മകനെ രക്ഷിക്കാന്‍ കുട്ടികള്‍ അടികൂടുന്ന സ്ഥലത്തേക്ക് കാര്‍ ഓടിച്ചുകയറ്റി, അമ്മ ഓടിച്ച കാറിടിച്ച് മകന് പരിക്കേറ്റു. മകനെ മര്‍ദ്ദിച്ചവരെ ലക്ഷ്യംവച്ച് കാറോടിക്കുന്നതിനിടെ അബദ്ധത്തില്‍ 12കാരനെ ഇടിക്കുകയായിരുന്നുവെന്ന് പൊലീസ് പറഞ്ഞു. കഴിഞ്ഞയാഴ്ച ഫ്‌ലോറിഡയിലായിരുന്നു സംഭവം നടന്നത്. അപകടത്തില്‍ ക്വാന്റാവിയ മില്‍ട്ടാണൈസ് സാമുവേല്‍ (33) എന്ന യുവതിയെ അറസ്റ്റ് ചെയ്തതായി പൊലീസ് വ്യക്തമാക്കി.

സ്‌കൂളിലെത്തിയ മില്‍ട്ടാണൈസ് കുട്ടികള്‍ അടികൂടുന്നത് അവസാനിപ്പിക്കാന്‍ അവരുടെ ഇടയിലേയ്ക്ക് എസ് യു വി ഓടിച്ചുകയറ്റി. എന്നാല്‍ ഇതിനിടെ അബദ്ധത്തില്‍ മകനെ ഇടിക്കുകയായിരുന്നു. അപകടത്തില്‍ 12കാരന് ചെറിയ പരിക്കുകള്‍ ഏറ്റിരുന്നു.ഇതിനിടെ മറ്റ് കുട്ടികള്‍ അവിടെനിന്ന് ഓടിക്കളഞ്ഞു. മകനെ കാറിനകത്ത് കയറ്റിയിരുത്തിയ യുവതി ആശുപത്രിയിലെത്തിക്കാതെ മകനെ മര്‍ദ്ദിച്ച കുട്ടികളുടെ പുറകെ കാര്‍ ഓടിക്കുകയായിരുന്നുവെന്ന് പൊലീസ് പറയുന്നു.

ഒരു കുട്ടിയുടെ വീടിന് മുന്നില്‍ പാര്‍ക്ക് ചെയ്തതിനുശേഷമാണ് മില്‍ട്ടാണൈസ് പൊലീസിനെ വിവരമറിയിച്ചത്. എന്നാല്‍ കുട്ടിയില്‍ നിന്ന് പൊലീസിന് തോക്ക് കണ്ടെത്താനായില്ല.ഇതിനുശേഷമാണ് 12കാരനെ ആശുപത്രിയില്‍ എത്തിച്ചത്. തുടര്‍ന്ന് കാലിലും ഇടിപ്പിലും വേദനയുള്ളതായി കുട്ടി ആശുപത്രി അധികൃതരെ അറിയിക്കുകയായിരുന്നു. മാരകായുധം ഉപയോഗിച്ച് ആക്രമണം നടത്തിയെന്ന പേരിലാണ് യുവതി അറസ്റ്റിലായത്.

സംഭവദിവസം സ്‌കൂള്‍ കഴിഞ്ഞ് വീട്ടിലെത്തിയ മകന്‍ ബാഗ് മറന്നതായി പറഞ്ഞുവെന്ന് മില്‍ട്ടാണൈസ് പൊലീസിന് മൊഴി നല്‍കി. തുടര്‍ന്ന് കുട്ടി തിരികെ സ്‌കൂളില്‍ എത്തി. കുറച്ചുകഴിഞ്ഞ് സ്‌കൂളിലെ ചില കുട്ടികള്‍ തന്നെ ആക്രമിക്കുന്നതായി മകന്‍ അമ്മയെ ഫോണില്‍ വിളിച്ചറിയിച്ചു. ഇതില്‍ ഒരു കുട്ടിയുടെ കൈവശം തോക്കുണ്ടായിരുന്നു. ഇതുകേട്ട മില്‍ട്ടാണൈസ് മകനെ രക്ഷിക്കാന്‍ കാറുമെടുത്ത് സ്‌കൂളിലെത്തിയതായിരുന്നു.