ഗുഡ് ബൈ ഇമ്രാന്; സുപ്രീം കോടതിയും കൈവിട്ടു; ഇനി വേദനയോടെ പടിയിറക്കം; ഇമ്രാന് പുറത്തേയ്ക്കുള്ള വഴി തുറന്ന് സുപ്രീംകോടതി
പാക്ക് സര്ക്കാരിനെതിരായ അവിശ്വാസ പ്രമേയം അവതരിപ്പിക്കാന് പ്രതിപക്ഷത്തിന് അനുമതി നല്കാത്ത ദേശീയ അസംബ്ലി ഡെപ്യൂട്ടി സ്പീക്കര് ഖാസിം ഖാന് സൂരിയുടെ നടപടി തെറ്റാണെന്ന് പാകിസ്ഥാന് ചീഫ് ജസ്റ്റിസ്. നടപടി ഭരണഘടനയുടെ 95ാ മത്തെ ആര്ട്ടിക്കിളിന്റെ ലംഘനമാണെന്ന് വ്യക്തമാക്കിയ ചീഫ് ജസ്റ്റിസ് ഉമര് അതാ ബന്ദിയാല്. നടപടി റദ്ദാക്കി പാര്ലമെന്റ് പിരിച്ചുവിട്ട നടപടിക്കെതിരെ സമര്പ്പിക്കപ്പെട്ട ഹര്ജികളില് വാദം കേള്ക്കെയാണ് കോടതി സുപ്രധാന നിരീക്ഷണം നടത്തിയത്.
ഈ മാസം ആദ്യമാണ് പ്രതിപക്ഷത്തിന്റെ അവിശ്വാസ പ്രമേയം ഡെപ്യൂട്ടി സ്പീക്കര് തള്ളുകയും തിരഞ്ഞെടുപ്പ് നേരത്തേ നടത്താനായി ദേശീയ അസംബ്ലി പ്രസിഡന്റ് പിരിച്ചുവിടുകയും ചെയ്തത്. ഇമ്രാന് ഖാനെ ചുഴറ്റി എറിയുമെന്ന് കരുതിയ അവിശ്വാസ പ്രമേയം ദേശീയ അസംബ്ലിയില് ഡെപ്യൂട്ടി സ്പീക്കര് ഖാസിം സുര് ഭരണഘടനാവിരുദ്ധമായി പ്രഖ്യാപിച്ച് തള്ളുകയായിരുന്നു. പിന്നാലെ ഇമ്രാന് ഖാന്റെ ഉപദേശ പ്രകാരം പാക് പ്രസിഡന്റ് ഡോ. ആരിഫ് അല്വി ദേശീയ അസംബ്ലി പിരിച്ചു വിടുകയായിരുന്നു.
ഡെപ്യൂട്ടി സ്പീക്കറുടെ നടപടി സുപ്രീംകോടതി റദ്ദാക്കിയതോടെ ഇമ്രാന് ഖാന് കനത്ത തിരിച്ചടിയാണുണ്ടായിരിക്കുന്നത്. പ്രശ്നത്തില് ഇടക്കാല ഉത്തരവ് വേണമെന്ന ആവശ്യം കഴിഞ്ഞ ദിവസം സുപ്രീം കോടതി നിരാകരിച്ചിരുന്നു. പ്രതിപക്ഷം ഹര്ജിയില് ഉന്നയിച്ച കാര്യങ്ങളില് വിശദമായ വാദം കേട്ടശേഷം വിധിപറയാം എന്നാവ്യക്തമാക്കിയ കോടതി വിധിപ്രസ്ഥാവം ഇന്നുതന്നെ നടത്തി.
തന്നെ പുറത്താക്കാന് ഭൂരിപക്ഷമുള്ള പ്രതിപക്ഷത്തെ ഞെട്ടിച്ചാണ് ഇമ്രാന് അവിശ്വാസ പ്രമേയത്തിന്റെ കഥ കഴിക്കാനും ദേശീയ അസംബ്ലി പിരിച്ചുവിടാനും കരുക്കള് നീക്കിയത്. അവിശ്വാസ പ്രമേയം ചര്ച്ചയ്ക്ക് പരിഗണിക്കുകപോലും ചെയ്യാതെ ഡെപ്യൂട്ടി സ്പീക്കര് തള്ളുകയായിരുന്നു. ഇതോടെ അവിശ്വാസ വോട്ടെടുപ്പില് പരാജയപ്പെട്ട് പുറത്താവുകയോ,? അതിനു മുമ്പ് രാജിവയ്ക്കുകയോ ചെയ്യുന്നതിന്റെ നാണക്കേട് ഒഴിവാക്കാമെന്നും പാര്ലമെന്റ് പിരിച്ചുവിട്ട് തന്റെ കെയര്ടേക്കര് ഭരണത്തില് തിരഞ്ഞെടുപ്പ് നടത്താമെന്നുമുള്ള കണക്കുകൂട്ടലിലാണ് ഇമ്രാന് കരുക്കള് നീക്കിയത്. കാലാവധിക്കുമുമ്പ് ദേശീയ അസംബ്ലി പിരിച്ചുവിട്ടാല് 90 ദിവസത്തിനകം തിരഞ്ഞെടുപ്പ് നടത്തണം.
https://www.facebook.com/Malayalivartha
