ആല്‍ക്കഹോളിന്റെ സാന്നിദ്ധ്യമുള്ള എല്ലാ വസ്തുക്കളും രാജ്യത്തേയ്ക്ക് കൊണ്ടു വരുന്നതിന് ഇനി മുതല്‍ വിലക്കേര്‍പ്പെടുത്തിയിട്ടുണ്ട്. ഇറാഖില്‍ പുതുതായി പ്രഖ്യാപിച്ച മദ്യ നിരോധനത്തിനെതിരെ രാഷ്ട്രീയ പാര്‍ട്ടികളുടെ നേതൃത്വത്തില്‍ പ്രതിഷേധം. മദ്യനിരോധനം ലംഘിച്ചാല്‍ കനത്ത പിഴയ്ക്കും ഉത്തരവിട്ടിട്ടുണ്ട്. വിലക്ക് ലംഘിക്കുന്നവര്‍ക്ക് 7,700 ഡോളര്‍ മുതല്‍ 19,000 ഡോളര്‍ വരെയാണ് പിഴ അടയ്‌ക്കേണ്ടി വരിക.

മദ്യത്തിന്റെ ഇറക്കുമതി, നിര്‍മാണം, വില്‍പ്പന എന്നിവ നിരോധിച്ച നടപടിയ്ക്ക് എതിരെയാണ് രാജ്യത്തെ ക്രിസ്ത്യന്‍ വിഭാഗം അടക്കം പ്രതിഷേധം കടുപ്പിക്കുന്നത്. പൊതു സ്ഥലത്ത് നിന്ന് മദ്യപിക്കുന്നതിന് വിലക്ക് നിലനിന്നിരുന്ന രാജ്യമാണ് ഇറാഖ്. എന്നാല്‍ അത് വരെയുണ്ടായിരുന്ന മറ്റ് ആനുകൂല്യങ്ങള്‍ പൂര്‍ണമായും വിലക്കിക്കൊണ്ടാണ് പുതിയ മദ്യനയം നിലവില്‍ വന്നത്. 2016ല്‍ പാസാക്കിയ നിയമമാണ് ഇപ്പോള്‍ പ്രാബല്യത്തില്‍ വന്നത്.

നിയമത്തിനെതിരെ രാജ്യത്ത് ബിവറേജസ് ഷോപ്പുകള്‍ നടത്തുന്നതും ക്രിസ്ത്യന്‍ വിഭാഗവും രംഗത്ത് വന്നിരുന്നു. രാജ്യത്തെ കരിഞ്ചന്തക്കാരെ സഹായിക്കാനാണ് ഭരണകൂടം മദ്യനിരോധനം നടപ്പിലാക്കിയതെന്നാണ് പ്രതിഷേധിക്കുന്നവരുടെ ആരോപണം. ഇറാഖിലെ മുസ്ലീം ഇതര മതവിഭാഗങ്ങളുടെ അവകാശങ്ങള്‍ ഉയര്‍ത്തികാട്ടി ക്രിസ്ത്യന്‍ വിഭാഗങ്ങളില്‍ നിന്നടക്കമുള്ള രാഷ്ട്രീയ പ്രവര്‍ത്തകര്‍ നിയമത്തിനെതിരെ ശക്തമായ പ്രതിഷേധം നടത്തുന്നുണ്ട്.