ഫ്‌ളാറ്റിലെ ലിവിങ് റൂമിലെ സോഫയില്‍ ശരീരാവശിഷ്ടങ്ങള്‍... അമ്പത്തിയെട്ടുകാരിയുടെ മൃതദേഹം ആരുമറിയാതെ ഫ്ളാറ്റിനുള്ളില്‍ കിടന്നത് രണ്ട് വര്‍ഷത്തോളം....

ഷീല സെലിയോന്‍ എന്ന ലണ്ടന്‍ സ്വദേശിനിയുടെ മൃതദേഹമാണ് രണ്ട് വര്‍ഷത്തോളം റൂമിനുള്ളിലിരുന്നത്. മാത്രമല്ല ഷീലയുടെ അസ്ഥികൂടം കണ്ടെത്തുന്നതുവരെ അവര്‍ താമസിച്ചിരുന്ന ഫ്‌ളാറ്റിന് ഹൗസിങ് അസ്സോസിയേഷന്‍ വാടക കൈപറ്റിയിരുന്നതായും റിപ്പോര്‍ട്ടുകളുണ്ട്.

പെക്കാമിലെ ഫളാറ്റിലെ ലിവിങ് റൂമിലെ സോഫയിലാണ് ഇക്കഴിഞ്ഞ ഫെബ്രുവരിയില്‍ ഷീലയുടെ ശരീരാവശിഷ്ടങ്ങള്‍ കണ്ടെത്തിയത്. ദന്തസംബന്ധമായ രേഖകളുടെ അടിസ്ഥാനത്തിലാണ് ഫ്‌ളാറ്റില്‍ നിന്ന് കണ്ടെത്തിയ ഭൗതികാവശിഷ്ടങ്ങള്‍ ഷീലയുടേതാണെന്ന് തിരിച്ചറിഞ്ഞത്. തങ്ങളുടെ ഭാഗത്ത് നിന്നുണ്ടായ വീഴ്ചയില്‍ ഹൗസിങ് സൊസൈറ്റി ഖേദം പ്രകടിപ്പിച്ചു.

ശരീരാവശിഷ്ടങ്ങളുടെ കാലപ്പഴക്കം മൂലം ഷീലയുടെ മരണകാരണം കണ്ടെത്തുക അസാധ്യമാണെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. ഇവര്‍ക്ക് ഉദരസംബന്ധമായ ഗുരുതരരോഗമുണ്ടായിരുന്നതായി ലണ്ടനിലെ സൗത്ത് കൊറോണര്‍ കോടതി വ്യക്തമാക്കി. 'എല്ലാ മരണവും ദുഃഖകരമാണെന്നും ആരുമറിയാതെ രണ്ട് കൊല്ലത്തോളം മരിച്ചുകിടക്കുക എന്നതും അതിന്റെ കാരണം 2022ല്‍ കണ്ടെത്തുക എന്നതും അതിലേറെ ദുഷ്‌കരമാണെന്നും അന്വേഷണ സംഘത്തിലെ ഉന്നത ഉദ്യോഗസ്ഥനായ ജൂലിയന്‍ മോറിസ് പ്രതികരിക്കുകയുണ്ടായി.

ജനവാസകേന്ദ്രത്തിലെ ഒരു ഫ്‌ളാറ്റില്‍ ദീര്‍ഘകാലത്തോളം ഷീലയുടെ ആരുമറിയാതെ മൃതശരീരം കിടന്നതിനാലാണ് ഈ കേസ് ഇത്രയേറെ വാര്‍ത്താപ്രാധാന്യം നേടാന്‍ കാരണമായത്. 2019 ഓഗസ്റ്റിലാണ് ഷീലയെ അവസാനമായി ജീവനോടെ കണ്ടതെന്ന് അന്വേഷണത്തില്‍ കണ്ടെത്തി. ഡോക്ടറെ കാണാന്‍ പോയതാണെന്നും സ്ഥിരീകരിക്കുകയും ചെയ്തിട്ടുണ്ട്.

ഫ്ളാറ്റിലെ താമസക്കാരി മരിച്ച വിവരമറിയാനായി വൈകിയതില്‍ ഹൗസിങ് സൊസൈറ്റിക്കെതിരെ പ്രതിഷേധമുയര്‍ന്നിരുന്നു. ഷീലയുടെ മറ്റ് വരുമാനങ്ങളില്‍ നിന്നാണ് ഹൗസിങ് സൊസൈറ്റി വാടകയീടാക്കിയിരുന്നത്.

2020 ജൂലായില്‍ ഇവരുടെ ഗ്യാസ് കണക്ഷന്‍ സൊസൈറ്റി വിച്ഛേദിച്ചിരുന്നു. ഷീലയെ തിരഞ്ഞ് സമീപവാസികള്‍ ഹൗസിങ് സൊസൈറ്റിയേയും പോലീസിനേയും സമീപിച്ചിരുന്നെങ്കിലും ഷീലയെ കണ്ടതായുള്ള ചില മൊഴികളും മറ്റും പോലീസിനെ തുടരന്വേഷണത്തില്‍ നിന്ന് പിന്തിരിപ്പിച്ചതായും പ്രമുഖമാധ്യമങ്ങളുടെ റിപ്പോര്‍ട്ടുകളുണ്ട്.