ട്രംപ് ടവറിന്റെ ഗ്ലാസ് ഭിത്തിയിലൂടെ വലിഞ്ഞുകയറിയ യുവാവിനെ ന്യൂയോര്‍ക്ക് പോലീസ് പിടികൂടി. 58 നിലയുള്ള കെട്ടിടത്തിന്റെ 21ാം നില വരെ കയറി മൂന്നുമണിക്കൂറോളം പൊലീസിനെ മുള്‍മുനയില്‍ നിര്‍ത്തിയ 20 കാരനെ കെട്ടിടത്തിന്റെ ജനാല തകര്‍ത്താണ് പിടികൂടിയത്.

റിപ്പബ്ലിക്കന്‍ പ്രസിഡന്റ് സ്ഥാനാര്‍ത്ഥി ഡൊണാള്‍ഡ് ട്രംപിന്റെ തെരഞ്ഞെടുപ്പു പ്രചാരണത്തിന്റെ ആസ്ഥാനമാണ് ട്രംപ് ടവര്‍. പൊലീസ് പിടികൂടാന്‍ ശ്രമിക്കുന്നതിനിടെ വഴിമാറി കയറിയാണ് യുവാവ് 21ാം നില വരെ എത്തിയത്. കയറും സക്ഷന്‍ കപ്പും ഉപയോഗിച്ചായിരുന്നു ഗ്ലാസിലൂടെയുള്ള കയറ്റം. 21ാം നിലയില്‍ വെച്ച് പൊലീസ് യുവാവിനെ കെട്ടിടത്തിനുള്ളിലേക്ക് വലിച്ചിടുകയായിരുന്നു.

യുവാവിനെ മാനശാസ്ത്രപരമായി വിശകലനം ചെയ്യുന്നതിന് ബല്ലിവ്യൂ ഹോസ്പിറ്റലിലേക്ക് കൊണ്ടുപോയെന്നാണ് റിപ്പോര്‍ട്ടുകള്‍. ട്രംപിനെ കാണാനാണ് വിര്‍ജീനിയക്കാരനായ യുവാവ് എത്തിയതെന്നും ആക്രമണം നടത്താന്‍ പദ്ധതിയില്ലായിരുന്നുവെന്നും പോലീസ് അറിയിച്ചു.

കഴിഞ്ഞയാഴ്ച യൂട്യൂബില്‍ പോസ്റ്റ് ചെയ്ത ഒരു വീഡിയോയില്‍ 'ഇന്‍ഡിപെന്‍ഡന്റ് റിസര്‍ച്ചറാ'ണെന്നും ട്രംപിന് 'പ്രധാനപ്പെട്ട ഒരു സന്ദേശം' കൈമാറാനുണ്ടെന്നും യുവാവ് വ്യക്തമാക്കിയിരുന്നു. യുവാവിന്റെ 'സ്‌പൈഡര്‍മാന്‍' പ്രകടനം കാണുന്നതിന് നിരവധിപേരാണ് കെട്ടിടത്തിന് ചുറ്റും തടിച്ചുകൂടിയത്.