ഇരു രാജ്യങ്ങള്‍ക്കുമിടയില്‍ വെടിനിര്‍ത്തലിനുള്ള മറ്റൊരു സാധ്യത റഷ്യ എത്രമാത്രം ക്ഷീണിക്കുമെന്നതിനെ ആശ്രയിച്ചിരിക്കും. റഷ്യയ്ക്കു യുദ്ധം തുടരാന്‍ താല്‍പര്യമില്ലാതായാല്‍, അല്ലെങ്കില്‍ യുദ്ധം തുടരാനുള്ള ശേഷിയില്ലാതായാല്‍, പുതിയ സ്ഥലങ്ങളിലേക്കു കടന്നുകയറുന്നത് അവര്‍ പതിയെ അവസാനിപ്പിച്ചേക്കും. യുദ്ധത്തിന്റെ തീവ്രത കുറയുകയും വെടിനിര്‍ത്തല്‍ കരാറുകള്‍ നിലവില്‍ വരികയും ചെയ്‌തേക്കാം.

എന്നാല്‍, സാമ്പത്തിക ഉപരോധങ്ങളിലൂടെ റഷ്യയെ ക്ഷീണിപ്പിക്കാനുള്ള ശ്രമങ്ങള്‍ അത്ര വിജയിച്ച മട്ടില്ല. യുക്രെയ്‌നിലേക്കു റഷ്യ കടന്നുകയറിയതിനു പിന്നാലെ തകര്‍ന്നടിഞ്ഞ റഷ്യന്‍ കറന്‍സി റൂബിളിപ്പോള്‍ ഏഴു വര്‍ഷത്തെ ഏറ്റവും മികച്ച നിലയിലേക്കു തിരിച്ചെത്തിയിരിക്കുന്നു. റഷ്യയിലെ പലിശനിരക്കുകള്‍ സാധാരണ നിലയിലാകുകയും ചെയ്തു. യുദ്ധത്തിന്റെ പശ്ചാത്തലത്തിലെ എണ്ണവിലക്കയറ്റം മറ്റു ചില രാജ്യങ്ങളെപ്പോലെ റഷ്യയ്ക്കും ആശ്വാസകരമാണ്. സൈനികമായും റഷ്യ തകര്‍ച്ചയിലല്ല.

പക്ഷേ, ഒരു രാജ്യത്തിനും യുദ്ധം അനന്തമായി നീട്ടിക്കൊണ്ടുപോകുന്നത് എളുപ്പമാവില്ലല്ലോ. റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന് യുക്രെയ്‌നിന്റെ കൂടുതല്‍ പ്രദേശങ്ങളിലേക്കു കടന്നുകയറാന്‍ താല്‍പര്യമുണ്ടെങ്കിലും റഷ്യന്‍ സേന യുദ്ധത്താല്‍ തകര്‍ന്നിരിക്കുകയാണെന്നാണ് യുഎസ് ഇന്റലിജന്‍സ് കേന്ദ്രങ്ങളുടെ വിലയിരുത്തലെന്നു റിപ്പോര്‍ട്ടുണ്ട്.

റഷ്യ ആക്രമണം സ്വമേധയാ മതിയാക്കുന്നു എന്നതാണു യുദ്ധത്തിന്റെ തീവ്രത കുറച്ചേക്കാവുന്ന ആദ്യ സാധ്യത. ലക്ഷ്യമിട്ടത് കൈവരിച്ചെന്നു തോന്നിയാല്‍ റഷ്യ ആക്രമണ തീവ്രത കുറച്ചേക്കാം. ഡോണ്‍ബാസ് അടങ്ങുന്ന കിഴക്ക്, തെക്ക് മേഖലകള്‍ കേന്ദ്രീകരിച്ചാണു നിലവില്‍ പോരാട്ടം. ഡോണ്‍ബാസിന്റെ 75 ശതമാനം നിലവില്‍ റഷ്യയുടെ കീഴിലാണെന്നാണു സൂചന. ലുഹാന്‍സ്‌ക് മേഖല പൂര്‍ണമായും ഡോണ്‍ടെസ്‌ക് മേഖല ഭാഗികമായും റഷ്യയുടെ കീഴിലാണ്. മേയില്‍തന്നെ തെക്കന്‍മേഖലയിലെ മരിയുപോള്‍ റഷ്യയുടെ നിയന്ത്രണത്തിലായിരുന്നു. യുക്രെയ്‌നിലുള്ളില്‍, റഷ്യയ്ക്കു സംരക്ഷണം തീര്‍ക്കാനെന്നോണം ഒരു വലിയ മതില്‍ ഇതിനകം പണിതെന്നു ചുരുക്കം. ഈ മതില്‍കൊണ്ട് റഷ്യ മതിയാക്കിയാല്‍ സമാധാനത്തിന്റെ ചില വാര്‍ത്തകള്‍ നമ്മെ തേടിയെത്തിയേക്കാം.

ഫെബ്രുവരി 24ന് ആയിരുന്നു യുക്രെയ്‌നിലേക്കുള്ള റഷ്യയുടെ കടന്നുകയറ്റം. അഫ്ഗാന്‍ സൈന്യത്തെ താലിബാന്‍ കീഴടക്കിയപോലെ അതിവേഗം റഷ്യയ്ക്കു മുന്നില്‍ യുക്രെയ്ന്‍ തകരുമെന്നു പ്രവചിച്ചവരുണ്ട്. പക്ഷേ, അതു സംഭവിച്ചില്ല. റഷ്യയുടെ വന്‍ സന്നാഹങ്ങളോട് ആത്മധൈര്യവും പശ്ചാത്തരാജ്യങ്ങളുടെ സൈനികസഹായവും കൈമുതലാക്കി യുക്രെയ്ന്‍ എതിരിട്ടുനിന്നു. തീരാത്ത പോരായി ഓരോ ദിവസവും റഷ്യയുക്രെയ്ന്‍ യുദ്ധം കനത്തു. ഒപ്പം ലോകമാകെ പടരുന്ന പ്രതിസന്ധിയും.

യുദ്ധം എന്നു തീരുമെന്നതിന് വ്യത്യസ്തമായ അഭിപ്രായമാണ് വിദഗ്ധര്‍ക്കുള്ളത്. വര്‍ഷങ്ങളോളം നീണ്ടുനില്‍ക്കുമെന്ന് നാറ്റോ സെക്രട്ടറി ജനറല്‍ ജെന്‍സ് സ്റ്റോള്‍ട്ടന്‍ബര്‍ഗ് മുന്നറിയിപ്പ് നല്‍കുമ്പോള്‍ യുദ്ധം അനന്തമായി തുടരാനുള്ള ശേഷി റഷ്യക്കുണ്ടാവില്ലെന്ന് മറ്റുപലരും പ്രവചിക്കുന്നു. മാസങ്ങള്‍ക്കകം യുദ്ധത്തില്‍നിന്നു പിന്‍മാറാന്‍ റഷ്യ നിര്‍ബന്ധിതരാകുമെന്നാണ് ഇവരുടെ പ്രതീക്ഷ. പക്ഷേ, പ്രതീക്ഷകളെല്ലാം തെറ്റിച്ചായിരുന്നല്ലേ റഷ്യ, യുക്രെയ്‌നുമേല്‍ കടന്നുകയറിയത്.