അഴിമതിയെ തുരത്താന്‍ യുവജനതയെ സജ്ജരാക്കുന്ന 'പ്രൊജക്ട് സീറോ വിജിലന്‍സ് വിസില്‍' പരിപാടിയുടെ ഉദ്ഘാടനത്തില്‍ നടന്‍ നിവിന്‍പോളിയുടെ പേര് തെറ്റിപ്പറഞ്ഞത് മനസ്സിലാക്കിയ ആഭ്യന്തരമന്ത്രി രമേശ് ചെന്നിത്തല ഉടനെ തിരുത്തി. 'നിങ്ങള്‍! എല്ലാം കാത്തിരിക്കുന്ന പ്രിയപ്പെട്ട ആക്ഷന്‍ ഹീറോ നവീന്‍പോളി... എനിക്ക് തെറ്റിപ്പോയി... നിങ്ങള്‍ക്കുതന്നെ പേരു പറയാം... ആരാണ് ആക്ഷന്‍ ഹീറോ...' – മന്ത്രി സദസ്സിനോട് ചോദിച്ചു.

ആക്ഷന്‍ ഹീറോ നിവിന്‍ പോളിയാണെന്ന് സദസ്സ് വിളിച്ചു പറഞ്ഞപ്പോള്‍, അതെ നിവിന്‍ പോളിയാണ് ആക്ഷന്‍ ഹീറോയെന്ന് മന്ത്രി പറഞ്ഞു. വിജിലന്‍സ് വകുപ്പും വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോയും ചേര്‍ന്നാണ് പദ്ധതി നടപ്പിലാക്കുന്നത്. ചടങ്ങില്‍ ആദ്യ വിജിലന്‍സ് കമാന്‍ഡോ ആയി മാറിയ നിവിന്‍ പോളി യുവജനങ്ങള്‍ക്ക് വേണ്ടിയുള്ള പ്രതിജ്ഞ ചൊല്ലിക്കൊടുത്തു.

യുവജനങ്ങളുടെ സജീവ പങ്കാളിത്തത്തോടെ അഴിമതിരഹിതമായ കേരളം വാര്‍ത്തെടുക്കുകയാണ് പ്രൊജക്ട് സീറോയുടെ പ്രധാന ലക്ഷ്യമെന്ന് രമേശ് ചെന്നിത്തല പറഞ്ഞു. അഴിമതിക്കെതിരെ പോരാടാന്‍ യുവജനങ്ങളെ 'വിജിലന്‍സ് കമാന്‍ഡോകള്‍' ആയി അണിനിരത്തും. ആഭ്യന്തര വിജിലന്‍സ് ഓഫിസര്‍മാര്‍ക്കായി വര്‍ക്‌ഷോപ്പുകള്‍ സംഘടിപ്പിക്കും.

അഴിമതി സംബന്ധിച്ച വിവരങ്ങള്‍ ജനങ്ങള്‍ക്ക് 1064 എന്ന ടോള്‍ ഫ്രീ നമ്പരിലൂടെ റിപ്പോര്‍ട്ട് ചെയ്യാം. വിവരം നല്‍കുന്നവരുടെ ഔദ്യോഗിക വിവരങ്ങള്‍ രഹസ്യമായി സൂക്ഷിക്കും. കൂടുതല്‍ വിവരങ്ങള്‍ക്കും പദ്ധതിയില്‍ പങ്കുചേരുന്നതിനുമായി:www.vigilance.kerala.gov.in