പഠാന്കോട്ട് ഭീകരാക്രമണവുമായി ബന്ധപ്പെട്ട് ഇന്ത്യ പുതിയ തെളിവുകള് നല്കിയെന്ന് നവാസ് ഷെരീഫ്; അവ പരിശോധിച്ച ശേഷം നടപടിയെടുക്കും
പഠാന്കോട്ട് ഭീകരാക്രമണവുമായി ബന്ധപ്പെട്ട് ഇന്ത്യ പുതിയ തെളിവുകള് നല്കിയെന്നും അവ പരിശോധിച്ച് നീതി നടപ്പാക്കുമെന്നും പാക്കിസ്ഥാന് പ്രധാനമന്ത്രി നവാസ് ഷെരീഫ്. തങ്ങള് ഒന്നും മറയ്ക്കുകയോ മറന്നു പോയിട്ടോ ഇല്ല, ഞങ്ങള്ക്ക് ഇന്ത്യ നല്കിയ തെളിവുകള് ലഭിച്ചിട്ടുണ്ട്. അവ പരിശോധിച്ച ശേഷം നടപടിയെടുക്കുമെന്നും അദ്ദേഹം പറഞ്ഞു.
ഇന്ത്യ നല്കിയ തെളിവുകള് പരിശോധിക്കുന്നത് കൂടാതെ കേസ് അന്വേഷിക്കുന്നതിന് ഒരു പ്രത്യേക സംഘത്തെ രൂപീകരിച്ചിട്ടുണ്ടെന്നും അവര് ഇന്ത്യയില് പോയി കൂടുതല് തെളിവുകള് ശേഖരിക്കുമെന്നും ഷെരീഫ് പറഞ്ഞു. വേള്ഡ് ഇക്കണോമിക് ഫോറത്തില് പങ്കെടുക്കാന് എത്തിയതായിരുന്നു അദ്ദേഹം.
ഞാന് നരേന്ദ്ര മോദിക്കൊരു വാക്കു കൊടുത്തിട്ടുണ്ട്. കൂടാതെ കുറ്റക്കാരെ നീതിയുടെ മുന്നില് കൊണ്ടുവരുന്നതിന് ഇന്ത്യയുടെ ഭാഗത്തു നിന്നും എല്ലാ സഹായവും അദ്ദേഹവും വാഗ്ദാനം ചെയ്തിട്ടുണ്ട്. ഞങ്ങള് ഇപ്പോള് പോകുന്നത് ശരിയായ ദിശയിലാണെന്നാണ് എന്റെ വിശ്വാസം. അധികം വൈകാതെ കുറ്റക്കാരെ നീതിക്ക് മുന്നില് കൊണ്ടുവരാന് കഴിയുമെന്നാണ് പ്രതീക്ഷിക്കുന്നതെന്നും നവാസ് ഷെരീഫ് പറഞ്ഞു.
പഠാന്കോട്ട് ഭീകരാക്രമണവുമായി ബന്ധപ്പെട്ട് ഇന്ത്യ പാക്കിസ്ഥാന് കൃത്യമായ തെളിവുകള് നല്കിയിരുന്നു. എന്നാല് നടപടി ഇഴഞ്ഞു നീങ്ങുകയാണ് എന്ന ആരോപണം ഉയരുന്ന സാഹചര്യത്തിലാണ് പാക്ക് പ്രധാനമന്ത്രിയുടെ പ്രസ്താവന. ജനുവരി ഒന്നിന് ജയ്ഷെ മുഹമ്മദ് ഭീകരര് നടത്തിയ ആക്രമണത്തില് ഏഴ് ഇന്ത്യന് സൈനികരാണ് കൊല്ലപ്പെട്ടത്. ആക്രമണത്തിന് പിന്നാലെ ഇന്ത്യ–പാക്ക് വിദേശ സെക്രട്ടറിമാരുടെ ചര്ച്ചയും മാറ്റിവച്ചിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
