ദുരിതം അനുഭവിക്കുന്ന സ്ഥലങ്ങളിലേക്ക് ഭക്ഷണമെത്തിക്കുന്നവര് ഇക്കാര്യങ്ങള് അറിഞ്ഞാല് നല്ലത്
ദുരിതം അനുഭവിക്കുന്ന പ്രളയക്കെടുതി രൂക്ഷമായിട്ടുള്ള സ്ഥലങ്ങളില് ഭക്ഷണമെത്തിക്കുന്നവര് ഇക്കാര്യങ്ങള് അറിഞ്ഞാല് നല്ലതായിരിക്കും. ദുരിതസ്ഥലത്തു വിതരണത്തിന് വേണ്ടത് ജലാംശമില്ലാത്ത ഭക്ഷണമാണ്. ബിസ്കറ്റ്, ബണ്, അവല് തുടങ്ങിയവയ്ക്കാണ് പ്രാധാന്യം നല്കേണ്ടത്. പാകം ചെയ്ത ജലാംശമുള്ള ഭക്ഷണമായാല് എളുപ്പത്തില് അത് ചീത്തയാകും.
ദുരിത ബാധിത മേഖലകളില് കഴിയുന്നവര്ക്ക് ഹെലികോപ്റ്റര് വഴി നല്കുന്ന ഭക്ഷണം ജലാംശമില്ലാത്തതും പാചകം ആവശ്യമില്ലാത്തതും വേഗത്തില് ചീത്തയാകാത്തതുമാകണമെന്ന് സൈനിക അധികൃതരുടെ അഭിപ്രായം. ഇതു മുന്നിര്ത്തി കളക്ഷന് സെന്ററുകളിലേക്ക് എത്തിക്കുന്ന ഭക്ഷ്യവസ്തുക്കളില് കുപ്പിവെള്ളം, അവല്, മലര്, ശര്ക്കര, ബിസ്ക്കറ്റ്, ഡ്രൈ ഫ്രൂട്ട്സ്, ചോക്കലേറ്റ്, ബണ് എന്നിവയ്ക്കു പ്രാധാന്യം നല്കണമെന്നും സൈനിക അധികൃതര് പറയുന്നു. പാകം ചെയ്തതും എളുപ്പത്തില് ചീത്തയാവുന്നതുമായ ഭക്ഷണ പദാര്ത്ഥങ്ങള് നിരവധി പേര് ദുരിതാശ്വാസ ക്യാമ്പുകളില് എത്തിക്കുന്ന സാഹചര്യത്തിലാണ് അധികൃതര് ഇക്കാര്യം വ്യക്തമാക്കിയത്.
ഭക്ഷണം പാഴായി പോകാതിരിക്കാനും ദുരിത ബാധിതര്ക്ക് വേണ്ടത്ര അളവില് ലഭ്യമാക്കാനും ഇതു സഹായിക്കുമെന്നും സൈനിക അധികൃതര് പറയുന്നു.
തിരുവനന്തപുരം വിമാനത്താവളത്തില്നിന്ന് ഇന്നലെ ആയിരത്തോളം പേര്ക്കുള്ള ഭക്ഷ്യ വസ്തുക്കളാണ് വ്യോമമാര്ഗം പത്തനംതിട്ടയില് എത്തിച്ചത്. ഹെലികോപ്റ്ററില് എയര് ഡ്രോപ്പ് നടത്തിയാണ്
ഇവ ദുരിത ബാധിതര്ക്കു നല്കുന്നത്. ഭക്ഷ്യവസ്തുക്കള് കൊണ്ടുപോകുന്നതിനു മേല്നോട്ടം വഹിക്കാന് ജില്ലാ ഭരണകൂടം നിരവധി ഉദ്യോഗസ്ഥരെ നിയോഗിച്ചിട്ടുണ്ട്.
https://www.facebook.com/Malayalivartha
