സിറിയയില്‍ റഷ്യന്‍ വിമാനം ലാന്‍ഡിങ്ങിനിടെ തകര്‍ന്നുവീണ് 32 പേര്‍ മരിച്ചു. സിറിയയിലെ ഹിമീമീം വ്യോമതാവളത്തിലാണ് അപകടമുണ്ടായത്. വിമാനത്തില്‍ 26 യാത്രക്കാരും ആറു ജീവനക്കാരുമാണുണ്ടായിരുന്നതെന്നും എല്ലാവരും കൊല്ലപ്പെട്ടതായും റഷ്യന്‍ പ്രതിരോധ മന്ത്രാലയം സ്ഥിരീകരിച്ചു.സാങ്കേതിക തകരാറാണ് അപകടകാരണമെന്നാണ് പ്രാഥമിക വിലയിരുത്തലെന്നും മന്ത്രാലയം വക്താവ് പറഞ്ഞു.
വിമാനത്തിനുനേരെ വെടിവെപ്പോ ആക്രമണമോ ഉണ്ടായിട്ടില്ല. അപകടകാരണം സംബന്ധിച്ച് വിശദമായ അന്വേഷണത്തിന് കമീഷനെ നിയമിച്ചിട്ടുണ്ട്. അപകടത്തില്‍ മരിച്ചവരില്‍ സൈനികരുണ്ടോ എന്ന് വ്യക്തമായിട്ടില്ല.
സിറിയയില്‍ സര്‍ക്കാര്‍ സേനയെ സഹായിക്കുന്ന റഷ്യയുടെ പ്രധാന സൈനിക താവളമാണ് ഹിമീമീം വ്യോമതാവളം. പ്രസിഡന്റ് ബശ്ശാര്‍ അല്‍അസദിന്റെ സേനയെ സഹായിക്കാന്‍ 2015 മുതലാണ് റഷ്യന്‍ സൈന്യം സിറിയയിലെത്തിയത്. പ്രധാനമായും വ്യോമാക്രമണങ്ങളാണ് റഷ്യ സിറിയയില്‍ നടത്തുന്നത്.