നാലു വയസുകാരനായ മകനെ ഗോവയിലെ ഹോട്ടലില്‍ എത്തിച്ച് കൊലപ്പെടുത്തി. ബംഗളൂരുവിലെ ആര്‍ട്ടിഫിഷ്യല്‍ ഇന്റലിജന്‍സ് സ്റ്റാര്‍ട്ടപ്പായ മൈന്‍ഡ്ഫുള്‍ എ.ഐ ലാബിന്റെ സി.ഇ.ഒയും പശ്ചിമ ബംഗാള്‍ സ്വദേശിയുമായ സുചന സേത്ത് ( 39 ) ആണ് സ്വന്തം മകനെ കൊലപ്പെടുത്തിയത്. സംഭവത്തില്‍ സുചനയെ പൊലീസ് പിടികൂടി. ഇവരെ ആറു ദിവസത്തേക്ക് പൊലീസ് കസ്റ്റഡിയില്‍ വിട്ടു.

പൊലീസ് പറയുന്നത്:

ശനിയാഴ്ച സുചന മകനോടൊപ്പം നോര്‍ത്ത് ഗോവയിലെ ഹോട്ടലില്‍ മുറിയെടുത്തു. തിങ്കളാഴ്ച രാവിലെ ചെക്ക് ഔട്ട് ചെയ്ത ഇവര്‍ ആവശ്യപ്പെട്ട പ്രകാരം ബംഗളുരുവിലേക്ക് പോകാന്‍ ഹോട്ടല്‍ അധികൃതര്‍ ടാക്‌സി ഏര്‍പ്പാടാക്കി നല്‍കി. ഇവര്‍ പോയ ശേഷം മുറി വൃത്തിയാക്കാനെത്തിയ ജീവനക്കാര്‍ രക്തക്കറ കണ്ടു. ഹോട്ടല്‍ അധികൃതര്‍ അറിയിച്ച പ്രകാരം പൊലീസെത്തി സി.സി ടിവി പരിശോധിച്ചു.

തിരികെ പോയപ്പോള്‍ ഇവരോടൊപ്പം മകനില്ലെന്ന് വ്യക്തമായി.പൊലീസ് യുവതിയെ ഫോണില്‍ ബന്ധപ്പെട്ട് മകനെപ്പറ്റി ചോദിച്ചപ്പോള്‍ ഗോവയിലെ സുഹൃത്തിന്റെ വീട്ടിലാക്കിയെന്ന് പറഞ്ഞു. സുഹൃത്തിന്റെ വിലാസം ചോദിച്ചപ്പോള്‍ വ്യാജ വിലാസം നല്‍കുകയും ചെയ്തു. തുടര്‍ന്ന് ഇവര്‍ സഞ്ചരിച്ച ടാക്‌സി ഡ്രൈവറെ ബന്ധപ്പെട്ട് ഉടന്‍ തൊട്ടടുത്ത പൊലീസ് സ്റ്റേഷനില്‍ എത്താന്‍ ആവശ്യപ്പെട്ടു. ഡ്രൈവര്‍ ചിത്രദുര്‍ഗയിലെ ഐമംഗല പൊലീസ് സ്റ്റേഷനില്‍ ഇവരെ എത്തിക്കുകയായിരുന്നു.

കൊല്‍ക്കത്ത സര്‍വകലാശാലയില്‍ നിന്ന് ഫിസിക്‌സില്‍ ബിരുദാനന്തര ബിരുദം നേടിയിട്ടുള്ള സുചന സേത്ത് അമേരിക്കയിലെ ഹാര്‍വാഡ് യൂണിവേഴ്‌സിറ്റിയില്‍ ബെര്‍ക്ക്മാന്‍ ക്ലീന്‍ സെന്ററില്‍ 2017-18ല്‍ ഫെലോ ആയിരുന്നു. ബിസിനസുകാരനായ ഭര്‍ത്താവുമായി വേര്‍പിരിഞ്ഞാണ് താമസിക്കുന്നത്. മകനെ ആഴ്ചയിലൊരിക്കല്‍ കാണാന്‍ ഭര്‍ത്താവിന് അനുമതി നല്‍കിയതില്‍ ഇവര്‍ അസ്വസ്ഥയായിരുന്നു. ഇന്‍ഡോനേഷ്യയിലായിരുന്ന ഭര്‍ത്താവിനെ പൊലീസ് വിളിച്ചു വരുത്തിയിട്ടുണ്ട്. കൊലയ്ക്ക് പിന്നില്‍ മറ്റ് കാരണങ്ങളുണ്ടോയെന്നും പൊലീസ് അന്വേഷിക്കുന്നു.