റഷ്യന്‍ എണ്ണ ഇറക്കുമതി ചെയ്യുന്നതിലെ കര്‍ശന നിയന്ത്രണങ്ങളില്‍ അമേരിക്ക താല്‍ക്കാലികമായി ഇളവ് അനുവദിച്ചു
ആഗോള എണ്ണ വിപണിയിലെ അനിശ്ചിതത്വങ്ങള്‍ക്കിടയില്‍ അപ്രതീക്ഷിത നേട്ടമുണ്ടാക്കി റഷ്യ. യുക്രെയ്ന്‍ അധിനിവേശത്തെത്തുടര്‍ന്ന് ലോകരാജ്യങ്ങള്‍ ഏര്‍പ്പെടുത്തിയ ഉപരോധങ്ങള്‍ നിലനില്‍ക്കെത്തന്നെ, റഷ്യന്‍ എണ്ണയ്ക്ക് അന്താരാഷ്ട്ര വിപണിയില്‍ പ്രിയമേറുകയാണ്. കടുത്ത എണ്ണക്ഷാമം പരിഹരിക്കുന്നതിനായി റഷ്യന്‍ എണ്ണ ഇറക്കുമതി ചെയ്യുന്നതിലെ കര്‍ശന നിയന്ത്രണങ്ങളില്‍ അമേരിക്ക താല്‍ക്കാലികമായി ഇളവ് അനുവദിച്ചതാണ് ഈ മാറ്റത്തിന് പിന്നിലെ പ്രധാന കാരണം.
എണ്ണവില കുതിച്ചുയരുന്നത് തടയാനും വിപണിയിലെ പെട്ടെന്നുള്ള ക്ഷാമം പരിഹരിക്കാനുമാണ് അമേരിക്കന്‍ നടപടി. ഏപ്രില്‍ 11 വരെയാണ് ഈ ഇളവുകള്‍ അനുവദിച്ചിരിക്കുന്നത്. മാര്‍ച്ച് 5ന് മുമ്പ് കപ്പലില്‍ കയറ്റിയ എണ്ണയ്ക്കും പെട്രോളിയം ഉല്‍പ്പന്നങ്ങള്‍ക്കും ഉപരോധം ബാധകമാകില്ലെന്ന് അമേരിക്കന്‍ ഭരണകൂടം വ്യക്തമാക്കിയിട്ടുണ്ട്. അമേരിക്കയുടെ ഈ നീക്കം ഇന്ത്യയുള്‍പ്പെടെയുള്ള രാജ്യങ്ങള്‍ക്ക് വലിയ ആശ്വാസമാണ് നല്‍കുന്നത്.
അറേബ്യന്‍ രാജ്യങ്ങള്‍ പലതും എണ്ണക്കയറ്റുമതിയില്‍ 'ഫോഴ്‌സ് മജീര്‍' പ്രഖ്യാപിച്ചിരിക്കുന്നത് ആഗോള പ്രതിസന്ധിയുടെ ആഴം വര്‍ദ്ധിപ്പിക്കുന്നു. തങ്ങള്‍ക്ക് നിയന്ത്രിക്കാനാകാത്ത സാഹചര്യങ്ങള്‍ (യുദ്ധം, പ്രകൃതിക്ഷോഭം തുടങ്ങിയവ) മൂലം കരാറുകള്‍ പാലിച്ച് എണ്ണ എത്തിക്കാന്‍ സാധിക്കാതെ വരുമ്പോള്‍ നിയമപരമായ ബാധ്യതകളില്‍ നിന്ന് ഒഴിയുന്നതിനാണ് രാജ്യങ്ങള്‍ ഈ വകുപ്പ് ഉപയോഗിക്കുന്നത്. ഇതുവഴി കരാര്‍ ലംഘനത്തിന് നഷ്ടപരിഹാരം നല്‍കേണ്ടി വരില്ല എന്നത് കയറ്റുമതിക്കാര്‍ക്ക് ഗുണകരമാണെങ്കിലും ഉപഭോക്തൃ രാജ്യങ്ങളെ ഇത് കടുത്ത പ്രതിസന്ധിയിലാക്കുന്നു.
https://www.facebook.com/Malayalivartha
