സിപിഐ പിരിച്ചുവിടണമെന്ന് മുന്‍ മുഖ്യമന്ത്രി സി.അച്യുതമേനോന്‍ എഴുതിയ കത്ത് ചര്‍ച്ചയാകുന്നു.സിപിഎമ്മിനെ പേടിച്ച് പുസ്തക പ്രകാശനം വേണ്ടെന്നു വെച്ച സിപിഐക്കെതിരെ, അച്യുതമേനോന്‍ എഴുതിയ കത്തുമായി പഴയ സിപിഐ സഹയാത്രികനും പരിസ്ഥിതി പ്രവര്‍ത്തകനുമായ ഇന്ത്യനുര്‍ഗോപിയാണ് രംഗത്തെത്തിയിരിക്കുന്നത്. സിപിഎമ്മിന് ദാസ്യ വൃത്തി ചെയ്യുന്ന സിപിഐ പിരിച്ചു വിടുകയാണ് ഉത്തമമെന്ന് പറഞ്ഞ് 23 വര്‍ഷം മുമ്പ് അച്യുതമേനോന്‍ തനിക്കെഴുതിയ കത്ത് പുറത്തു വിട്ടാണ് ഗോപി സംസ്ഥാന നേതൃത്വത്തിനെതിരെ രംഗത്തെത്തിയിരിക്കുന്നത്.
തെക്കുംഭാഗം മോഹന്‍ എഴുതിയ ജനാധിപത്യ കേരളത്തില്‍ അച്യുതമേനോന്‍ എന്ന പുസ്തകം സിപിഐ യുടെ പ്രസിദ്ധീകരണ വിഭാഗമായ പ്രഭാത് ബുക് ഹൗസ് തഴഞ്ഞതിന് പിന്നില്‍ നേതൃത്വത്തിന്റെ സിപിഎം ദാസ്യമാണന്ന് വ്യക്തമായതുകൊണ്ടാണ് കത്ത് പുറത്തുവിടുന്നതെന്ന് ഗോപി മാഷ് പറയുന്നു. 1991 ആഗസ്റ്റ് ഏഴിന് അച്യുതമേനോന്‍ തനിക്കെഴുതിയ കത്താണ് ഗോപി മാഷ് പുറത്തുവിട്ടത്. പ്രഭാത് ബുക് ഹൗസിന്റെ ഈ നടപടി നാണം കെട്ടതാണെന്നും അദ്ദേഹം പറഞ്ഞു.
1987ല്‍ അധികാരത്തില്‍ വന്ന നായനാര്‍ മന്ത്രിസഭയുടെ മേല്‍ എകെജി സെന്ററില്‍ നിന്നുളള കടുത്ത നിയന്ത്രണങ്ങളാണ് പിന്നീടുള്ള തെരഞ്ഞെടുപ്പില്‍ ഇടതുമുന്നണിയുടെ പരാജയത്തിന് കാരണമായതെന്ന് കത്തില്‍ അച്യുതമേനോന്‍ പറയുന്നു.മന്ത്രിസ്ഥാനവും എം.എല്‍എ സ്ഥാനവും ഇല്ലെങ്കില്‍ സിപിഐ വട്ടപൂജ്യം. അതാണ് നമ്മുടെ ഗതികേട്. സിപിഐ പിരിച്ചു വിടുകയാണ് ഉത്തമം.എന്നാല്‍, സിപിഎം ഭാവിയുള്ള പാര്‍ട്ടിയെന്ന് ഞാന്‍ വിശ്വസിക്കുന്നു. ഇന്‍ലെന്റില്‍ എഴുതിയ കത്തിലെ ചില വാചകങ്ങളാണിത്.
ഭാരതപ്പുഴ സംരക്ഷണ സമിതിയുടെ സെക്രട്ടറിയായ ഗോപി, 1985 വരെ സിപി ഐയില്‍ ആയിരുന്നു. പാര്‍ട്ടിയുടെ സ്റ്റേറ്റ് ഡിപ്പാര്‍ട്ട്‌മെന്റ് കമ്മിറ്റി അംഗം, ജില്ലാ കമ്മിറ്റി അംഗം എന്നീ സ്ഥാനങ്ങള്‍ വഹിച്ചിട്ടുണ്ട്. പരിസ്ഥിതി പ്രവര്‍ത്തനങ്ങളില്‍ ഏര്‍പ്പെടുത്തതിനാണ് പാര്‍ട്ടിയില്‍ നിന്ന് അകന്നത്. അടയ്ക്കാപുത്തൂര്‍ ഹൈസ്‌കൂളില്‍ നിന്ന് 30 വര്‍ഷത്തെ സേവനത്തിനുശേഷം വിരമിച്ച അദ്ദേഹം പിന്നീ് മുഴുവന്‍ സമയ പരിസ്ഥിതി പ്രവര്‍ത്തകനായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha