ഒമാന്‍ സുല്‍ത്താന്‍ ഖാബൂസ് തുറമുഖത്ത് ചരക്ക് കപ്പലിന് നേരെ നടന്ന ഡ്രോണ്‍ ബോട്ട് ആക്രമണത്തില്‍ കപ്പല്‍ ജീവനക്കാരനായ ഇന്ത്യക്കാരന്‍ കൊല്ലപ്പെട്ടു. ഒമാനിലെ ബിസ്‌ക്കറ്റ് തീരത്ത് നിന്ന് ഏകദേശം 52 നോട്ടിക്കല്‍ മൈല്‍ അകലെ വെച്ചാണ് സംഭവം. മാര്‍ഷല്‍ ഐലന്‍ഡ്‌സ് പതാക വഹിച്ച 'എം.കെ.ഡി വ്യാം' എന്ന കപ്പലിന് നേരെയാണ് സ്‌ഫോടകവസ്തുക്കള്‍ നിറച്ച ആളില്ലാ ബോട്ട് ഉപയോഗിച്ച് ആക്രമണം ഉണ്ടായത്.

ഒമാന്‍ മാരിടൈം സെക്യൂരിറ്റി സെന്റര്‍ നല്‍കുന്ന വിവരങ്ങള്‍ പ്രകാരം, ആക്രമണത്തെത്തുടര്‍ന്ന് കപ്പലിന്റെ പ്രധാന എഞ്ചിന്‍ റൂമില്‍ ശക്തമായ സ്‌ഫോടനവും തുടര്‍ന്ന് വന്‍ തീപിടുത്തവും ഉണ്ടായി. ഏകദേശം 59,463 മെട്രിക് ടണ്‍ ചരക്കുമായി പോവുകയായിരുന്നു കപ്പല്‍. സ്‌ഫോടനത്തില്‍ കപ്പലിന് കാര്യമായ കേടുപാടുകള്‍ സംഭവിച്ചിട്ടുണ്ട്.

ആകെ 21 ജീവനക്കാരാണ് കപ്പലില്‍ ഉണ്ടായിരുന്നത്. ഇതില്‍ 16 പേര്‍ ഇന്ത്യക്കാരാണ്. ബാക്കിയുള്ളവരില്‍ നാല് പേര്‍ ബംഗ്ലാദേശ് സ്വദേശികളും ഒരാള്‍ ഉെ്രെകന്‍ സ്വദേശിയുമാണ്. കൊല്ലപ്പെട്ട ഇന്ത്യക്കാരനെ കൂടാതെ ബാക്കിയുള്ള എല്ലാ ജീവനക്കാരെയും സുരക്ഷിതമായി ഒഴിപ്പിച്ചു. പനാമ പതാകയുള്ള 'എം.പി സാന്‍ഡ്' എന്ന കപ്പലിന്റെ സമയോചിതമായ ഇടപെടലാണ് ബാക്കി ജീവനക്കാരുടെ ജീവന്‍ രക്ഷിക്കാന്‍ സഹായിച്ചത്.

സംഭവം നടന്ന ഉടന്‍ തന്നെ ഒമാന്‍ റോയല്‍ നേവിയുടെ കപ്പല്‍ സ്ഥലത്തെത്തി സ്ഥിതിഗതികള്‍ വിലയിരുത്തി. തകരാര്‍ സംഭവിച്ച കപ്പലിനെ നിരീക്ഷിച്ചു വരികയാണ്. ഈ മേഖലയിലൂടെ കടന്നുപോകുന്ന മറ്റ് കപ്പലുകള്‍ക്ക് ഒമാന്‍ മാരിടൈം അധികൃതര്‍ അതീവ ജാഗ്രതാ നിര്‍ദ്ദേശം നല്‍കിയിട്ടുണ്ട്.