ലണ്ടന്‍ യുഎസ് പ്രസിഡന്റ് ഡൊണാള്‍ഡ് ട്രംപ് തനിക്ക് ആവശ്യമുള്ളത് ബലപ്രയോഗത്തിലൂടെ പിടിച്ചെടുക്കാന്‍ കഴിയുമെന്ന് കരുതുന്ന ഒരു അന്താരാഷ്ട്ര  ഗുണ്ടാസംഘത്തലവനെപ്പോലെയാണ് പെരുമാറുന്നതെന്ന് യുകെ പാര്‍ലമെന്റ് അംഗം എഡ് ഡേവി. ട്രംപ് ഒരു ഭീഷണിയാണെന്ന് യുകെ പാര്‍ലമെന്റില്‍ വിദേശകാര്യ സെക്രട്ടറി യെവെറ്റ് കൂപ്പറിനെ അഭിസംബോധന ചെയ്തുകൊണ്ട് ഡേവി ആരോപിച്ചു. ട്രംപിനെ പിന്തിരിപ്പിക്കാന്‍ യുകെ അവരുടെ യൂറോപ്യന്‍ സഖ്യകക്ഷികളുമായി ഒരുമിച്ച് നില്‍ക്കണമെന്നും അദ്ദേഹം പറഞ്ഞു.

പ്രസിഡന്റ് ട്രംപ് ഒരു അന്താരാഷ്ട്ര ഗുണ്ടയെപ്പോലെയാണ് പെരുമാറുന്നത്. ഒരു സഖ്യകക്ഷിയുടെ പരമാധികാരം ചവിട്ടിമെതിക്കുമെന്ന് ഭീഷണിപ്പെടുത്തുന്നു. നാറ്റോയെ മൊത്തത്തില്‍ അവസാനിപ്പിക്കുമെന്ന് ഭീഷണിപ്പെടുത്തുന്നു. ഗ്രീന്‍ലാന്‍ഡിനെ കൈവശപ്പെടുത്തിയില്ലെങ്കില്‍ നമ്മുടെ രാജ്യത്തെയും ഏഴ് യൂറോപ്യന്‍ സഖ്യകക്ഷികളെയും നാശനഷ്ടങ്ങള്‍ വരുത്തുമെന്ന് ഭീഷണിപ്പെടുത്തുന്നുവെന്നും അദ്ദേഹം പറഞ്ഞു.

ട്രംപ് പ്രകോപനമില്ലാത്ത ആക്രമണത്തിലൂടെ രാജ്യങ്ങളുടെ സമ്പദ്‌വ്യവസ്ഥയെയും ഉപജീവനമാര്‍ഗ്ഗത്തെയും ദേശീയ സുരക്ഷയെയും ആക്രമിക്കുന്നതിനാല്‍ ലോകം ?ഗുരുതരമായ പ്രതിസന്ധിയിലൂടെയാണ് കടന്ന് പോകുന്നതെന്നും അദ്ദേഹം വ്യക്തമാക്കി. യുഎസ് കണ്ടിട്ടുള്ളതില്‍ വച്ച് ഏറ്റവും അഴിമതിക്കാരനായ പ്രസിഡന്റാണ് ട്രംപ്. ട്രംപിനെ അകറ്റി നിര്‍ത്താന്‍ രണ്ട് ഓപ്ഷനുകളുണ്ടെന്നും അദ്ദേഹം പരിഹസിച്ചു. പുതിയ ജെറ്റ് പോലുള്ള സമ്മാനങ്ങളും പണവും നല്‍കി അദ്ദേഹത്തെ പ്രശംസിക്കുക, അദ്ദേഹത്തിന്റെ ക്രിപ്‌റ്റോ അക്കൗണ്ടില്‍ കോടിക്കണക്കിന് നിക്ഷേപിക്കുക എന്നിവയാണ് പരിഹാരമെന്നും ഡേവി പറഞ്ഞു.

ഗ്രീന്‍ലാന്‍ഡ് പിടിച്ചെടുക്കാനുള്ള തന്റെ അഭിലാഷങ്ങളെ എതിര്‍ക്കുന്നവര്‍ക്ക് തീരുവ ചുമത്തുമെന്ന് ട്രംപ് ഭീഷണിപ്പെടുത്തിയ സാഹചര്യത്തിലാണ് രൂക്ഷമായ വിമര്‍ശനം ഉയര്‍ന്നിരിക്കുന്നത്. യൂറോപ്യന്‍ രാജ്യങ്ങള്‍ പിന്തുണച്ചില്ലെങ്കില്‍ ഫെബ്രുവരി 1 മുതല്‍ ഡെന്‍മാര്‍ക്ക്, ഫ്രാന്‍സ്, ജര്‍മ്മനി, ബ്രിട്ടന്‍ എന്നിവയുള്‍പ്പെടെ എട്ട് രാജ്യങ്ങളില്‍ 10 ശതമാനം തീരുവ ചുമത്തുമെന്നും ഗ്രീന്‍ലാന്‍ഡുമായി ബന്ധപ്പെട്ട് ഒരു കരാറിലും എത്തിയില്ലെങ്കില്‍ ജൂണ്‍ 1 മുതല്‍ 25 ശതമാനമായി ഉയര്‍ത്തുമെന്നും ട്രംപ് ശനിയാഴ്ച പറഞ്ഞു.