പതിമൂന്നുകാരനെ ആത്മഹത്യയില്‍ നിന്നും രക്ഷപ്പെടുത്തി ദുബായ് പോലീസ്. അമ്മ ഉപേക്ഷിച്ചിട്ട് പോയതിന്റെ നിരാശയില്‍ 13കാരനായ അറബ് ബാലനാണ് ആത്മഹത്യയക്ക് ശ്രമിച്ചത്. ഇതിന് മുന്നോടിയായി താന്‍ സ്വയം ജീവനൊടുക്കാന്‍ പോകുകയാണെന്ന് ഫോണ്‍ വിളിച്ച് ദുബായ് പോലീസിനെ അറിയിച്ചു. ഉടന്‍ സ്ഥലത്തെത്തിയ പോലീസ് വാതില്‍ തള്ളി തുറന്ന് ബാലനെ രക്ഷപ്പെടുത്തുകയായിരുന്നു. വീട്ടിനുള്ളില്‍ കടന്നപ്പോള്‍ ഉറക്കെ കരഞ്ഞു കൊണ്ട് ബാലന്‍ ബ്ലെയ്ഡ് കൊണ്ട് കൈ മുറിക്കാനുള്ള ശ്രമത്തിലായിരുന്നെന്നും വളരെ ബുദ്ധിമുട്ടിയാണ് അതില്‍ നിന്നും ബാലനെ പിന്തിരിപ്പിച്ചതെന്നും സ്ത്രീകളുടെയും കുട്ടികളുടെ സംരക്ഷണ വകുപ്പിന്റെയും ഡയറക്ടര്‍ ലെഫ്റ്റനന്റ് കേണല്‍ സഈദ് റാഷിദ് അല്‍ ഹാളി പറഞ്ഞു.

അമ്മയെ കുറിച്ച് ചോദിച്ചപ്പോള്‍ തന്നെ വീട്ടില്‍ ഒറ്റക്കാക്കി അമ്മ ഇന്ന് ചികിത്സയ്ക്കായി വിദേശരാജ്യത്തേക്ക് പോയി. അതിനു മുന്‍പായി 5,000 ദിര്‍ഹം നല്‍കി. എന്ത് അടിയന്തര ആവശ്യം ഉണ്ടായാലും പോലീസിനെ വിളിക്കണമെന്നു അമ്മ പറഞ്ഞതായി ബാലന്‍ പോലീസിനോട് പറഞ്ഞു. അച്ഛനെ കുറിച്ച് തിരക്കിയപ്പോള്‍ അച്ഛനെ ഇഷ്ട്ടമല്ലെന്നും എന്റെ ഈ അവസ്ഥക്ക് കാരണം അച്ഛനാണെന്നും എന്റെ ആഗ്രഹങ്ങള്‍ ആരും കണ്ടില്ലെന്നും ബാലന്‍ പോലീസിനോട് പറഞ്ഞു. എന്നാല്‍ വിവരമറിഞ്ഞ് സ്ഥലത്തെത്തിയ പിതാവ് തന്റെ മകന്റെ ഈ അവസ്ഥയ്ക്ക് കാരണം താനല്ലെന്ന് പറഞ്ഞു. ഞങ്ങള്‍ വേര്‍പിരിഞ്ഞപ്പോള്‍ അമ്മയാണ് മകന്റെ ചുമതല ഏറ്റെടുത്തത്. അവള്‍ക്ക് ചര്‍മ്മ സംബന്ധമായ അസുഖം ഉണ്ടായിരുന്നു പക്ഷെ താന്‍ മര്‍ദ്ദിച്ച പാടുകളാണതെന്ന് മകനെ പറഞ്ഞു വിശ്വസിപ്പിച്ചു. ഇതിനാലാണ് മകന്‍ തന്നെ വെറുക്കാന്‍ കാരണമെന്ന്' പിതാവ് പറഞ്ഞു.

'ചികിത്സയ്ക്കായല്ല അമ്മ വിദേശരാജ്യത്തേക്ക് പോയത്. എന്നാലും കുട്ടിയെ അപ്പാര്‍ട്‌മെന്റില്‍ ഉപേക്ഷിച്ച് പോകാന്‍ പാടില്ലായിരുന്നെന്നും ഷാര്‍ജയിലെ സാമൂഹ്യസേവന വകുപ്പ് കുട്ടിക്ക് കൗണ്‍സിലിംഗ് നല്‍കിയതായും' ദുബായ് പൊലീസിന്റെ മനുഷ്യാവകാശ വകുപ്പ് ഡയറക്ടര്‍ ജനറല്‍ ബ്രിഗേഡിയര്‍ ജനറല്‍ മൊഹമ്മദ് അബ്ദുല്ല അല്‍ മുര്‍ പറഞ്ഞു. 'കൗണ്‍സിലിംഗിന് ശേഷം കുട്ടിക്ക് അച്ഛനോടുള്ള തെറ്റിദ്ധാരണകള്‍ മാറി. ഇതേതുടര്‍ന്ന് കുട്ടിയുടെ സംരക്ഷണം അമ്മയില്‍ നിന്നും മാറ്റി അച്ഛന് നല്കാന്‍ ദുബായ് പബ്ലിക് പ്രോസിക്യൂഷന്‍ ഒരു കത്ത് സമര്‍പ്പിച്ചിട്ടുണ്ട്. കേസ് പരിഗണിക്കുന്നത് വരെ കുട്ടി പിതാവിനോടൊപ്പമായിരിക്കും കഴിയുക.