ഏറ്റവും ദൈര്‍ഘ്യമേറിയ സൂര്യഗ്രഹണം അവസാനിച്ചു. ഇന്ത്യന്‍ സമയം രാത്രി 9:12ന് ആരംഭിച്ച ഗ്രഹണം പുലര്‍ച്ചെ രണ്ടര വരെ നീണ്ടു നിന്നു. വടക്കന്‍ അമേരിക്കന്‍ രാജ്യങ്ങളിലാണ് ഗ്രഹണം ദൃശ്യമായത്.

യുഎസ്, കാനഡ, മെക്‌സിക്കോ ഉള്‍പ്പടെയുള്ള രാജ്യങ്ങളില്‍നിന്ന് അപൂര്‍വ പ്രതിഭാസത്തിന് നിരവധിപ്പേരാണ് സാക്ഷികളായത്. ചന്ദ്രന്റെ നിഴല്‍ അഞ്ച് മിനിറ്റോളം സൂര്യനെ മറച്ചപ്പോള്‍ അപൂര്‍വ്വമായ ആകാശ ദൃശ്യവിരുന്ന് ഭൂമിയില്‍ നിന്ന് കണ്ട് ആസ്വദിച്ചത് ആയിരങ്ങളാണ്. 

കാനഡയിലും മെക്സിക്കോയിലും ടെക്സസിലും ഉള്‍പ്പെടെയുള്ള രാജ്യങ്ങളില്‍ അപൂര്‍വ്വ ആകാശ ദൃശ്യവിരുന്ന് കാണാന്‍ ജനങ്ങള്‍ ഒഴുകിയെത്തി. പ്രാദേശിക സമയം ഉച്ചയ്ക്ക് രണ്ട് മണിയോടെയാണ് മെക്സിക്കോയുടെ പസഫിക് തീരത്ത് പ്രതിഭാസം ദൃശ്യമായത്. ഇന്ത്യയുള്‍പ്പെടെയുള്ള രാജ്യങ്ങളിലുള്ളവര്‍ നാസയുടെ തത്സമയ സ്ട്രീമിങിലൂടെയാണ് ഗ്രഹണം ദര്‍ശിച്ചത്.

ടെക്‌സാസിലെ മക്‌ഡൊണാള്‍ഡ് ഒബ്‌സര്‍വേറ്ററിയുടെ തത്സമയ സ്ട്രീമിങും ഓണ്‍ലൈനില്‍ ലഭ്യമായിരുന്നു. ചന്ദ്രന്‍ ഭൂമിക്കും സൂര്യനുമിടയിലൂടെ കടന്നു പോകുമ്പോഴാണ് സമ്പൂര്‍ണ ഗ്രഹണം സംഭവിക്കുന്നത്. ആകാശം സന്ധ്യാസമയം എന്നപേലെ ഇരുണ്ട അവസ്ഥയിലാണ് ഉണ്ടാവുക. ഗ്രഹണ സമയത്ത് ഭൂമിയിലുണ്ടാകുന്ന മാറ്റങ്ങള്‍ പഠിക്കാന്‍ നാസ ഉള്‍പ്പെടെയുള്ള ഏജന്‍സികള്‍ വിപുലമായ സംവിധാനങ്ങള്‍ ഒരുക്കിയിട്ടുണ്ടായിരുന്നു.

ഓരോ വര്‍ഷവും രണ്ട് മുതല്‍ അഞ്ച് സൂര്യഗ്രഹണം വരെ നടക്കാറുണ്ട്. എന്നാല്‍ സമ്പൂര്‍ണ സൂര്യഗ്രഹണം 18 മാസത്തില്‍ ഒരിക്കലാണ് സംഭവിക്കാറുള്ളത്. അടുത്ത സമ്പൂര്‍ണ ഗ്രഹണം 2026 ഓഗസ്റ്റ് 12 നായിരിക്കുമെന്നാണ് പ്രവചനമുള്ളത്.