അമേരിക്കയിലെ സിയാറ്റിലില്‍ പോലീസ് വാഹനമിടിച്ച് കൊല്ലപ്പെട്ട ഇന്ത്യന്‍ വിദ്യാര്‍ത്ഥിനി ജാന്‍വി കണ്ടൂലയുടെ കുടുംബത്തിന് സിയാറ്റില്‍ നഗരസഭ 29 ദശലക്ഷം ഡോളര്‍ (ഏകദേശം 262 കോടി രൂപ) നഷ്ടപരിഹാരം നല്‍കാന്‍ തീരുമാനിച്ചു. 2023 ജനുവരിയില്‍ നടന്ന ദാരുണമായ അപകടത്തില്‍ മരിച്ച ജാന്‍വിയുടെ കുടുംബം നല്‍കിയ സിവില്‍ കേസിനെത്തുടര്‍ന്നാണ് വര്‍ഷങ്ങള്‍ നീണ്ട നിയമപോരാട്ടത്തിനൊടുവില്‍ ഈ വന്‍ തുക നല്‍കാന്‍ സിറ്റി കൗണ്‍സില്‍ ധാരണയിലെത്തിയത്.

ജാന്‍വിയുടെ മരണം ലോകശ്രദ്ധ നേടാന്‍ കാരണം അപകടത്തിന് ശേഷം പുറത്തുവന്ന മറ്റൊരു പോലീസ് ഉദ്യോഗസ്ഥന്റെ ക്രൂരമായ പ്രതികരണമായിരുന്നു. അപകടം അന്വേഷിക്കാനെത്തിയ ഡാനിയല്‍ ഓഡറര്‍ എന്ന പോലീസ് ഉദ്യോഗസ്ഥന്‍, ജാന്‍വിയുടെ മരണത്തെ പരിഹസിക്കുകയും 'അവള്‍ക്ക് പരിമിതമായ മൂല്യമേയുള്ളൂ (limited value), 11,000 ഡോളറിന്റെ ചെക്ക് എഴുതി നല്‍കിയാല്‍ മതി' എന്ന് പൊട്ടിച്ചിരിച്ചുകൊണ്ട് സംസാരിക്കുകയും ചെയ്തത് ബോഡിക്യാമറ ദൃശ്യങ്ങളില്‍ പതിഞ്ഞിരുന്നു. ഇത് ഇന്ത്യയിലടക്കം വലിയ രീതിയിലുള്ള പ്രതിഷേധങ്ങള്‍ക്കും നയതന്ത്ര ചര്‍ച്ചകള്‍ക്കും കാരണമായി. ഏകദേശം 20 മില്യണ്‍ ഡോളര്‍ നഗരസഭയുടെ ഇന്‍ഷുറന്‍സ് തുകയില്‍ നിന്നാണ് നല്‍കുന്നത്.

2023 ജനുവരി 23നാണ് നോര്‍ത്ത് ഈസ്‌റ്റേണ്‍ യൂണിവേഴ്‌സിറ്റിയിലെ ബിരുദാനന്തര ബിരുദ വിദ്യാര്‍ത്ഥിനിയായ ജാന്‍വി കണ്ടൂല കൊല്ലപ്പെട്ടത്. റോഡ് മുറിച്ചുകടക്കുന്നതിനിടെ മറ്റൊരു അടിയന്തര കേസിലേക്ക് വിളികൂട്ടി പാഞ്ഞുവന്ന പോലീസ് ഓഫീസര്‍ കെവിന്‍ ഡേവ് ഓടിച്ച വാഹനം ജാന്‍വിയെ ഇടിച്ചുതെറിപ്പിക്കുകയായിരുന്നു. മണിക്കൂറില്‍ വെറും 40 കിലോമീറ്റര്‍ വേഗത അനുവദനീയമായ സ്ഥലത്ത് 119 കിലോമീറ്റര്‍ വേഗതയിലാണ് പോലീസ് വാഹനം എത്തിയത്. ആന്ധ്രാപ്രദേശ് സ്വദേശിയായ ജാന്‍വി സംഭവസ്ഥലത്തുവെച്ചുതന്നെ മരണപ്പെട്ടിരുന്നു.