ഇന്ത്യക്കാര്‍ ഉള്‍പ്പെടെയുള്ള കുടിയേറ്റ തൊഴിലാളികള്‍ക്ക് തിരിച്ചടിയായി അമേരിക്ക എച്ച് വണ്‍ ബി വിസ
മാതൃകമ്പനിയില്‍ നിന്ന് മറ്റ് കമ്പനികളിലേക്ക് ജോലിക്ക് ( ഡെപ്യൂട്ടേഷന്‍ ) പോകുന്നവര്‍ക്ക് മൂന്ന് വര്‍ഷത്തില്‍ താഴെ മാത്രമേ വിസ അനുവദിക്കൂ എന്നാണ് പുതിയ വ്യവസ്ഥ. ഇതോടെ മൂന്ന് വര്‍ഷത്തേക്കുള്ള വിസ ഒറ്റത്തവണയായി കിട്ടുന്ന സമ്പ്രദായമാണ് ഇല്ലാതാകുന്നത്.
അമേരിക്കയിലെ ഇന്ത്യന്‍ ഐ. ടി കമ്പനികള്‍ക്കും ജീവനക്കാര്‍ക്കും ഈ വ്യവസ്ഥ തിരിച്ചടിയാകും. മറ്റു കമ്പനികളിലേക്ക് പോകുന്നവര്‍ എന്തിനാണ് പോകുന്നത്, ജോലിയുടെ സ്വഭാവം, അതില്‍ അവര്‍ക്കുള്ള നൈപുണ്യം, ശമ്പളം, ജോലിയുടെ കാലയളവ് തുടങ്ങി നിരവധി വിവരങ്ങള്‍ കമ്പനി വെളിപ്പെടുത്തണം. ഡെപ്യൂട്ടേഷനില്‍ പോകുന്ന അത്രയും കാലത്തേക്കുള്ള വിസ മാത്രമായിരിക്കും അനുവദിക്കുക.
അമേരിക്കയിലെ ഇന്ത്യന്‍ ഐ.ടി കമ്പനികളാണ് എച്ച് വണ്‍ ബി വിസയുടെ ഏറ്റവും വലിയ ഉപഭോക്താക്കള്‍. കൂടാതെ, അമേരിക്കയിലെ ബാങ്കിംഗ്, സഞ്ചാര, വാണിജ്യ മേഖലകളിലും എച്ച് വണ്‍ ബി വിസയില്‍ നിരവധി ഇന്ത്യന്‍ ടെക്കികള്‍ ജോലിചെയ്യുന്നുണ്ട്. യോഗ്യരായ അമേരിക്കന്‍ പൗരന്മാരുടെ കുറവാണ് ഇതിനു കാരണമായി പറയുന്നത്. ഇത്തരം മേഖലകളില്‍ കഴിവുള്ള മറ്റുള്ളവരെ ജോലിക്കെടുക്കാമെന്നും അവര്‍ക്ക് താത്കാലിക വിസ അനുവദിക്കാമെന്നും പറയുന്നുണ്ട്.
വ്യാഴാഴ്ച പുറത്തിറക്കിയ യു. എസ് സിറ്റിസണ്‍ഷിപ്പ് ആന്‍ഡ് എമിഗ്രേഷന്‍ സര്‍വീസസിന്റെ എഴുപേജുള്ള നയ രേഖയിലാണ് പുതിയ വിസ വ്യവസ്ഥ പറയുന്നത്. അമേരിക്കക്കാര്‍ക്ക് തൊഴിലവസരങ്ങള്‍ വര്‍ദ്ധിപ്പിക്കുക എന്ന ലക്ഷ്യത്തോടെയാണ് വിസ വ്യവസ്ഥകള്‍ കര്‍ശനമാക്കുന്നത്.
വിഗദ്ധ മേഖലയില്‍ ബിരുദമുള്ള അപേക്ഷകര്‍ക്ക് ലഭിക്കുന്ന ഹ്രസ്വകാല വിസയാണ് എച്ച് വണ്‍ ബി.
അമേരിക്കയിലെ 2019 സാമ്പത്തിക വര്‍ഷത്തിലെ എച്ച് വണ്‍ ബി വിസയുടെ അപേക്ഷാ സീസണ്‍ ഏപ്രില്‍ 2ന് തുടങ്ങാനിരിക്കെ, പുതിയ വിസ വ്യവസ്ഥ അടിയന്തരമായി പ്രാബല്യത്തില്‍ വന്നു.
എച്ച് വണ്‍ ബി വിസ നീട്ടാനുള്ള വ്യവസ്ഥകളും കൂടുതല്‍ കര്‍ശനമാക്കി. മുന്‍ ജോലിയുടെ കരാര്‍ കമ്പനി അവസാനിപ്പിക്കുകയും താല്‍ക്കാലികമായി ജോലി ഇല്ലാതാവുകയും ചെയ്യുന്നവരുടെ കാര്യത്തില്‍ പ്രത്യേകിച്ചും. ഈ കാലയളവില്‍ എച്ച് വണ്‍ ബി വിസ നിലവിലുണ്ടെങ്കിലും ശമ്പളം ഉണ്ടാവില്ല. ഇത് നിയമവിരുദ്ധമാണ്.
https://www.facebook.com/Malayalivartha
