യുക്തിരഹിതമായ യുദ്ധത്തിന് വേണ്ടി ഒരിക്കല്‍കൂടി സമാധാനത്തിന്റെ രാജകുമാരന്‍ തിരസ്‌കരിക്കപ്പെട്ടു.... ക്രിസ്മസ് ദിനത്തില്‍ ആഘോഷങ്ങളില്ലാതെ, സമാധാനത്തിന് വേണ്ടി ആഹ്വാനം ചെയ്ത് ഫ്രാന്‍സിസ് മാര്‍പാപ്പ
ക്രിസ്മസ് ദിനത്തില്‍ ആഘോഷങ്ങളില്ലാതെ, സമാധാനത്തിന് വേണ്ടി ആഹ്വാനം ചെയ്ത് ഫ്രാന്‍സിസ് മാര്‍പാപ്പ. ഇസ്രയേല്‍ ഹമാസ് യുദ്ധം രൂക്ഷമായി തുടരുന്ന സാഹചര്യത്തെ മുന്‍നിര്‍ത്തിയായിരുന്നു ഫ്രാന്‍സിസ് മാര്‍പാപ്പയുടെ ക്രിസ്മസ് ദിന സന്ദേശം.
യുക്തിരഹിതമായ യുദ്ധത്തിന് വേണ്ടി ഒരിക്കല്‍കൂടി സമാധാനത്തിന്റെ രാജകുമാരന്‍ തിരസ്‌കരിക്കപ്പെട്ടുവെന്ന് ഫ്രാന്‍സിസ് മാര്‍പാപ്പ പറഞ്ഞു. വത്തിക്കാനിലെ സെന്റ് പീറ്റേഴ്‌സ് ബസിലിക്കയില്‍ നല്‍കിയ ക്രിസ്മസ് ദിന സന്ദേശത്തിലായിരുന്നു അദ്ദേഹം സമാധാനത്തിനായി അഭ്യര്‍ഥിച്ചത്.
എന്നാല്‍, പരസ്യമായി ഗാസയേയോ ഇസ്രയേലിനേയോ പേരെടുത്ത് പരാമര്‍ശിക്കാതെയായിരുന്നു അദ്ദേഹത്തിന്റെ ക്രിസ്മസ് ദിന സന്ദേശം. യുദ്ധത്തെക്കുറിച്ചും അക്രമണത്തെക്കുറിച്ചും അദ്ദേഹം പ്രസംഗത്തിലുടനീളം പറയുകയുണ്ടായി.
'ഇന്നത്തെ രാത്രി നമ്മുടെ ഹൃദയങ്ങള്‍ ബെത്‌ലഹേമിലാണ്. സമാധാനത്തിന്റെ രാജകുമാരന്‍ പിറവികൊണ്ടിടത്ത് യുക്തിരഹിതമായ യുദ്ധത്തിന് വേണ്ടി അദ്ദേഹം ഒരിക്കല്‍ കൂടി തിരസ്‌കരിക്കപ്പെട്ടിരിക്കുകയാണ്. ആയുധങ്ങളുടെ ബലത്തില്‍ അനീതി ഇല്ലാതാക്കാന്‍ സാധിക്കില്ല, അടിത്തട്ടില്‍ നിന്നുള്ള സ്‌നേഹപ്രകടനത്തില്‍ നിന്നേ അനീതി ഇല്ലാതാക്കാന്‍ സാധിക്കൂ', മാര്‍പാപ്പ ക്രിസ്മസ് ദിന സന്ദേശത്തില്‍ പറഞ്ഞു.
എന്നാല്‍ , ഉണ്ണിയേശു പിറന്നുവീണ ബത്‌ലഹേമില്‍, ഗാസയിലെ യുദ്ധത്തിന്റെ പശ്ചാത്തലത്തില്‍ ഇക്കുറി കാര്യമായ ക്രിസ്മസ് ആഘോഷങ്ങളില്ല. ക്രിസ്മസിന്റെ തലേദിവസം നടക്കാറുള്ള തിരുപ്പിറവി ആഘോഷങ്ങള്‍ ബത്‌ലഹേമിലെ ചര്‍ച്ച് ഓഫ് നേറ്റിവിറ്റി ഒഴിവാക്കി. യുദ്ധം ഉടന്‍ അവസാനിപ്പിക്കണണെന്ന് ബത്‌ലഹേം ഇവാഞ്ചലിക്കല്‍ ലൂഥറന്‍ ചര്‍ച്ച് പാസ്റ്റര്‍ റവ. ഡോ. മുന്‍തര്‍ ഐസക് ആവശ്യപ്പെട്ടു. യുദ്ധത്തില്‍ വിറങ്ങലിച്ചുനില്‍ക്കുന്ന ഗാസയിലെ പലസ്തീന്‍കാര്‍ക്ക് ഐക്യദാര്‍ഢ്യം പ്രഖ്യാപിച്ച് സിറിയയും ക്രിസ്മസ് ആഘോഷങ്ങള്‍ ഒഴിവാക്കി.പ്രധാനപള്ളികളില്‍ ആഘോഷം മതപരമായ ചടങ്ങുകളിലൊതുങ്ങും.
"
https://www.facebook.com/Malayalivartha
