പാകിസ്താന് പിന്നില്‍ കളിക്കുന്നത് ചൈന. അയല്‍ക്കാരന്റെ കളി ശത്രുവിന്റെ ശത്രു മിത്രം എന്ന പോളിസിയുമായി. പാകിസ്താനുമായുള്ള തങ്ങളുടെ സൗഹൗൃദം ആര്‍ക്കും തകര്‍ക്കാനാവാത്തതാണെന്ന് ചൈന വ്യക്തമാക്കി. ഇരു രാജ്യങ്ങളും പരസ്പരം പിന്തുണച്ചാണ് മുന്നോട്ട് പോകുന്നതെന്നും ചൈനയുടെ പ്രധാനമന്ത്രി ലീ കെ ക്വിയാംഗ് പറഞ്ഞു. ജമ്മു കശ്മീരിലെ ഉറിയിലുണ്ടായ ഭീകരാക്രമണത്തെ കുറിച്ച് ചൈനയിലെ മാധ്യമങ്ങള്‍ മൗനം പാലിക്കുന്നതിനിടെയാണ് തങ്ങള്‍ പാകിസ്ഥാനൊപ്പമാമെന്ന് വ്യക്തമായ സന്ദേശം ലീ നല്‍കിയതെന്ന് വിദേശ മാധ്യമങ്ങള്‍ റിപ്പോര്‍ട്ട് ചെയ്തു.
പാകിസ്താനുമായി പ്രായോഗികമായ എല്ലാ സഹകരണവും ആഴത്തിലാക്കാനും ഉഭയകക്ഷി ബന്ധം പുതിയ തലത്തിലേക്ക് എത്തിക്കാനുള്ള എല്ലാ പരിശ്രമങ്ങളും നടത്തുമെന്നും ലീ പറഞ്ഞു. ചൈനയും പാകിസ്താനും തമ്മിലുള്ള സാമ്പത്തിക ഇടനാഴി ഇരു രാജ്യങ്ങളുടേയയും ബന്ധത്തില്‍ അനുകൂലമായ മുന്നേറ്റം ഉണ്ടാക്കിയിട്ടുണ്ട്. പാകിസ്താനുമായുള്ള സഹകരണം ഉയര്‍ന്ന തലത്തിലേക്ക് എത്തിക്കുന്നതിനും സഹകരണം കൂടുതല്‍ ശക്തിപ്പെടുത്തുന്നതിനും അത് ആഗോളപ്രാദേശിക തലത്തിലേക്ക് വ്യാപിപ്പിക്കാനും ചൈന ആഗ്രഹിക്കുന്നതായും ലീ പറഞ്ഞു.
അതേസമയം,ലീയും പാകിസ്താന്‍ പ്രധാനമന്ത്രി നവാസ് ഷെരീഫും തമ്മിലുള്ള കൂടിക്കാഴ്ചയില്‍ കശ്മീരിലെ സംഘര്‍ഷമോ, ഉറി ഭീകരാക്രമണമോ ചര്‍ച്ചാ വിഷയമായില്ലെന്ന് സിന്‍ഹുവ വാര്‍ത്താ ഏജന്‍സി റിപ്പോര്‍ട്ട് ചെയ്തു. കശ്മീര്‍ വിഷയത്തില്‍ പാകിസ്താന്റെ നിലപാടിനെ തുടര്‍ന്നും പിന്തുണയ്ക്കുമെന്ന് ചൈന ഉറപ്പു നല്‍കിയതായി പാകിസ്താനിലെ പത്രമായ ഡോണ്‍ ന്യൂസ് റിപ്പോര്‍ട്ട് ചെയ്തു. പാകിസ്താന്് വേണ്ടി ഏത് വേദിയിലും സംസാരിക്കുമെന്നും ലീ പറഞ്ഞതായും പത്രം റിപ്പോര്‍ട്ട് ചെയ്തു.
കശ്മീര്‍ പ്രശ്‌നത്തില്‍ പാകിസ്താന്റെ നിലപാടിനെ അന്താരാഷ്ട്ര സമൂഹം കൂടുതല്‍ വ്യക്തമായി മനസിലാക്കുമെന്ന പ്രതീക്ഷ പ്രകടിപ്പിച്ച ലീ, കശ്മീരിന്റെ പേരില്‍ ഇന്ത്യയും പാകിസ്താനും തമ്മിലുള്ള സംഘര്‍ഷം കൂടുതല്‍ മോശമാവില്ലെന്നാണ് കരുതുന്നതെന്നും പറഞ്ഞു. ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിന് ക്രിയാത്മക പങ്ക് വഹിക്കാന്‍ ചൈന തയ്യാറാണെന്നും ലീ വ്യക്തമാക്കി.