ടോണി ജെറാള്‍ഡോ, സഹോദരന്‍ ആല്‍വേറോ പെരേര എന്നിവരുടെ മസില്‍പ്പെരുക്കം കണ്ടാല്‍ അമ്പരപ്പുളവാകും.യഥാക്രമം 49 ഉം 50 ഉം വയസ്സുള്ള ഇവരുടെ കൈകളിലെ മസിലിന്റെ വലുപ്പം കാഴ്ചക്കാരെ ആകര്‍ഷിക്കും. ആര്‍നോള്‍ഡ് ഷ്വാര്‍സ്‌നഗറിനെ മാതൃകയാക്കിയാണ് ഈ റിയോഡി ജനീറോ സ്വദേശികള്‍ മസിലുരുട്ടിയത്.

എന്നാല്‍ ഇവര്‍ എങ്ങിനെയാണ് മസില്‍ ഇത്രയും പെരുപ്പിച്ചതെന്നറിയണ്ടേ. പൊടെനേ ബി 12 എന്ന രാസവസ്തു കൈകളില്‍ കുത്തിവെയ്ക്കുകയാണ് ചെയ്യുന്നത്. മസില്‍ വലിപ്പം 28 ഇഞ്ചിലെത്തിക്കുകയാണ് ഇവരുടെ ലക്ഷ്യം. ആഴ്ചയില്‍ രണ്ട് തവണയാണ് കുത്തിവെപ്പ്.

കുതിരകളിലും പശുക്കളിലും എല്ലാം ഉപയോഗിക്കുന്ന പ്രത്യേകതരം കെമിക്കല്‍ ആണിത്. ഈ രാസവസ്തു ശരീരത്തിന് അത്യന്തം ഹാനികരമാണെന്ന് വൈദ്യശാസ്ത്ര രംഗത്തെ വിദഗ്ധര്‍ സാക്ഷ്യപ്പെടുത്തുന്നു. കുത്തിവെപ്പ് ശീലമാക്കിയാല്‍ പിന്നെ മോചനം സാധ്യമല്ല. ഈ ശീലത്തിന് അടിമപ്പെട്ടുപോകും. കൂടാതെ ഇത് കരളിനെയും കിഡ്‌നിയെയും ഗുരുതരമായി തകരാറിലാക്കും.

കടുത്ത വിഷാദത്തിലേക്ക് വ്യക്തിയെ നയിക്കുകയും ചെയ്യും. ടോണിയില്‍ രക്തസമ്മര്‍ദ്ദം ഉയര്‍ന്ന അളവിലാണ്. അതിനാല്‍കൂടി ഇതുപയോഗിക്കുന്നതിനെതിരെ അദ്ദേഹത്തിന്റെ ഭാര്യ രംഗത്തുവന്നിരുന്നു. എന്നാല്‍ ഇക്കാര്യങ്ങള്‍ ഇഷ്ടപ്പെടുന്നില്ലെങ്കില്‍ തന്നെ വിട്ട് പോകാമെന്നായിരുന്നു ഭാര്യയോടുള്ള ടോണിയുടെ മറുപടി.

താന്‍ എങ്ങനെയിരിക്കുന്നോ അതുപോലെ, തന്നെ ഉള്‍ക്കൊള്ളണമെന്നാണ് ടോണി എല്ലാവരോടും പറയുന്നത്.പ്രതിദിനം 12,000 കലോറി ശരീരത്തിന് ലഭിക്കുന്ന ഭക്ഷണമാണ് ഇരുവരും കഴിക്കുന്നത്. പരിശീലനത്തിന് മുന്‍പ് 12 പഴവും 6 മുട്ടകളുടെ വെള്ളയും നിര്‍ബന്ധമാണ്. മരുന്നുകള്‍ കുത്തിവെച്ച് മസില്‍ പെരുപ്പിച്ച റഷ്യന്‍ സ്വദേശിയായ 21 കാരന്‍ കിറില്‍ ടെറഷിനെക്കുറിച്ച് നേരത്തേ വാര്‍ത്തകള്‍ വന്നിരുന്നു.

ഇത്തരത്തില്‍ കെമിക്കലുകള്‍ ഉപയോഗിച്ചാല്‍ ചലനശേഷി നഷ്ടപ്പെടുകയോ കൈകള്‍ മുറിച്ചുമാറ്റേണ്ടി വരികയോ മരണമടക്കം സംഭവിക്കുകയോ ചെയ്യാമെന്ന് ഡോക്ടര്‍മാര്‍ ഇദ്ദേഹത്തിന് പലകുറി മുന്നറിയിപ്പ് നല്‍കിയിരുന്നു.