ഇറാന്റെ ഔദ്യോഗിക മാധ്യമ സമുച്ചയങ്ങള്‍ക്ക് നേരെ ഇസ്രായേല്‍ വ്യോമാക്രമണം
ഇസ്രായേലും ഇറാനും തമ്മിലുള്ള യുദ്ധം അതീവ ഗുരുതരമായ സാഹചര്യത്തിലേക്ക്. വടക്കന്‍ ടെഹ്‌റാനിലെ ജാമേ ജാം പ്രദേശത്ത് സ്ഥിതി ചെയ്യുന്ന ഇറാന്റെ ഔദ്യോഗിക മാധ്യമമായ ഇസ്ലാമിക് റിപ്പബ്ലിക് ഓഫ് ഇറാന്‍ ബ്രോഡ്കാസ്റ്റിങിന്റെ രണ്ട് പ്രധാന സമുച്ചയങ്ങള്‍ ഇസ്രായേല്‍ വ്യോമാക്രമണത്തില്‍ തകര്‍ത്തു. ആക്രമണത്തില്‍ മാധ്യമപ്രവര്‍ത്തകര്‍ ഉള്‍പ്പെടെ നിരവധി പേര്‍ കൊല്ലപ്പെട്ടതായും നിരവധിയാളുകള്‍ക്ക് പരിക്കേറ്റതായും റിപ്പോര്‍ട്ടുകളുണ്ട്.
ഞായറാഴ്ച രാത്രിയോടെ നടന്ന ആക്രമണത്തെത്തുടര്‍ന്ന് ഇറാനിലെ റേഡിയോ, ടെലിവിഷന്‍ സംപ്രേഷണങ്ങള്‍ പൂര്‍ണ്ണമായും തടസ്സപ്പെട്ടു. എന്നാല്‍ മിനിറ്റുകള്‍ക്കുള്ളില്‍ തന്നെ ഐആര്‍ഐബിയുടെ സംപ്രേഷണ സംവിധാനങ്ങള്‍ ഇസ്രായേല്‍ ഹൈജാക്ക് ചെയ്തതായാണ് വിവരം. സംപ്രേഷണം പുനരാരംഭിച്ചപ്പോള്‍ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ഇറാനിയന്‍ ജനതയെ അഭിസംബോധന ചെയ്യുന്ന വീഡിയോ സന്ദേശമാണ് ചാനലുകളില്‍ പ്രത്യക്ഷപ്പെട്ടത്. 'ഓപ്പറേഷന്‍ റോറിംഗ് ലയണ്‍' എന്ന പേരില്‍ അമേരിക്കയുമായി ചേര്‍ന്ന് നടത്തുന്ന സൈനിക നീക്കത്തിന്റെ ഭാഗമായാണ് ഈ ആക്രമണമെന്ന് ഇസ്രായേല്‍ അവകാശപ്പെടുന്നു.
തങ്ങളുടെ മാധ്യമ കേന്ദ്രങ്ങള്‍ക്ക് നേരെയുണ്ടായ ആക്രമണം അമേരിക്കയും ഇസ്രായേലും സംയുക്തമായി ആസൂത്രണം ചെയ്തതാണെന്ന് ഐആര്‍ഐബി ന്യൂസ് നെറ്റ്‌വര്‍ക്ക് ആരോപിച്ചു. സുരക്ഷാ കാരണങ്ങളാല്‍ പല പതിവ് പരിപാടികളും മാറ്റി വെച്ചിരുന്ന സമയത്താണ് ഈ ആക്രമണം ഉണ്ടായത്. ഇതിനിടെ ഇറാന്റെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതായി സ്ഥിരീകരിക്കാത്ത റിപ്പോര്‍ട്ടുകള്‍ പുറത്തുവരുന്നത് മേഖലയില്‍ കൂടുതല്‍ അനിശ്ചിതത്വം സൃഷ്ടിച്ചിട്ടുണ്ട്.
ലഭ്യമായ വിവരമനുസരിച്ച്, നിലവിലെ ഏറ്റുമുട്ടലുകളില്‍ ഇറാനില്‍ മാത്രം ഇതുവരെ 555 പേര്‍ കൊല്ലപ്പെട്ടതായി ഇറാനിയന്‍ റെഡ് ക്രെസന്റ് സൊസൈറ്റി അറിയിച്ചു. ഇതില്‍ ഭൂരിഭാഗവും സാധാരണക്കാരാണെന്നും റിപ്പോര്‍ട്ടുകള്‍ സൂചിപ്പിക്കുന്നു. തിരിച്ചടിയായി ഇറാന്‍ നടത്തിയ മിസൈല്‍ – ഡ്രോണ്‍ ആക്രമണങ്ങളില്‍ ഇസ്രായേലിലും ഗള്‍ഫ് മേഖലയിലുള്ള അമേരിക്കന്‍ സൈനിക താവളങ്ങളിലും വലിയ നാശനഷ്ടങ്ങള്‍ സംഭവിച്ചിട്ടുണ്ട്. അമേരിക്കന്‍ സൈനികരും കൊല്ലപ്പെട്ടതായാണ് സൂചന.
https://www.facebook.com/Malayalivartha
