താരസംഘടനയായ അമ്മയുമായി ബന്ധപ്പെട്ട അഡ്‌ഹോക് കമ്മിറ്റി രൂപീകരണത്തിനെതിരെ നല്‍കിയ ഹര്‍ജിയില്‍ കക്ഷി ചേരാനുള്ള നടി അന്‍സിബ ഹസന്റെ ആവശ്യത്തിനെതിരെ നടി ശ്വേത മേനോന്‍. കേസിലെ നടപടികള്‍ നീട്ടിക്കൊണ്ടു പോകുന്നതിനും വ്യക്തിപരമായ വൈരാഗ്യം തീര്‍ക്കുന്നതിനുമാണ് അന്‍സിബ കക്ഷി ചേരാന്‍ ശ്രമിക്കുന്നതെന്ന് എറണാകുളം രണ്ടാം അഡീഷണല്‍ മുന്‍സിഫ് കോടതിയില്‍ നല്‍കിയ എതിര്‍ സത്യവാങ്മൂലത്തില്‍ ശ്വേത ആരോപിച്ചു.

2025-2028 കാലയളവിലേക്ക് 'അമ്മ'യുടെ പ്രസിഡന്റായി തിരഞ്ഞെടുക്കപ്പെട്ട തന്റെ പ്രവര്‍ത്തനങ്ങള്‍ക്ക് തടസം നില്‍ക്കുന്നതില്‍ നിന്നും രമേശ് പിഷാരടിയെ തടയണമെന്നും 2026 ജൂണ്‍ 21ന് രൂപീകരിച്ച അഡ്‌ഹോക്ക് കമ്മിറ്റി നിയമവിരുദ്ധമായി പ്രഖ്യാപിക്കണമെന്നും ആവശ്യപ്പെട്ടാണ് ശ്വേത മേനോന്‍ കോടതിയെ സമീപിച്ചത്. താന്‍ അഡ്‌ഹോക് കമ്മിറ്റിയുടെ ഭാരവാഹിത്വത്തില്‍ നിന്ന് ഒഴിഞ്ഞെന്നും ഈ സാഹചര്യത്തില്‍ കേസില്‍ നിന്ന് തന്നെ ഒഴിവാക്കണമെന്നും ആവശ്യപ്പെട്ട് പിഷാരടി കഴിഞ്ഞ ദിവസം കോടതിയില്‍ സത്യവാങ്മൂലം നല്‍കിയിരുന്നു.

അന്‍സിബയ്ക്ക് ഈ കേസില്‍ കക്ഷി ചേരാനുള്ള യാതൊരു സാഹചര്യവുമില്ലെന്ന് ശ്വേത വാദിക്കുന്നു. അന്‍സിബ അഡ്‌ഹോക്ക് കമ്മിറ്റിയുടെ ഭാഗമല്ല. ഈ സാഹചര്യത്തില്‍ അന്‍സിബ കേസില്‍ കക്ഷിയല്ലെങ്കിലും അന്തിമവിധിയെ ബാധിക്കില്ല. അഡ്‌ഹോക്ക് കമ്മിറ്റിയുടെ നിയമസാധുത കേവലം ബൈലോയും നിയമവശങ്ങളും പരിശോധിച്ചു തീരുമാനിക്കേണ്ട ഒന്നാണെന്നിരിക്കെ ഒരു സാധാരണ അംഗത്തെ കക്ഷി ചേര്‍ക്കുന്നത് കേസിന്റെ സ്വഭാവം തന്നെ മാറ്റുമെന്നും ശ്വേത പറയുന്നു. വ്യക്തിപരമായ കാരണങ്ങളാല്‍ നേരത്തെ അമ്മ സംഘടനയില്‍ നിന്ന് രാജി സമര്‍പ്പിച്ച അന്‍സിബ, സംഘടനയുടെ എക്‌സിക്യൂട്ടീവ് കമ്മിറ്റിക്കെതിരെ വ്യാജ ആരോപണങ്ങളും ക്രിമിനല്‍ കേസുകളും ഉന്നയിക്കുന്നത് ദുരുദ്ദേശ്യപരമാണെന്നും ശ്വേത ആരോപിക്കുന്നു. പെന്‍ഷന്‍, കൈനീട്ടം അടക്കമുള്ള ക്ഷേമപദ്ധതികള്‍ മുടക്കാനാണ് ഒരു വിഭാഗം ശ്രമിക്കുന്നതെന്നും എതിര്‍ സത്യവാങ്മൂലത്തില്‍ ആരോപണമുണ്ട്.

തനിക്കെതിരെ അന്‍സിബ മാധ്യമങ്ങള്‍ക്ക് മുന്നില്‍ സംസാരിക്കുകയും താന്‍ ഓഫിസില്‍ പ്രവേശിക്കുന്നത് തടയുമെന്ന് ഭീഷണിപ്പെടുത്തുകയും ചെയ്തിരുന്നുവെന്ന് ശ്വേത പറയുന്നു. സംഘടനയുടെ നിയമാവലി പ്രകാരം പരാതികള്‍ പരിഹരിക്കാന്‍ അന്‍സിബയ്ക്ക് മറ്റു വഴികളുണ്ടെന്നിരിക്കെ കോടതി സമയം നഷ്ടപ്പെടുത്തിയതിന് പിഴ ചുമത്തി കക്ഷി ചേരല്‍ ആവശ്യം തള്ളണമെന്നാണ് ശ്വേത ആവശ്യപ്പെട്ടിരിക്കുന്നത്.