ഗൂഢതന്ത്രത്തിന്റെ പിന്നിലെന്ത്? ഇന്ത്യയുടെ ഭീകരപ്പട്ടികയിലുള്ള ഖലിസ്ഥാന് നേതാവ് ഹര്ദീപ് സിങ് നിജ്ജാറിനെ കാനഡയില് കൊലപ്പെടുത്തിയത് പാക്കിസ്ഥാന് ചാരസംഘടനയായ ഐഎസ്ഐ ആണെന്ന വാദം തള്ളി ഇന്ത്യ; ശ്രദ്ധതിരിക്കാന് ഗൂഢതന്ത്രമെന്ന് നിഗമനം
ഇന്ത്യ കാനഡ ബന്ധം ഉലയുമ്പോള് മറ്റൊരു വാദം കൂടി ഇന്ത്യ തള്ളുകയാണ്. ഇന്ത്യയുടെ ഭീകരപ്പട്ടികയിലുള്ള ഖലിസ്ഥാന് നേതാവ് ഹര്ദീപ് സിങ് നിജ്ജാറിനെ കാനഡയില് കൊലപ്പെടുത്തിയത് പാക്കിസ്ഥാന് ചാരസംഘടനയായ ഐഎസ്ഐ ആണെന്ന വാദം ഇന്ത്യന് ഇന്റലിജന്സ് വിദഗ്ധര് തള്ളി.
ചില പാശ്ചാത്യരാജ്യങ്ങള് ഇന്ത്യാവിരുദ്ധ സംഘടനകള്ക്കു താവളമാകുന്നതിനെക്കുറിച്ച് ഇന്ത്യ ഉയര്ത്തിയ ആശങ്കയില്നിന്നു ശ്രദ്ധതിരിക്കാനാണ് ഐഎസ്ഐയുടെ പങ്കെന്ന വാദമുന്നയിക്കുന്നതെന്നാണു വിലയിരുത്തല്. നിജ്ജാര് സംഭവം ഇന്ത്യ കാനഡ പ്രശ്നമായിരിക്കെ, അതിനെ ഇന്ത്യപാക്കിസ്ഥാന് പ്രശ്നമാക്കി ചുരുക്കാനുള്ള ശ്രമമാണിതെന്നു വിദഗ്ധര് അഭിപ്രായപ്പെടുന്നു.
പാക്ക് ബന്ധമുള്ള ഖലിസ്ഥാന് ടൈഗര് ഫോഴ്സിന്റെ (കെടിഎഫ്) തലവനായിരുന്നു നജ്ജാര്. പഞ്ചാബിലെ ഒട്ടേറെ ഗുണ്ടാസംഘങ്ങളെ കാനഡയിലിരുന്നു നിയന്ത്രിച്ചു. നിജ്ജാര് ഇന്ത്യാവിരുദ്ധ പ്രവര്ത്തനങ്ങളാണു നടത്തിക്കൊണ്ടിരുന്നതെങ്കില് പിന്നെന്തിന് ഐഎസ്ഐ അയാളെ ഇല്ലാതാക്കണമെന്ന ചോദ്യം ഉയരുന്നു.
ഇന്ത്യയെയും കാനഡയെയും തമ്മില് തെറ്റിക്കാനാണത് എന്ന യുക്തിയാണ് ഐഎസ്ഐ ബന്ധം ഉന്നയിക്കുന്ന റിപ്പോര്ട്ടുകള് മുന്നോട്ടുവയ്ക്കുന്നത്. കാനഡയിലെ സായുധസംഘങ്ങള് തമ്മിലുള്ള കുടിപ്പകയാണു നിജ്ജാറിന്റെ കൊലയില് അവസാനിച്ചതെന്നാണ് ഇന്ത്യയുടെ കണ്ടെത്തല്.
ഈ സംഘങ്ങളുടെ കുടിപ്പക വളര്ന്നു കാനഡയ്ക്കുതന്നെ വലിയ തലവേദനയായിത്തീരുമെന്ന് ഇന്ത്യ പലവട്ടം മുന്നറിയിപ്പു നല്കിയതാണ്. പക്ഷേ, അവര് അതു ഗൗരവത്തിലെടുത്തില്ല എന്ന് ഒരു ഇന്ത്യന് സുരക്ഷാ ഉദ്യോഗസ്ഥന് പറഞ്ഞു. നിജ്ജാറിന്റെയും മറ്റു ഖലിസ്ഥാന്വാദി നേതാക്കളുടെയും നിയമവിരുദ്ധപ്രവര്ത്തനങ്ങള് സംബന്ധിച്ച രേഖകളെല്ലാം ഇന്ത്യ കാനഡയുടെ സുരക്ഷാ ഏജന്സികള്ക്കു യഥാസമയം കൈമാറിയിരുന്നു. അവര് അതെല്ലാം അവഗണിച്ചു.
ഇന്ത്യ കാനഡ നയതന്ത്ര ബന്ധം വഷളാകുന്നതിനിടെ നിലപാട് മയപ്പെടുത്തി കനേഡിയന് പ്രധാനമന്ത്രി ജസ്റ്റിന് ട്രൂഡോ. ഇന്ത്യയുമായുള്ള ബന്ധം കൂടുതല് ദൃഢമാകുമെന്നും, വികസന നയങ്ങളില് ഒന്നിച്ച് നീങ്ങുമെന്നും ജസ്റ്റിന് ട്രൂഡോ വ്യക്തമാക്കി. അതേസമയം, ഇന്ത്യ - കാനഡ തര്ക്കം ഇന്ത്യ അമേരിക്ക ബന്ധത്തെ ബാധിക്കില്ലെന്ന് ജയശങ്കര് - ആന്റണി ബ്ലിങ്കന് കൂടിക്കാഴ്ചയില് ധാരണയായെന്നാണ് വിവരം.
ഖലിസ്ഥാന് ഭീകരന് ഹര്ദീപ് സിംഗ് നിജ്ജറിന്റെ കൊലപാതകത്തില് ഇന്ത്യക്ക് പങ്കുണ്ടെന്ന് തുറന്ന് പറഞ്ഞ ട്രൂഡോ അയയുകയാണ്. കാനഡയും സഖ്യകക്ഷികളും എന്നും ഇന്ത്യയുമായി നല്ല ബന്ധം തുടരാന് ആഗ്രഹിക്കുന്നുവെന്ന് ട്രൂഡോ വ്യക്തമാക്കി. വളരുന്ന സാമ്പത്തിക ശക്തിയാണ് ഇന്ത്യയെന്നും ഇന്ത്യയ്ക്കൊപ്പം ക്രിയാത്മകമായും ഗൗരവത്തോടെയും നീങ്ങുമെന്നുമാണ് പുതിയ നിലപാട്. അതേസമയം നിജ്ജര് കൊലപാതകവുമായി ബന്ധപ്പെട്ട് കാനഡ നടത്തുന്ന അന്വേഷണത്തോട് ഇന്ത്യ സഹകരിക്കുമെന്നാണ് പ്രതീക്ഷയെന്നും മാധ്യമങ്ങളെ കണ്ട ട്രൂഡോ പറഞ്ഞു.
നിജ്ജര് കൊലപാതകത്തിലെ അതൃപ്തി ജി 20 ഉച്ചകോടിക്കിടെ പ്രധാനമന്ത്രി നരേന്ദ്രമോദിയെ നേരിട്ടറിയിച്ച ട്രൂഡോ, കനേഡിയന് പാര്ലമെന്റിലാണ് ഇന്ത്യന് ഏജന്സികള്ക്ക് പങ്കുണ്ടെന്ന് തുറന്നടിച്ചത്. പ്രതികരണത്തില് പാകിസ്ഥാനും അമേരിക്കയും അനുകൂല പ്രതികരണം നടത്തിയതൊഴിച്ചാല് മറ്റ് രാജ്യങ്ങളെല്ലാം മൗനം പാലിച്ചു. എന്നാല് നയതന്ത്ര ബന്ധം വഷളാക്കിയ ട്രൂഡോക്കെതിരെ പരക്കെ വിമര്ശനം ഉയരുകയും ചെയ്തു. ഏറ്റവും ഒടുവില് കാനഡ തീവ്രവാദികളുടയും, കൊലപാതകികളുടെയും സ്വര്ഗമാണെന്ന് ബംഗ്ലാദേശ് വിദേശകാര്യമന്ത്രി അബ്ദുള് മേമന് രൂക്ഷവിമര്ശനമുയര്ത്തുകയും ചെയ്തു. യുഎന് ജനറല് അസംബ്ലിയിലടക്കം വിഷയം ചര്ച്ചയാകുമെന്ന കാനഡയുടെ പ്രതീക്ഷയും പാളി.
അതേസമയം, കഴിഞ്ഞ രാത്രി നടന്ന വിദേശകാര്യമന്ത്രി എസ് ജയശങ്കര്, യുഎസ് വിദേശകാര്യ സെക്രട്ടറി ആന്റണി ബ്ലിങ്കന് കൂടിക്കാഴ്ചയില് വിഷയത്തില് തുറന്ന ചര്ച്ച നടന്നു. വിശദാംശങ്ങള് വെളിപ്പെടുത്താന് ഇന്ത്യയും അമേരിക്കയും തയ്യാറായിട്ടില്ല. അമേരിക്ക പുറത്തിറക്കിയ പ്രസ്തവനയിലും വിഷയം പരാമര്ശിച്ചിട്ടില്ല.
https://www.facebook.com/Malayalivartha
