ഇസ്രായേല്‍ സൈന്യവും പലസ്തീന്‍ തീവ്രവാദികളായ ഹമാസും തമ്മിലുള്ള ഏറ്റുമുട്ടല്‍ തുടരുന്നതിനിടെ ഈജിപ്തില്‍ രണ്ട് ഇസ്രായേല്‍ വിനോദസഞ്ചാരികള്‍ കൊല്ലപ്പെട്ടതായി റിപ്പോര്‍ട്ട്. ഒരു ഈജിപ്ത് സ്വദേശിയും കൊല്ലപ്പെട്ടിട്ടുണ്ട്. ഒരു ഈജിപ്ഷ്യന്‍ പൊലീസുകാരന്‍ ഇവര്‍ക്കുനേരെ വെടിവയ്ക്കുകയായിരുന്നുവെന്നാണ് റിപ്പോര്‍ട്ടുകള്‍ പറയുന്നത്.

ഈജിപ്തിലെ അലക്സാഡ്രിയ നഗരം സന്ദര്‍ശിക്കാനെത്തിയ ഇസ്രായേലി വിനോദസഞ്ചാരികള്‍ക്കുനേരെ പൊലീസുകാരന്‍ പ്രകോപനമില്ലാതെ വെടിയുതിര്‍ക്കുകയായിരുന്നു. പൊലീസുകാരനെ ഉടന്‍ തന്നെ അറസ്റ്റ് ചെയ്തുവെന്നും റിപ്പോര്‍ട്ടുണ്ട്.

അതേസമയം, ഇസ്രായേല്‍- ഹമാസ് യുദ്ധം ശക്തമായിതന്നെ തുടരുകയാണ്. 350 ഇസ്രായേല്‍ പൗരന്‍മാര്‍ കൊല്ലപ്പെട്ടതായാണ് വിവരം. ഇന്നലെ രാവിലെ 'ഓപ്പറേഷന്‍ അല്‍ അഖ്സ ഫ്‌ളഡ്' എന്ന പേരില്‍ ഹമാസ് ആക്രമണം ആരംഭിച്ചതിന് പിന്നാലെ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു രാജ്യം യുദ്ധമുഖത്താണെന്ന് പ്രഖ്യാപിച്ചിരുന്നു. ഇസ്രായേലിന്റെ പ്രത്യാക്രമണത്തില്‍ 313 പലസ്തീന്‍കാരാണ് ഇതുവരെ കൊല്ലപ്പെട്ടത്. ഇപ്പോഴും എട്ട് ഇടങ്ങളില്‍ ഓപ്പറേഷന്‍ തുടരുകയാണെന്ന് ഇസ്രായേല്‍ സൈന്യം അറിയിക്കുന്നു. 'ഓപ്പറേഷന്‍ അയണ്‍ സ്വാര്‍ഡ്' എന്ന പേരിലാണ് ഇസ്രായേല്‍ പ്രത്യാക്രമണം നടത്തുന്നത്.

നിരവധി ഇന്ത്യക്കാര്‍ സംഘര്‍ഷ പ്രദേശങ്ങളില്‍ കുടുങ്ങി കിടക്കുന്നതായി വിവരമുണ്ട്. ബത്ലഹേമില്‍ രാജ്യസഭാ എം പിയും നാഷണല്‍ പീപ്പിള്‍സ് പാര്‍ട്ടിയുടെ മുതിര്‍ന്ന നേതാവുമായ ഡോ. വാന്‍വീറോയ് ഖര്‍ലൂഖിയും ഭാര്യയും മകളും കുടുങ്ങി കിടക്കുകയാണെന്ന് മേഘാലയ മുഖ്യമന്ത്രി കോണ്‍റാഡ് സാംഗ്മ അറിയിച്ചു. ഇവര്‍ക്കൊപ്പമുണ്ടായിരുന്ന ഇരുപത്തിനാല് ഇന്ത്യക്കാരും കുടുങ്ങിക്കിടക്കുന്നതായാണ് റിപ്പോര്‍ട്ട്. ഇവര്‍ ജെറുസലേമിലേക്ക് തീര്‍ത്ഥാടനത്തിനായി പോയതാണെന്നും പെട്ടെന്നുണ്ടായ ആക്രമണത്തില്‍ ബെത്ലഹേമില്‍ കുടുങ്ങി പോയതാണെന്നുമാണ് ലഭിക്കുന്ന വിവരം.

എം പി ഉള്‍പ്പടെ കുടുങ്ങി കിടക്കുന്ന എല്ലാ ഇന്ത്യന്‍ പൗരന്‍മാരെയും സുരക്ഷിതമായി തിരിച്ചെത്തിക്കുന്നതുമായി ബന്ധപ്പെട്ട് വിദേശകാര്യ മന്ത്രാലയവുമായി ബന്ധപ്പെട്ടിട്ടുണ്ടെന്ന് കോണ്‍റാഡ് സാംഗ്മ വ്യക്തമാക്കി.എം പിയെയും കുടുംബത്തെയും മ?റ്റ് ഇന്ത്യക്കാരെയും ഇന്ന് ഈജ്പ്തിലേക്ക് മാ?റ്റുമെന്നാണ് ലഭിക്കുന്ന റിപ്പോര്‍ട്ട്.