കണ്ണൂരിലെ പോലീസുകാര്‍ക്ക് ദിപാവലിയില്ല; ജില്ലയില്‍ സ്‌ഫോടകവസ്തുക്കള്‍ വന്നു നിറയുന്നു
പാറമടകളിലെത്തുന്ന സ്‌ഫോടക വസ്തുക്കള്‍ കണ്ണൂര്‍ ഉള്‍പ്പെടെയുള്ള മലബാര്‍ ജില്ലകളിലെ ആര്‍എസ്എസ്, സിപിഎം കേന്ദ്രങ്ങളിലേക്കെത്തുന്നു എന്ന് സൂചന. ഇത് സംബന്ധിച്ച് പോലീസ് കേസന്വേഷണം ഊര്‍ജ്ജിതമാക്കി.
നാടന്‍ ബോംബ് നിര്‍മ്മാണം മലബാറില്‍ സജീവമാകുന്നതിനിടയിലാണ് അന്വേഷണം വ്യാപിപ്പിക്കാന്‍ പോലീസ് തീരുമാനിച്ചിരിക്കുന്നു. രണ്ടാഴ്ചക്കിടയില്‍ ഏഴ് ബോംബ് ആക്രമണങ്ങളാണ് കണ്ണൂര്‍ ജില്ലയിലെ ചക്കരക്കല്ലില്‍ റിപ്പോര്‍ട്ട് ചെയ്യപ്പെട്ടത്. ആര്‍ക്കും ഗുരുതരമായി പരിക്കേറ്റിട്ടില്ലെങ്കിലും കണ്ണൂരില്‍ വര്‍ദ്ധിച്ചു വരുന്ന ബോംബ് അക്രമങ്ങള്‍ പോലീസിനെ അമ്പരപ്പിക്കുകയാണ്. രണ്ട് വര്‍ഷം മുമ്പ് കണ്ണൂരിലെ ക്വാറി ഉടമകളുടെ യോഗം പോലീസ് വിളിച്ചു കൂട്ടിയിരുന്നു. ക്വാറികളിലെത്തുന്ന സ്‌ഫോടക വസ്തുക്കള്‍ ബോംബായി മാറുകയാണെന്ന സംശയത്തെ തുടര്‍ന്നായിരുന്നു യോഗം. ഇപ്പോഴും തുടരുമെന്നാണ് പോലീസിന്റെ സംശയം.
ക്വാറികളില്‍ പാറ പൊട്ടിക്കുന്നതിന് ഉപയോഗിക്കുന്ന സ്‌ഫോടക വസ്തുക്കള്‍ കൈകാര്യം ചെയ്യാന്‍ പാറമടകളില്‍ തന്നെ വിദഗ്ദ്ധരുണ്ട്. പാനൂര്‍, നാദാപുരം, മാറാട് മേഖലകളില്‍ ബോംബുകള്‍ കണ്ടെത്തുന്നതിന് വേണ്ടി റെയ്ഡുകള്‍ നടത്തുന്നുണ്ടെങ്കിലും അത്തരം ശ്രമങ്ങള്‍ നിരന്തരം പരാജയപ്പെടുകയാണെന്ന് പോലീസ് പറയുന്നു. കാരണം ബോംബ് ആവശ്യമുള്ളവര്‍ പാറമടകളിലെത്തി സ്‌ഫോടക വസ്തുക്കള്‍ ശേഖരിക്കുകയാണ് പതിവ്. പാറമടകളില്‍ സ്‌ഫോടക വസ്തുക്കളെത്തുന്നത് തടയാന്‍ പോലീസിന് കഴിയില്ല. കാരണം സ്‌ഫോടക വസ്തുക്കള്‍ കൊണ്ടുവരാന്‍ പാറമടക്കാര്‍ക്ക് ലൈസന്‍സുണ്ട്.
ദീപാവലിയായതോടെ ആവശ്യാനുസരണം പടക്കങ്ങള്‍ മറ്റ് സംസ്ഥാനങ്ങളില്‍ നിന്നും കണ്ണൂരിലെത്തുന്നുണ്ട്. ഇത് കണ്ണൂര്‍ പോലീസിന്റെ ഉറക്കം കെടുത്തുകയാണ്. ദീപാവലി വില്പനയ്‌ക്കെത്തുന്ന പടക്കങ്ങളില്‍ എത്രത്തോളം കണ്ണൂരിലെ പാര്‍ട്ടി ക്യാമ്പുകളിലെത്തുമെന്നാണ് പോലീസിന്റെ സംശയം. പോലീസുകാരാരും ദീപാവലി ആഘോഷിക്കരുതെന്നും സ്‌ഫോടക വസ്തുക്കളുടെ കൈവശം നിരീക്ഷണമെന്നും ജില്ലാ പോലീസ് മേധാവി നിര്‍ദ്ദേശം നല്‍കിയിട്ടുണ്ട്. ചുരുക്കത്തില്‍ ഇത്തവണ കണ്ണൂര്‍ പോലീസിന് ദീപാവലിയില്ല. പാര്‍ട്ടി ക്യാമ്പുകളിലാണ് ദീപാവലി.
ഏതച്ഛന്‍ വന്നാലും അമ്മയ്ക്ക് ഉറക്കമില്ലെന്ന പഴഞ്ചൊല്ലാണ് കണ്ണൂരിലെ പോലീസുകാര്‍ ഓര്‍ക്കുന്നത്. കാരണം ദീപാവലിയുടെ മറവില്‍ അടുത്ത ഒരു വര്‍ഷത്തേക്കുള്ള സ്റ്റോക്കാവും കണ്ണൂരിലെ ആര്‍എസ്എസ്, സിപിഎം കേന്ദ്രങ്ങളിലെത്തുക.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
