സൗദി ആകാശത്ത് വീണ്ടും സംഘര്ഷം; ആകാശത്ത് ഡ്രോണ് കണ്ടാല് അറിയിക്കണമെന്ന് ജനങ്ങളോട് ഒമാന് ഭരണകൂടം
ബുധനാഴ്ച സൗദി അറേബ്യയുടെ ആകാശപരിധിയില് പ്രവേശിച്ച രണ്ട് ക്രൂയിസ് മിസൈലുകളും 10 ഡ്രോണുകളും വ്യോമപ്രതിരോധ സേന വിജയകരമായി തടയുകയും നശിപ്പിക്കുകയും ചെയ്തതായി പ്രതിരോധ മന്ത്രാലയം വക്താവ് മേജര് ജനറല് തുര്ക്കി അല് മാലിക്കി അറിയിച്ചു. അല് ഖര്ജ് മേഖലയില് വെച്ചാണ് മിസൈലുകള് തകര്ത്തത്. ഇതിനുപുറമെ രാജ്യത്തിന്റെ മറ്റ് വിവിധ ഭാഗങ്ങളിലായി ഒമ്പത് ഡ്രോണുകളും കിഴക്കന് പ്രവിശ്യയില് ഒരു ഡ്രോണും തകര്ത്തതായും അദ്ദേഹം വ്യക്തമാക്കി.
റിയാദിലെ യുഎസ് എംബസി കെട്ടിടത്തിന് നേരെ ഇറാന് നടത്തിയ ക്രൂരമായ ആക്രമണത്തെ സൗദി അറേബ്യ കഴിഞ്ഞ ദിവസം (ചൊവ്വ) ശക്തമായി അപലപിച്ചിരുന്നു. തങ്ങളുടെ മണ്ണോ ആകാശമോ ഇറാനെതിരെ ആക്രമണം നടത്താന് ഉപയോഗിക്കാന് അനുവദിക്കില്ലെന്ന് സൗദി ഭരണകൂടം വ്യക്തമാക്കിയിട്ടും ഇറാന് ഇത്തരം പ്രകോപനങ്ങള് തുടരുന്നത് മേഖലയെ കൂടുതല് സംഘര്ഷത്തിലേക്ക് തള്ളിവിടുമെന്ന് മന്ത്രാലയം മുന്നറിയിപ്പ് നല്കി. രാജ്യത്തിന്റെ സുരക്ഷയും അഖണ്ഡതയും പൗരന്മാരുടെയും താമസക്കാരുടെയും സംരക്ഷണവും ഉറപ്പാക്കാന് തിരിച്ചടി ഉള്പ്പെടെയുള്ള ഏത് നടപടിയും സ്വീകരിക്കാന് സൗദി അറേബ്യക്ക് പൂര്ണ്ണ അവകാശമുണ്ടെന്നും മന്ത്രാലയം പ്രസ്താവനയിലൂടെ ആവര്ത്തിച്ചു.
പശ്ചിമേഷ്യയില് സംഘര്ഷം തുടരുന്ന സാഹചര്യത്തില് ഡ്രോണ് ആക്രമണം തടയാന് ജനങ്ങളുടെ സഹകരണം തേടി ഒമാന് ഭരണകൂടം. ആകാശത്ത് ഡ്രോണ് കണ്ടാല് അറിയിക്കണമെന്ന് ജനങ്ങളോട് അഭ്യര്ത്ഥിച്ചു. പ്രവാസികളോടും പൗരന്മാരോടുമാണ് അറിയിപ്പ്. രാജ്യത്തേക്ക് വരുന്ന ഡ്രോണുകള് കണ്ടാല് വിവരം നല്കണം. രാജ്യത്തിന് നേരെയുള്ള ആക്രമണം ഒരുമിച്ച് നേരിടുന്നതിന്റെ ഭാഗമായാണ് അറിയിപ്പ് പുറപ്പെടുവിച്ചിരിക്കുന്നത്.
ദേശീയ ആകാശപരിധിയില് സുരക്ഷാ ജാഗ്രത ഒമാന് ശക്തിപ്പെടുത്തിയിരിക്കുകയാണ്. ഡ്രോണുകള് ഉള്പ്പെടെ എല്ലാ തരത്തിലുള്ള മനുഷ്യരഹിത വിമാനങ്ങളുടെയും വിവിധ വായുമാര്ഗ കായിക പ്രവര്ത്തനങ്ങളുടെയും അനുമതികള് അടുത്ത അറിയിപ്പുണ്ടാകുന്നത് വരെ താല്ക്കാലികമായി നിര്ത്തിവെച്ചതായി സിവില് എവിയേഷന് അതോറിറ്റി പ്രഖ്യാപിച്ചിട്ടുണ്ട്.
https://www.facebook.com/Malayalivartha
