അവര്‍ നമ്മളെപ്പോലെയൊന്നുമല്ല, വാക്ക്‌ പറഞ്ഞാല്‍ വാക്കാണ്‌… കേരളത്തില്‍ നിന്നും ക്രിസ്‌തുമസ്‌ ആഘോഷിക്കാനായി ഇറ്റാലിയന്‍ നാവികര്‍ നാട്ടില്‍ പോയപ്പോള്‍ വിമര്‍ശനങ്ങളെ തള്ളിക്കളഞ്ഞുകൊണ്ട്‌ പലരും പറഞ്ഞ വാക്കുകളാണ്‌. ആദ്യം ക്രിസ്‌തുമസ്‌ ആഘോഷിക്കാന്‍ പോയി പറഞ്ഞ സമയത്തിനുള്ളില്‍ തിരിച്ചുവന്ന്‌ എല്ലാവരുടേയും കൈയ്യടി സമ്പാദിച്ചു.
ക്രിസ്‌തുമസ്‌ കഴിഞ്ഞു. ഇനി ഇറ്റലിയിലെ അടുത്ത വിശേഷം തെരഞ്ഞെടുപ്പാണ്‌. ഏറ്റവും വലിയ ജനാധിപത്യ രാജ്യമായ ഇന്ത്യക്കാര്‍ വോട്ടെടുപ്പിന്‌ പോകുന്ന ഒരാളെ തടയുവാനോ… പാടില്ല. ഇറ്റലിയിലെ തെരഞ്ഞെടുപ്പില്‍ വോട്ട്‌ ചെയ്യാനായി പോകാനുള്ള അനുമതിക്കായി അവര്‍ കോടതിയെ സമീപിച്ചു. ഇറ്റലിയില്‍ നടന്ന തിരഞ്ഞെടുപ്പില്‍ വോട്ടു ചെയ്യുന്നതിന് നാലാഴ്ചത്തേക്ക് നാട്ടില്‍ പോകാനാണ് കടല്‍ക്കൊല കേസിലെ പ്രതികള്‍ക്ക് ഫിബ്രവരി 22-ന് ചീഫ് ജസ്റ്റീസ് അല്‍തമാസ് കബീര്‍ അധ്യക്ഷനായ ബെഞ്ച് അനുമതി നല്‍കിയത്. ഇന്ത്യയിലെ ഇറ്റാലിയന്‍സ്ഥാനപതി ഇരുവരെയും മടക്കിക്കൊണ്ടുവരാമെന്ന് സത്യവാങ്മൂലം നല്‍കിയതിനെ തുടര്‍ന്നാണ് സുപ്രീം കോടതി ഇരുവരെയും പോകാന്‍ അനുവദിച്ചത്.

എന്നാല്‍ നാട്ടിലെത്തി ഇറ്റാലിയന്‍ കാറ്റേറ്റതോടെ അവരുടെ മനസ്‌ മാറി. ഇറ്റാലിയന്‍ നാവികര്‍ ഇനി തിരിച്ചു വരില്ലെന്നാണ്‌ ഇറ്റലി ഔദ്യോഗികമായി ഇന്ത്യയെ അറിയിച്ചത്‌. ഇന്ത്യന്‍ കോടതിയേയും ഭരണകൂടത്തേയും അവഹേളിക്കുന്ന നടപടിയായാണ്‌ പലരും ഇതിനെ കാണുന്നത്‌.
ഇപ്പോള്‍ ഇറ്റലി പറയുന്നത്‌ കടല്‍ കോലപാതകം അന്താരാഷ്‌ട്ര വിഷയമാമെന്നും ഇരു രാജ്യങ്ങളും തമ്മില്‍ കുറ്റവാളികളെ പരസ്‌പരം കൈമാറുന്ന കരാറില്‍ ഒപ്പിട്ടതുമാണെന്നാണ്‌. ആയതിനാല്‍ ഇരുവരും ഇന്ത്യയിലേക്ക്‌ മടങ്ങേണ്ടതില്ലെന്നാണ്‌ ഇറ്റലിയുടെ തീരുമാനം.

ലോകത്തിന്റെ പല രാജ്യങ്ങളിലേയും ജയിലുകലില്‍ കഴിയുന്ന ഇന്ത്യക്കാര്‍ പുറം ലോകം കാണാതെ കിടക്കുന്ന സന്ദര്‍ഭത്തിലാണ്‌ കടല്‍ കൊലപാതക കേസിലെ പ്രതികള്‍ സര്‍വ സ്വാതന്ത്ര്യവും നേടി ഒരു നാടിനെത്തന്നെ പറ്റിച്ചു കടന്ന്‌ കളഞ്ഞത്‌.ഇപ്പോള്‍ ഇറ്റലി ഉന്നയിക്കുന്ന വിഷയം കോടതിയില്‍ വാദത്തിന്റെ ഒരു ഘട്ടത്തിലും ഉന്നയിച്ചിട്ടില്ല. കുറ്റവാളികളെ കൈമാറുന്ന കരാര്‍ നടപ്പാകണമെങ്കില്‍ ഇരുവരെയും കുറ്റക്കാരായി കണ്ടെത്തി ശിക്ഷ വിധിക്കണം. അതുണ്ടായിട്ടില്ലെന്ന് നിയമവൃത്തങ്ങള്‍ ചൂണ്ടിക്കാട്ടുന്നു. 
ജനുവരി പത്തിന് ഇരുവരും തിരിച്ചെത്തിയതിനുശേഷമാണ് ഇറ്റലിയുടെ ഹര്‍ജിയില്‍ സുപ്രീംകോടതി വിധി പറഞ്ഞത്. കേരളത്തിന് ഇരുവര്‍ക്കുമെതിരെ കേസ്സെടുക്കാന്‍ അനുവാദമില്ലെന്നും കേന്ദ്ര സര്‍ക്കാറാണ് കേസെടുക്കേണ്ടതെന്നും ചീഫ് ജസ്റ്റീസിന്റെ ബെഞ്ച് വിധിച്ചു. ഇരുവരെയും വിചാരണ ചെയ്യുന്നതിന് പ്രത്യേക കോടതി രൂപവത്കരിക്കണമെന്നും ഉത്തരവിട്ടു. 
പ്രത്യേക കോടതി രൂപവത്കരിക്കുന്നത് നീട്ടിക്കൊണ്ടുപോയ കേന്ദ്ര സര്‍ക്കാര്‍, ഇരുവര്‍ക്കും നാട്ടിലേക്ക് കടക്കാന്‍ വഴിയൊരുക്കിയെന്ന ആരോപണം ഇനിയുയരും. പ്രശ്‌നം നയതന്ത്രതലത്തില്‍ പരിഹരിക്കുന്നതിന് പലവട്ടം ഇന്ത്യയോട് ആവശ്യപ്പെട്ടിട്ടും നടന്നില്ലെന്ന് ഇറ്റലി കുറ്റപ്പെടുത്തുന്നു.