ഗാസ ജില്ലയിലുള്ള ഷിന്റാഫു തടാകം പൊട്ടിയൊഴുകി... വടക്കുപടിഞ്ഞാറൻ ഭൂട്ടാനിലെ ഗാസ ജില്ലയിലുള്ള ഷിന്റാഫു തടാകം പൊട്ടിയൊഴുകിയതിനെ തു‌ടർന്ന് ഇന്ത്യയിൽ മിന്നൽ പ്രളയ മുന്നറിയിപ്പ്.ഷിന്റാഫു ഒരു ഹിമാനി തടാകമാണ് . ഇന്നലെ വൈകിട്ടോടെയാണ് തടാകം തകർന്നത്. ഇതോടെ ഇന്ത്യയിൽ പശ്ചിമ ബംഗാൾ, ആസാം ജില്ലകളിൽ പ്രളയമുന്നറിയിപ്പ് നൽകുകയായിരുന്നു.

സംഭവത്തെ തുടർന്ന് ഗാസ ജില്ലയിലെ മൊ ചു നദിയുടെ കരയിലുള്ള ഗാസ ത്‌സാച്ചു എന്ന ഉഷ്‌ണജലപ്രവാഹത്തിന് സമീപത്തെ പ്രദേശങ്ങളെല്ലാം ഒഴുകിപ്പോയി. അപകടം മുന്നിൽകണ്ട് പ്രദേശത്തെ ജനങ്ങളെ നേരത്തെ ഒഴിപ്പിച്ചതിനാൽ ആൾനാശം ഒഴിവായി. മൊ ചു നദിയുടെ തുടക്കഭാഗത്ത് സ്ഥിതിചെയ്യുന്ന ഷിന്റാഫു ഗ്‌ളേഷ്യൽ തടാകം ഭൂട്ടാനിലെ 17 അപകടകരമായ ഹിമാനികളിൽ ഒന്നാണ്.

ഉഷ്‌ണജല പ്രവാഹമുള്ള ഗാസ ത്‌സാച്ചു ഇതിനുമുൻപ് 2021 ഓഗസ്റ്റ് 26നും പൂർണമായും ഇത്തരത്തിൽ ഒഴുകിപ്പോയി നശിച്ചിരുന്നു. അന്ന് നദി ഗതിമാറി ഒഴുകിയായിരുന്നു ദുരന്തം.

നിലവിൽ പ്രളയജലം കബേസ ഗെവോംഗിന് സമീപം ശ്രീഗാംഗിൽ എത്തിയതായി ഭൂട്ടാൻ വിവരം നൽകുകയും ചെയ്തു. തങ്ങളുമായി അതിർത്തി പങ്കിടുന്ന ഇന്ത്യൻ ജില്ലകളായ ആസാമിലും ബംഗാളിലും മിന്നൽ പ്രളയമുന്നറിയിപ്പ് ഭൂട്ടാൻ നൽകി.