പ്രണയാഭ്യര്‍ഥന നിരസിച്ചതിന് വിദ്യാര്‍ഥിനിയെ കൊലപ്പെടുത്തിയ കേസില്‍ പ്രതിക്ക് ജീവപര്യന്തം തടവുശിക്ഷ. അന്‍പതിനായിരം രൂപ പിഴയും വിധിച്ചിട്ടുണ്ട്. പിഴ അടച്ചില്ലെങ്കില്‍ രണ്ടുമാസം കൂടി തടവ് അനുഭവിക്കണം.
തലശേരി ചിറക്കര കെ.ടി.പി മുക്കിലെ ഷഫ്‌നാസില്‍ ഷഫ്‌ന (18)യെ വെട്ടിക്കൊലപ്പെടുത്തിയ കേസിലെ പ്രതി ചിറക്കര സ്വദേശി താഫീഖ് മന്‍സലില്‍ മുഹമ്മദ് അഫ്‌സലിലാണ് ശിക്ഷ വിധിച്ചത്. മനുഷ്യ മനസാക്ഷിയെ ഞെട്ടിച്ച കേസാണെന്ന് കോടതി വിലയിരുത്തി. പ്രതിക്ക് മാനസിക പരിവര്‍ത്തനത്തിനുള്ള അവസരം നല്‍കുകയാണെന്നും കോടതി വ്യക്തമാക്കി. അതിക്രമിച്ചു കടക്കല്‍, കൊലപാതകം എന്നീ കുറ്റങ്ങളാണ് പ്രതിക്കെതിരെ ചുമത്തിയിരുന്നത്.
പ്രതിക്ക് ശിക്ഷ ഇളവ് നല്‍കരുതെന്നും ഇളവ് നല്‍കിയാല്‍ അത് സമൂഹത്തിനു തെറ്റായ സന്ദേശം നല്‍കുമെന്നും പ്രോസിക്യുഷന്‍ വാദിച്ചു. ശിക്ഷ കുറയ്ക്കണമെന്ന് പ്രതിഭാഗം വാദിച്ചു. പ്രായമായ മാതാപിതാക്കളുണ്ടെന്നും അവരുടെ സംരക്ഷണം തനിക്കാണെന്നും പ്രതി കോടതിയെ അറിയിച്ചു. എന്നാല്‍ കൊലപാതകത്തിനു ശേഷം വ്യാജവിസ സംഘടിപ്പച്ച് ഗള്‍ഫിലേക്ക് കടന്ന പ്രതി വീണ്ടും കുറ്റം ചെയ്തുവെന്നും പ്രോസിക്യുഷന്‍ വ്യക്തമാക്കി. ശിക്ഷ ഇളവ് നല്‍കിയാല്‍ ഇയാള്‍ വീണ്ടും കുറ്റം ആവര്‍ത്തിക്കുമെന്നായിരുന്നു പ്രോസിക്യൂഷന്റെ നിലപാട്.
2004 ജനുവരി 13നാണ് ഷഫ്‌ന കൊലപ്പെട്ടത്. വീട്ടില്‍ അമ്മയുടെ മുന്നില്‍ വച്ചായിരുന്നു കൊലപാതകം. ഷഫ്‌നയെ പ്രതി നാല്പതിലേറെ തവണ വെട്ടിയെന്നാണ് കേസ്. കൊല്ലപ്പെടുമ്പോള്‍ തലശേരി െ്രെകസ്റ്റ് കോളജ് വിദ്യാര്‍ഥിനിയായിരുന്നു ഷഫ്‌ന.
അറസ്റ്റിലായ പ്രതി പിന്നീട് ജാമ്യത്തിലിറങ്ങി ഗള്‍ഫിലേക്ക് മുങ്ങി. 2006 ജൂലായ് ഒന്‍പതിന് ബംഗളൂരുവില്‍ നിന്ന് വ്യാജ പാസ്‌പോര്‍ട്ട് സംഘടിപ്പിച്ചാണ് ഗള്‍ഫിലേക്ക് കടന്നത്. കഴിഞ്ഞ വര്‍ഷം ഇന്റര്‍പോളിന്റെ സഹായത്തോടെയാണ് ഇയാളെ വീണ്ടും പിടികൂടിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha