പ്രളയക്കെടുതിയില്‍ നിന്ന് അപ്പര്‍ കുട്ടനാടിനെ രക്ഷിക്കാനായി തോട്ടപ്പള്ളി സ്പില്‍വേയിലെ മുഴുവന്‍ ഷട്ടറുകളും തുറന്നു. പൊഴിമുഖം ജെ.സി.ബി ഉപയോഗിച്ച് ആഴം വര്‍ദ്ധിപ്പിക്കുകയും ചെയ്തു. ഇന്നലെ രാവിലെ പത്തോടെയാണ് ഷട്ടറുകള്‍ മുഴുവന്‍ തുറന്നത്. 40 ഷട്ടറുകളാണ് ഇവിടുള്ളത്. അതില്‍ 37 എണ്ണം നേരത്തെ തുറന്നിരുന്നു. തുറക്കാതിരുന്ന മൂന്ന് ഷട്ടറുകളാണ് ഇന്നലെ രാവിലെ തുറന്നത്. ഇതു വഴിയുള്ള വാഹനയാത്രയ്ക്ക് നിയന്ത്രണം ഏര്‍പ്പെടുത്തിയത് യാത്രക്കാരെ വലച്ചു. തോട്ടപ്പള്ളി പൊഴിയുടെ തെക്കുഭാഗം മാത്രമാണ് മുമ്പ് മുറിച്ചിരുന്നത്.

വടക്കുഭാഗത്തുള്ള മണ്ണും 4 ജെ.സി.ബികളുപയോഗിച്ച് മാറ്റി. എങ്കിലും മുന്‍കാലങ്ങളിലെ പോലെയുള്ള നീരൊഴുക്കില്ലെന്നാണ് നാട്ടുകാര്‍ പറയുന്നത്. കൂടുതല്‍ വെള്ളം കടലിലേക്ക് ഒഴുകുന്നതോടെ അപ്പര്‍കുട്ടനാട്ടിലെ വെള്ളപ്പൊക്കത്തിന് ശമനമുണ്ടാകുമെന്ന് അധികൃതര്‍ പറഞ്ഞു. മന്ത്രി ജി.സുധാകരനും ഇറിഗേഷന്‍ വകുപ്പ് ഉദ്യോഗസ്ഥരും സ്ഥലത്തെത്തിയിരുന്നു.
അതേസമയം, കുട്ടനാട്ടില്‍ ജലനിരപ്പ് ഉയരുകയാണ്. വേമ്പനാട്ട് കായലില്‍ ജലനിരപ്പ് ഉയര്‍ന്നതിനെ തുടര്‍ന്ന് പുന്നമട വെള്ളത്തിലായി. എ.സി റോഡില്‍ കിടങ്ങറ പാലത്തിന് സമീപം 300 പേര്‍ കുടുങ്ങിക്കിടക്കുന്നതായി റിപ്പോര്‍ട്ടുണ്ട്.