മൂന്നു സെന്റ് ഭൂമിക്കായി പിതാവിനെ ഭര്‍ത്താവാക്കി യുവതിയുടെ തട്ടിപ്പ്. ഭൂരഹിതരില്ലാത്ത കേരളം പദ്ധതിയില്‍ പട്ടയം കിട്ടാനായാണ് എറണാകുളം, കാക്കനാട് സ്വദേശിയായ യുവതിയുടെ തട്ടിപ്പ്. സ്വന്തമായി ഭൂമിയും ഇരുനില വീടുമുള്ള മുപ്പതുകാരിയാണ് അറുപത് വയസുള്ള പിതാവിനെ ഭര്‍ത്താവാക്കി മൂന്നു സെന്റ് ഭൂമിക്കു പട്ടയം നേടിയെടുത്തത്. 
അവിവാഹിതയായ യുവതി നിര്‍ധനയെന്ന് തെളിയിക്കാന്‍ സമര്‍പ്പിച്ച രേഖകളില്‍ പിതാവിനെ ഭര്‍ത്താവാക്കി കാണിച്ചായിരുന്നു തട്ടിപ്പ്.
എന്നാല്‍, യുവതി മാതാപിതാക്കളുടെ സംരക്ഷണയിലാണ് കഴിയുന്നത്. ഇവര്‍ വികലാംഗയാണ്. റവന്യൂ അധികാരികളുടെ ഒത്താശയോടെയാണ് യുവതി സര്‍ക്കാര്‍ഭൂമി കൈക്കലാക്കിയത്. വിവാഹിതരായവര്‍ക്കാണ് ഭൂരഹിതരില്ലാത്ത കേരളം പദ്ധതിപ്രകാരം മൂന്നുസെന്റ് ഭൂമിക്ക് പട്ടയം കിട്ടുക. 
അവിവാഹിതകള്‍ക്ക് പട്ടയത്തിന് അര്‍ഹതയില്ലെന്ന് ബോധ്യമുണ്ടായിട്ടും കൃത്രിമരേഖകള്‍ ഉണ്ടാക്കിയാണ് യുവതി ഭൂമിക്ക് അവകാശിയായത്. സംഭവം വിവാദമായതോടെ കാക്കനാട് വില്ലേജ് ഓഫീസ് പരിധിയില്‍ നടന്ന തിരിമറി റദ്ദാക്കി തടിയൂരാനുള്ള ശ്രമത്തിലാണ് ഉദ്യോഗസ്ഥര്‍. കണയന്നൂര്‍ താലൂക്കില്‍ തെങ്ങോട് കരയിലാണ് അനധികൃതമായി പട്ടയം സ്വന്തമാക്കിയ കുടുംബം ഇപ്പോള്‍ താമസിക്കുന്നത്. 
കാക്കനാട് വില്ലേജില്‍ ബ്ലോക്ക് നമ്പര്‍ ഏഴില്‍ റീസര്‍വേ നമ്പര്‍ 398/9ല്‍ പെട്ട 00.0121ആര്‍. ഭൂമിക്ക് 6894 നമ്പര്‍ പ്രകാരം 2013 സെപ്റ്റംബര്‍ 30നാണ് പട്ടയം അനുവദിച്ചത്. ഭൂരഹിതരില്ലാത്ത കേരളം പദ്ധതിപ്രകാരം മൂന്നുസെന്റ് ഭൂമിക്ക് പട്ടയം ലഭിച്ചവര്‍ക്ക് 2013 സെപ്റ്റംബര്‍ 30ന് പട്ടയം നല്‍കിയിരുന്നു. അന്ന് പട്ടയം ലഭിച്ചവരില്‍ നല്ലൊരു ശതമാനത്തിനും ഇതുവരെ ഭൂമി ലഭിക്കാത്തപ്പോഴാണ് അനര്‍ഹര്‍ ആനുകൂല്യം നേടുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha