേനകളിലൊന്ന് എന്ന വിശേഷണമുള്ള റഷ്യയയുടെ ആയുധപ്പുരയിലെ ഏറ്റവും കരുത്തനായൊരു പോരാളിടെ യുക്രൈന്‍ വ്യോമസേന ചുട്ടെരിച്ചിരിക്കുകയാണ്. റഷ്യയുടെ ഏറ്റവും മാരകശേഷിയുള്ളതും നൂതന സാങ്കേതിക വിദ്യയില്‍ നിര്‍മിതമായ വിമാനമാണ് സുഖോയ് 35. റഷ്യയുടെ വജ്രായുധമെന്ന വിശേഷണവും ഇതിനുണ്ട്. ആ പോര്‍വിമാനത്തെയും യുക്രെയ്ന്‍ സേന വെടിവച്ചു വീഴ്ത്തിയിരിക്കുന്നു. ഇത് റഷ്യയുടെ ആയുധ വ്യാപാരത്തില്‍ ഉണ്ടാക്കാന്‍ പോകുന്നത് വന്‍ വിള്ളലായിരിക്കുമെന്നാണ് പ്രതിരോധ രംഗത്തെ വിദഗ്ദരുടെ അഭിപ്രായം. ഒരു യുദ്ധം എന്നതുപോലെതന്നെ യുക്രൈനിലേത് റഷ്യയുടെ ഒരു ആയുധ എക്‌സിബിഷനായിരുന്നു എന്നത് പല വിദഗ്ദരും ചൂണ്ടിക്കാട്ടിയ കാര്യമാണ്. അങ്ങനെഎങ്കില്‍ ആ എക്‌സിബിഷന്‍ ഈ തിരിച്ചടിയോടെ വന്‍ പരാചയമായി മാറിയിരിക്കുകയാണ്.

കത്തിയെരിഞ്ഞു താഴേക്കു പതിക്കുന്ന ഒരു റഷ്യന്‍ സുഖോയ് 35 വിമാനത്തിന്റെ വിഡിയോ കഴിഞ്ഞ ദിവസം പുറത്തുവന്നിരുന്നു. യുക്രെയ്ന്‍ എയര്‍ഫോഴ്‌സ് വിമാനത്തില്‍ നിന്നുള്ള മിസൈല്‍ ഏറ്റായിരുന്നു ഈ വിമാനം വീണത്. ശക്തി കൊണ്ട് റഷ്യയ്ക്കു മുന്‍പില്‍ ഒന്നുമല്ലെങ്കിലും യുക്രെയ്ന്‍ വ്യോമസേനയ്ക്കും പ്രഹരശേഷിയുണ്ടെന്നു വെളിവാക്കുന്നതായി ഈ സംഭവം.

റഷ്യയുടെ ഏറ്റവും വികസിതമായ എയര്‍ക്രാഫ്റ്റാണ് സുഖോയ് 35. സിംഗിള്‍ സീറ്റ്, മള്‍ട്ടിറോള്‍ ഗണത്തില്‍ പെടുന്ന ഈ എയര്‍ക്രാഫ്റ്റിന്റെ സാങ്കേതികമായ പുരോഗതി മൂലം ഇതിനെ ഫോര്‍ത്ത് ജനറേഷന്‍ പ്ലസ് പ്ലസ് എയര്‍ക്രാഫ്റ്റ് എന്നു വിശേഷിപ്പിക്കാറുണ്ട്. ശബ്ദത്തിന്റെ 2.25 മടങ്ങ് വേഗം ഈ എയര്‍ക്രാഫ്റ്റിന് 36000 അടി പൊക്കത്തില്‍ കൈവരിക്കാം. 8000 കിലോ ആയുധങ്ങള്‍ വഹിക്കാന്‍ ശേഷിയുള്ള ഇതിന്റെ റേഞ്ച് 1600 കിലോമീറ്ററാണ്. ഇത്രയും വികസിപ്പിക്കപ്പെട്ട ഒരു എയര്‍ക്രാഫ്റ്റിനെയാണു യുക്രെയ്ന്‍ യുദ്ധവിമാനം വെടിവച്ചിട്ടത്. സുഖോയ് 35 വിമാനത്തിനു സ്റ്റെല്‍ത്ത് ഇല്ല എന്ന ന്യൂനത മുതലെടുത്തായിരുന്നു യുക്രെയ്‌ന്റെ ആക്രമണമെന്നു വിലയിരുത്തപ്പെടുന്നു.

ഇത്രയും കരുത്തുറ്റ റഷ്യന്‍ വ്യോമസേനയെ മിഗ് 29, സുഖോയ് 27 തുടങ്ങിയ ശക്തി കുറഞ്ഞതും താരതമ്യേന പഴഞ്ചനുമായ യുദ്ധവിമാനങ്ങള്‍ ഉപയോഗിച്ച് തങ്ങള്‍ എങ്ങനെയാണ് നേരിട്ടതെന്ന് ജ്യൂസ് എന്ന കൃത്രിമപ്പേരുള്ള ഒരു യുക്രെയ്‌നിയന്‍ പൈലറ്റ് നല്‍കുന്ന വിവരങ്ങള്‍ ശ്രദ്ധ നേടുന്നുണ്ട്.

ആകാശത്തു നിന്നു ഭൂമിയിലേക്കുള്ള ആക്രമണണാണ് മിഗ് 29 യുദ്ധവിമാനങ്ങള്‍ പൊതുവെ നടത്തുന്നത്. ആകാശത്തു തന്നെ ഒരു യുദ്ധവിമാനത്തില്‍ നിന്നു മറ്റൊരു യുദ്ധവിമാനത്തിലേക്കുള്ള ആക്രമണമാണ് സുഖോയ് 27 യുദ്ധവിമാനങ്ങള്‍ നടത്തുന്നത്. സുഖോയ് 27 വിമാനങ്ങള്‍ കൂടുതല്‍ കരുത്തുറ്റതാണെങ്കിലും ഇവയുടെ എണ്ണം യുക്രെയ്ന്‍ വ്യോമസേനയില്‍ കുറവാണ്.

യുഎസ് വ്യോമസേനയുമായി സഹകരിച്ച് നടത്തിയ ക്ലിയര്‍ സ്‌കൈ എന്നു പേരുള്ള സൈനികാഭ്യാസങ്ങള്‍ യുക്രെയ്ന്‍ വ്യോമസേനയ്ക്ക് വളരെ ഗുണപരമായ പാഠങ്ങള്‍ നല്‍കിയിരുന്നെന്നു ജ്യൂസ് പറയുന്നു. യുഎസിന്റെ എഫ് 15 വിമാനങ്ങളുമായിട്ടായിരുന്നു ഈ അഭ്യാസങ്ങള്‍. പോളണ്ടിന്റെ വ്യോമസേനയും ഇതില്‍ പങ്കു ചേര്‍ന്നിരുന്നു.

യുദ്ധത്തിനു മുന്‍പ് നടന്ന ഈ വ്യോമാഭ്യാസം യുക്രെയ്ന്‍ ഇതുവരെ പങ്കെടുത്തിട്ടുള്ള ഏറ്റവും വലിയ എക്‌സര്‍സൈസായിരുന്നു. നാറ്റോ യുദ്ധമുറകളെക്കുറിച്ചുള്ള അവബോധവും ക്ലിയര്‍ സ്‌കൈ യുക്രെയ്‌നു നല്‍കി. റഷ്യന്‍ യുദ്ധവിമാനങ്ങളുടെ ശേഷികളും രീതികളും അനുകരിച്ചു മാറ്റങ്ങള്‍ വരുത്തിയായിരുന്നു എഫ് 15 വിമാനങ്ങള്‍ അഭ്യാസത്തില്‍ പങ്കെടുത്തത്. എന്നാല്‍ ഇതിനനുസരിച്ച് തന്നെ പ്രകടനങ്ങള്‍ നടത്താന്‍ യുക്രെയ്ന്‍ വ്യോമസേനയ്ക്കും കഴിഞ്ഞു. തങ്ങളുടെ ദൗര്‍ബല്യങ്ങള്‍ എന്തൊക്കെയാണെന്നു മനസിലാക്കാനും ഇവ മൂലം യുക്രെയ്ന്‍ വ്യോമസേനയ്ക്കു സാധിച്ചു.

സുഖോയ് 24 ഫെന്‍സര്‍ എന്ന മറ്റൊരു യുദ്ധവിമാനവും യുക്രെയ്ന്‍ വ്യോമസേനയ്ക്കുണ്ട്. എന്നാല്‍ എണ്ണം കുറവായതിനാല്‍ ഇതിന്റെ സേവനങ്ങള്‍ വേണ്ടവിധം ഉപയോഗിക്കാന്‍ കഴിയുന്നില്ലെന്നും ജ്യൂസ് പറയുന്നു.