പെരുമണ്ണ മുണ്ടുപാലത്തെ വാടകവീട്ടില്‍ ഇരിങ്ങല്ലൂര്‍ പുല്ലൂക്ക് ചാലില്‍ ഷെരീഖ് അഹമ്മദ് (36) മരിച്ച സംഭവം കൊലപാതകമാണെന്ന് പോസ്റ്റ്മോര്‍ട്ടം റിപ്പോര്‍ട്ട്. ശരീരത്തില്‍ കാര്യമായ ബാഹ്യ മുറിവുകളോ രക്തക്കറയോ ഇല്ലാതിരുന്നതിനാല്‍ പോലീസിനെയും ഫോറന്‍സിക് വിദഗ്ധരെയും ഒരുപോലെ കുഴക്കിയ മരണത്തിലാണ് നിര്‍ണ്ണായകമായ പോസ്റ്റ്മോര്‍ട്ടം വിവരങ്ങള്‍ പുറത്തുവന്നത്.

കഴുത്തിനേറ്റ കടുത്ത പരിക്കും അമര്‍ത്തിയപ്പോഴുണ്ടായ ആന്തരിക ക്ഷതങ്ങളുമാണ് മരണകാരണമെന്ന് റിപ്പോര്‍ട്ടില്‍ വ്യക്തമാക്കുന്നു. ഇതോടെ സംഭവത്തില്‍ കസ്റ്റഡിയിലുള്ള ഷെരീഖിന്റെ സുഹൃത്തും ഒളവണ്ണ ഇരിങ്ങല്ലൂര്‍ സ്വദേശിയുമായ അഷറഫിനെ കേസിലെ പ്രധാന പ്രതിയായി ചേര്‍ക്കുമെന്ന് പന്തീരാങ്കാവ് പോലീസ് അറിയിച്ചു.

തിങ്കളാഴ്ച രാത്രിയോടെയാണ് പോലീസിനെ ഞെട്ടിച്ചുകൊണ്ട് മുഹമ്മദ് അഷറഫ് പന്തീരാങ്കാവ് പോലീസ് സ്റ്റേഷനിലേക്ക് നേരിട്ടെത്തുന്നത്. 'ഞാന്‍ എന്റെ സുഹൃത്തിനെ തലയ്ക്കടിച്ച് കൊലപ്പെടുത്തി, മൃതദേഹം പെരുമണ്ണ പുത്തൂര്‍മഠത്തിന് സമീപമുള്ള മുണ്ടുപാലത്തെ വാടകവീട്ടിലുണ്ട്' എന്നായിരുന്നു ഇയാളുടെ മൊഴി. കേട്ടപാതി കേള്‍ക്കാത്തപാതി പോലീസ് സംഘം സംഭവസ്ഥലത്തേക്ക് കുതിച്ചെത്തി പരിശോധന നടത്തുമ്പോള്‍ വീട്ടിനുള്ളില്‍ ഷെരീഖിന്റെ മൃതദേഹം കണ്ടെത്തി. എന്നാല്‍ ഫോറന്‍സിക് വിദഗ്ധരും വിരലടയാള വിദഗ്ധരും ചേര്‍ന്ന് നടത്തിയ പ്രാഥമിക പരിശോധനയില്‍ മൃതദേഹത്തില്‍ ചോരപ്പാടുകളോ രക്തമുറിവുകളോ ഒന്നും തന്നെ കണ്ടെത്തിയിരുന്നില്ല. തുടര്‍ന്ന് അഷറഫിനെ പോലീസ് കസ്റ്റഡിയിലെടുക്കുകയായിരുന്നു.

ലഹരി ഉപയോഗിച്ചുള്ള തര്‍ക്കം കൊലപാതകത്തില്‍

ഇന്‍ക്വസ്റ്റ് നടത്തുന്ന സമയത്ത് ഷെരീഖിന്റെ കഴുത്തില്‍ പിടിച്ച് അമര്‍ത്തിയ പോലെയുള്ള നേരിയ പാടുകള്‍ മാത്രമാണ് കണ്ടെത്തിയിരുന്നത്. കൂടാതെ മുറിയില്‍ നിന്ന് സ്റ്റീലിന്റെ ഒരു വടിയും പോലീസ് കണ്ടെടുത്തു. വൈകുന്നേരം മൂന്നരയോടെ കോഴിക്കോട് മെഡിക്കല്‍ കോളേജില്‍ ആരംഭിച്ച പോസ്റ്റ്മോര്‍ട്ടം നടപടികള്‍ പൂര്‍ത്തിയായതോടെയാണ് ആന്തരിക ക്ഷതങ്ങളാണ് മരണകാരണമെന്ന് തെളിഞ്ഞത്.

ഞായറാഴ്ച ഉച്ചയ്ക്കാണ് അഷറഫും ഷെരീഖും മുണ്ടുപാലം സരിഗ ബസ് സ്റ്റോപ്പിന് സമീപത്തെ ഈ വാടകവീട്ടില്‍ എത്തിയത്. ഇരുവരും ഒന്നിച്ചിരുന്ന് ലഹരി ഉപയോഗിച്ചിരുന്നതായി ചോദ്യം ചെയ്യലില്‍ അഷറഫ് സമ്മതിച്ചിട്ടുണ്ട്. ലഹരി ഉപയോഗിച്ചതിന് ശേഷം ഇരുവരും തമ്മിലുണ്ടായ കടുത്ത തര്‍ക്കവും വാക്കുതര്‍ക്കവുമാണ് കൊലപാതകത്തില്‍ കലാശിച്ചതെന്നാണ് പോലീസിന്റെ അനുമാനം.

ഇരുവരും താമസിച്ചിരുന്ന മുണ്ടുപാലത്തെ വാടകവീട്ടിലെ താമസക്കാരെക്കുറിച്ച് നാട്ടുകാര്‍ക്കും വലിയ വിവരങ്ങള്‍ ഒന്നുമുണ്ടായിരുന്നില്ല. പകല്‍ സമയങ്ങളില്‍ പൊതുസമൂഹവുമായി ബന്ധപ്പെടാതെ കഴിഞ്ഞ് വൈകി ജോലി കഴിഞ്ഞ് വരുന്നവരായിരുന്നു ഇവരെന്നും പരിസരവാസികള്‍ പറയുന്നു. പോസ്റ്റ്മോര്‍ട്ടം പ്രാഥമിക റിപ്പോര്‍ട്ട് പുറത്തുവന്ന പശ്ചാത്തലത്തില്‍, പ്രതിയായ അഷറഫിനെ പന്തീരാങ്കാവ് പോലീസ് വിശദമായി ചോദ്യം ചെയ്തുവരികയാണ്.