പാകിസ്ഥാനില്‍ പൊതുതിരഞ്ഞെടുപ്പ് നടക്കാനിരിക്കെ മുന്‍ പ്രധാനമന്ത്രിയും പി.ടി.ഐ പാര്‍ട്ടി നേതാവുമായ ഇമ്രാന്‍ ഖാന് വീണ്ടും ജയില്‍ ശിക്ഷ. ഇസ്ലാമിക നിയമങ്ങള്‍ക്ക് വിരുദ്ധമായി വിവാഹിതരായതിന് ഇമ്രാനും ഭാര്യ ബുഷ്‌റ ബീബിക്കും 7 വര്‍ഷം തടവ് ശിക്ഷ വിധിച്ചു.

ഇരുവര്‍ക്കും 5,00,000 പാകിസ്ഥാനി രൂപ വീതം പിഴയും ചുമത്തി. ഒരാഴ്ചയ്ക്കിടെ ഇത് മൂന്നാം തവണയാണ് ഇമ്രാന് തടവ് ശിക്ഷ ലഭിക്കുന്നത്. ഇന്ന് അഡിയാല ജയിലിലെ വിചാരണക്കോടതിയില്‍ വിധി പ്രസ്താവിക്കുമ്പോള്‍ ഇമ്രാനെയും ബുഷ്‌റയേയും ഹാജരാക്കിയിരുന്നു. ബുഷ്‌റയുടെ ആദ്യ ഭര്‍ത്താവ് ഖവാര്‍ മനേക്ക നല്‍കിയ ഹര്‍ജിയിലായിരുന്നു വിധി. 2018ലാണ് ഇമ്രാനും ബുഷ്‌റയും വിവാഹിതരായത്. ഇമ്രാന്റെ മൂന്നാമത്തെ വിവാഹമായിരുന്നു. 2017ല്‍ മനേക്കയുമായുള്ള ബന്ധം വേര്‍പെടുത്തിയ ബുഷ്‌റ അടുത്ത വിവാഹത്തിനായി ഇസ്ലാമിക നിയമത്തില്‍ നിഷ്‌കര്‍ഷിച്ചിട്ടുള്ള കാലയളവ് പൂര്‍ത്തിയാക്കിയില്ലെന്നാണ് കേസ്.

പ്രധാനമന്ത്രിയായിരിക്കെ, വിദേശത്ത് നിന്ന് ലഭിച്ച ഉപഹാരങ്ങള്‍ കോടികളുടെ ലാഭത്തിന് മറിച്ചുവിറ്റെന്ന 'തോഷാഖാന ' കേസ് അടക്കമുള്ള അഴിമതി ആരോപണങ്ങളെ തുടര്‍ന്ന് ഇമ്രാന്‍ ഓഗസ്റ്റ് മുതല്‍ അഡിയാല ജയിലിലാണ്. ഇമ്രാന്റെ ഇസ്ലാമാബാദിലെ വസതിയായ ബനി ഗാലയെ അധികൃതര്‍ കഴിഞ്ഞ ദിവസം സബ് ജയിലാക്കി മാറ്റിയിരുന്നു. ബുഷ്‌റയെ നിലവില്‍ കനത്ത സുരക്ഷയില്‍ ഇവിടെയാണ് പാര്‍പ്പിച്ചിരിക്കുന്നത്.