60കാരനായ ലാഥം എയര്‍ലൈന്‍സ് പൈലറ്റ് സെര്‍ജിയോ അന്റോണിയോ ലോപ്‌സിനെ പോലീസ് അറസ്റ്റ് ചെയ്തു. ബ്രസീലിലാണ് സംഭവം. എട്ട് വര്‍ഷത്തോളം കുട്ടികളെ ലൈംഗികമായി ദുരുപയോഗം ചെയ്ത ഒരു ഗൂഢസംഘത്തില്‍ ഇയാള്‍ പങ്കാളിയാണെന്ന് പോലീസ് പറയുന്നു.

കഴിഞ്ഞ തിങ്കളാഴ്ച ബ്രസീലിലെ കോംഗോണ്‍ഹാസ് വിമാനത്താവളത്തില്‍ വെച്ച് അസാധാരണമായ ഒരു അറസ്റ്റ് നടന്നു. ലാഥം എയര്‍ലൈന്‍സിന്റെ 60 കാരനായ പൈലറ്റ് സെര്‍ജിയോ അന്റോണിയോ ലോപ്‌സിനെ ബ്രസീലിയന്‍ പോലീസ് അറസ്റ്റ് ചെയ്തു. ഇയാള്‍ എട്ട് വര്‍ഷത്തോളം കൌമാരകാരെയും കുട്ടികളെയും ലൈംഗികമായി ദുരുപയോഗം ചെയ്യുന്ന ഒരു ഗൂഢസംഘത്തിന് വേണ്ടി പ്രവര്‍ത്തിച്ചുവെന്ന് ബ്രസീലിയന്‍ പോലീസ് ആരോപിച്ചു. കുട്ടികളെ മോട്ടലുകളിലേക്ക് എത്തിക്കാനായി ഇയാള്‍ വ്യാജ തിരിച്ചറിയല്‍ രേഖകള്‍ ഉപയോഗിച്ചെന്നും പോലീസ് ആരോപിച്ചു. സെര്‍ജിയോ അന്റോണിയോ ലോപ്‌സിനെ വിമാനത്തില്‍ വച്ച് അറസ്റ്റ് ചെയ്യുന്ന വീഡിയോ സമൂഹ മാധ്യമങ്ങളില്‍ വൈറലായി.

സ്ഥിരമായി യാത്ര ചെയ്യുന്ന സെര്‍ജിയോയെ സാവോ പോളോ മെട്രോപൊളിറ്റന്‍ മേഖലയിലെ ഗ്വാററേമയിലെ സ്വന്തം വീട്ടില്‍ കാണാത്തത് കൊണ്ടാണ് വിമാനത്തില്‍ വച്ച് അറസ്റ്റ് ചെയ്യേണ്ടിവന്നതെന്ന് ബ്രസീലിയന്‍ പോലീസ് പിന്നീട് വിശദീകരിച്ചെന്ന് റിപ്പോര്‍ട്ടുകള്‍ പറയുന്നു. രണ്ട് തവണ വിവാഹിതനായ സെര്‍ജിയോ രണ്ട് കുട്ടികളുടെ പിതാവാണ്. തന്റെ സൈക്കോളജിസ്റ്റായ പുതിയ ഭാര്യയോടൊപ്പം ഹണിമൂണ്‍ കഴിഞ്ഞ് തിരിച്ചെത്തി ജോലിക്ക് കയറുമ്പോഴായിരുന്നു അറസ്റ്റ്. സെര്‍ജിയോയ്‌ക്കെതിരെയുള്ള ആരോപണങ്ങളെ കുറിച്ച് അറിഞ്ഞ് രണ്ടാം ഭാര്യ ഞെട്ടിപ്പോയെന്നും റിപ്പോര്‍ട്ടുകള്‍ പറയുന്നു. ഇവര്‍ക്ക് കുറ്റകൃത്യത്തില്‍ പങ്കുണ്ടെന്ന് കരുതുന്നില്ലെന്നായിരുന്നു പോലീസിന്റെ വിശദീകരണം.

'നിങ്ങളുടെ സീറ്റ് ബെല്‍റ്റുകള്‍ ഉറപ്പിക്കുക' എന്ന പേരില്‍ നടത്തിയ ഓപ്പറേഷന്റെ ഭാഗമായിരുന്നു അറസ്റ്റ്. ഇരകളുടെ ചിത്രങ്ങള്‍ക്കും വീഡിയോകള്‍ക്കും സെര്‍ജിയോ പണം നല്‍കിയതായും പോലീസ് ആരോപിച്ചു. കുട്ടികളുടെ കിട്ടാനായി അവരുടെ കുടുംബങ്ങള്‍ക്ക് ഭക്ഷണം, മരുന്ന്, വാടക, വീട്ടുപകരണങ്ങള്‍ എന്നിവയുള്‍പ്പെടെയുള്ള സാമ്പത്തിക സഹായം ഇയാള്‍ നല്‍കിയിരുന്നെന്നും സ്‌റ്റേറ്റ് ഡിപ്പാര്‍ട്ട്‌മെന്റ് ഓഫ് ഹോമിസൈഡ്‌സ് ആന്‍ഡ് പ്രൊട്ടക്ഷന്‍ ഓഫ് പേഴ്‌സണ്‍സ് (ഡിഎച്ച്പിപി) മേധാവി പോലീസ് മേധാവി ഇവാല്‍ഡ അലക്‌സോ പത്രസമ്മേളനത്തില്‍ പറഞ്ഞു.

സെര്‍ജിയോയുടെ അറസ്റ്റിന്റെ ഭാഗമായി 10, 12, 14 വയസ്സുള്ള തന്റെ 3 പേരക്കുട്ടികളെ പണത്തിനായി ഇയാള്‍ക്ക് വിറ്റുവെന്ന സംശയത്തില്‍ 55 വയസ്സുള്ള ഡെനിസ് മൊറീനോയെ എന്ന സ്ത്രീയെയും പോലീസ് അറസ്റ്റ് ചെയ്തു. സാവോ പോളോയിലെ മോട്ടലുകളില്‍ പ്രായപൂര്‍ത്തിയാകാത്ത കുട്ടികള്‍ക്കും സെര്‍ജിയോയ്ക്കും ഇടയിലെ കണ്ണിയായിരുന്നു ഈ സ്ത്രിയെന്നും പോലീസ് ആരോപിക്കുന്നു. സ്വന്തം മകള്‍ അടക്കമുള്ള കുട്ടികളെ ലൈംഗികമായി പീഡിപ്പിക്കുന്ന ചിത്രങ്ങളും വീഡിയോകളും സൂക്ഷിച്ച് വച്ചതിനും പങ്കുവെച്ചതിനും മറ്റൊരു സ്ത്രീയെയും അറസ്റ്റ് ചെയ്തതായി അന്വേഷണ ഉദ്യോഗസ്ഥര്‍ പറഞ്ഞു.

2025 ഒക്ടോബറിലാണ് ഈ അന്വേഷണങ്ങള്‍ക്ക് തുടക്കം കുറിച്ചത്. ഇതുവരെ സാവോ പോളോ സംസ്ഥാനത്തുടനീളം കുറഞ്ഞത് 10 ഇരകളെയെങ്കിലും തിരിച്ചറിഞ്ഞു. അതില്‍ ഒരേ കുടുംബത്തിലെ 3 പേര്‍ ഉള്‍പ്പെടുന്നു. സെര്‍ജിയോയുടെ ഫോണില്‍ നിന്നും ലഭിച്ച വിവരങ്ങള്‍ മറ്റ് ബ്രസീലിയന്‍ സംസ്ഥാനങ്ങളിലെ കുട്ടികളും ഇയാളുടെ പീഡനത്തിന് ഇരയായിട്ടുണ്ടെന്ന് തെളിവുകള്‍ ലഭിച്ചെന്നും പോലീസ് പറയുന്നു.