വയനാട് മേപ്പാടിയിലെ റിസോര്‍ട്ടില്‍ തങ്ങള്‍ അതിക്രമിച്ചെത്തി തോഴിലാളികളെ ഭീഷണിപ്പെടുത്തി ബന്ദികളാക്കി വെടിയുതിര്‍ത്തെന്ന വാര്‍ത്ത പൊലീസ് കെട്ടിച്ചമച്ചതെന്ന് മാവോയിസ്റ്റുകളുടെ വാര്‍ത്താക്കുറിപ്പ്
കഴിഞ്ഞ വെള്ളിയാഴ്ച വയനാട് മേപ്പാടിയിലെ റിസോര്‍ട്ടില്‍ മാവോയിസ്റ്റുകള്‍ അതിക്രമിച്ചെത്തി തോഴിലാളികളെ ഭീഷണിപ്പെടുത്തി ബന്ദികളാക്കി വെടിയുതിര്‍ത്തെന്ന വാര്‍ത്ത പൊലീസ് കെട്ടിച്ചമച്ചതെന്ന് സി.പി.ഐ മാവോയിസ്റ്റ് വാര്‍ത്താക്കുറിപ്പിറക്കി. സി.പി.ഐ മാവോയിസ്റ്റ് നാടുകാണി ഏരിയാ സമിതിയാണ് വയനാട് പ്രസ്‌ക്ലബില്‍ വാര്‍ത്താക്കുറിപ്പ് എത്തിച്ചത്. നാടുകാണി ഏരിയാ സമിതിയുടെ കീഴിലുള്ള ദളം പതിവ് ഗ്രാമ സന്ദര്‍ശനത്തിന്റെ ഭാഗമായാണ് മേപ്പാടി തൊള്ളായിരം പ്രദേശത്തെ എമറാള്‍ഡ് ഗ്രൂപ്പിന്റെ നിര്‍മാണം നടക്കുന്ന റിസോര്‍ട്ടില്‍ എത്തിയത്. ബംഗാള്‍ സ്വദേശികളായ തൊഴിലാളികളോട് തൊഴിലിനെ കുറിച്ചും ജീവിതസാഹചര്യങ്ങളെ കുറിച്ചും ചോദിച്ചറിഞ്ഞു. മാവോയിസ്റ്റുകള്‍ മുന്നോട്ട് വയ്ക്കുന്ന രാഷ്ട്രീയബദലിനെ പറ്റി സംസാരിക്കുകയും ചെയ്‌തെന്ന് വാര്‍ത്താക്കുറിപ്പില്‍ വ്യക്തമാക്കുന്നു.
സംസാരത്തിനിടെ നിസ്‌ക്കരിക്കാന്‍ പോയ തൊഴിലാളി തൊട്ടടുത്തുള്ള റിസോര്‍ട്ടില്‍ പോയി മാവോയിസ്റ്റുകള്‍ വന്ന വിവരം അറിയിക്കുകയായിരുന്നു. മറ്റ് രണ്ട് പേരും തങ്ങള്‍ പിരിയും വരെ സ്ഥലത്തുണ്ടായിരുന്നെന്നും വാര്‍ത്താക്കുറിപ്പില്‍ പറയുന്നു. ഇതിനെയാണ് ബന്ദി നാടകമാക്കി പൊലീസ് പ്രചരിപ്പിച്ചതെന്നും സി.പി.ഐ മാവോയിസ്റ്റ് ആരോപിക്കുന്നു. വളരെ മാന്യമായാണ് തൊഴിലാളികളോട് പെരുമാറിയത്. മലയാളികളായ തൊഴിലാളികള്‍ രാത്രിയില്‍ വരുമെന്നിരിക്കെ അവരോട് സംസാരിക്കാന്‍ രാത്രി ഒന്‍പത് വരെ അവിടെയുണ്ടായിരുന്നു. ഈ സമയം തൊഴിലാളികള്‍ ആരെയോ ഫോണില്‍ ബന്ധപ്പെട്ടപ്പോഴാണ് തെറ്റായ വാര്‍ത്തപ്രചരിക്കുന്നെന്ന വിവരം ലഭിച്ചത്. അതോടെ തിരികെ പോന്നെന്നും സി.പി.ഐ മാവോയിസ്റ്റ് വ്യക്തമാക്കി.
വാസ്തവം ഇതാണെന്നിരിക്കെ ഭരണകൂട ഗൂഢാലോചന തങ്ങള്‍ക്കെതിരെ നടത്തിയത്. പ്രദേശത്തെ തൊഴിലാളികളും കര്‍ഷകരും ആദിവാസികളും ദുരിത ജീവിതമാണ് നയിക്കുന്നത്. അവരെ സമരത്തിന് സജ്ജമാക്കാനുള്ള നീക്കം കുപ്രചരണത്തിലൂടെ പൊളിക്കുകയാണ് ഭരണകൂടം ചെയ്തതെന്നും സി.പി.ഐ മാവോയിസ്റ്റ് വക്താവ് അജിത ഇറക്കിയ വാര്‍ത്താകുറിപ്പില്‍ അറിയിച്ചു. തപാല്‍മാര്‍ഗമാണ് വയനാട് പ്ലസ്‌ക്ലബില്‍ വാര്‍ത്താക്കുറിപ്പ് എത്തിച്ചത്.
https://www.facebook.com/Malayalivartha
